काठमाडौं– निर्वाचन आयोगले स्थानीय तह निर्वाचन प्रयोजनका लागि ७३ साना दलहरूलाई आफ्नै चुनाव चिह्न प्रदान गर्ने भएको छ।
आयोगको आइतबार बसेको बैठकले राष्ट्रिय मान्यता प्राप्त नगरेका ७३ साना दललाई मागेकै चुनाव चिह्न प्रदान गर्ने निर्णय गरेको आयोगले जारी गरेको विज्ञप्तिमा उल्लेख छ।
स्थानीय तह निर्वाचनका लागि ७९ दल आयोगमा दर्ता भएका थिए। राजनीतिक दलसम्बन्धी ऐनअनुसार राष्ट्रिय मान्यताप्राप्त दलले मात्र आफ्नै चुनाव चिह्न पाउँछन्।
राष्ट्रिय मान्यता प्राप्त गरेका बाहेकका साना दललहरूले समेत आफ्नै चुनाव चिह्न पाउनु पर्ने माग गरेका थिए। सोही आधारमा आयोगले जिल्लामा रहेका संगठनको संरचनाको विवरण माग गरेको थियो। त्यसका आधारमा आयोगले कुन जिल्लामा कति दल हुन्छन् भन्ने टुंगो लगाएको हो।
स्थानीय तह निर्वाचन, २०७९ को निर्वाचनमा पर्यवेक्षणमा भाग लिन इच्छुक संस्थाहरुलाई चैत १३ गतेसम्म निवेदन पेस गर्न पनि आयोगले भनेको छ।
विगतको अभ्यास र अन्तर्राष्ट्रिय प्रचलनसमेतका आधारमा राष्ट्रिय संस्थाहरुलाई मात्र पर्यवेक्षण गर्न अनुमति दिइने आयोगले भनेको छ।
इच्छुक राष्ट्रिय संस्थाहरुले १५ दिनभित्र विद्युतीय माध्यमबाट आवेदन दिन सकिने गरी व्यवस्था मिलाइएको आयोगले जनाएको छ।
त्यस्तै, स्थानीय तह निर्वाचनका लागि आवश्यक पर्ने सबै मतपत्र जनक शिक्षा सामग्री केन्द्रबाट छपाई गर्ने गरी निर्णय भएकाले उक्त केन्द्रलाई जनशक्ति, छपाई मेसिन लगायतका पूर्वाधार तयारी हालतमा राख्न निर्देशन दिइएको आयोगको विज्ञप्तिमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786875773.jpg)
-1786602170.png)
-1786513116.png)
