काठमाडौं– २०१८ फिफा विश्वकप फुटबल प्रतियोगिताको क्वार्टरफाइनल क्वार्टरफाइनलमा दुई महादेशका मात्र टिम पुगेका छन्। युरोपका ६ टिम अन्तिम ८ मा पुग्दा दक्षिण अमेरिकाका उरुग्वे र ब्राजिल २ टिमले क्वार्टरफाइनलमा स्थान पक्का गरेका छन्।
क्वार्टरफाइनलमा पुगेका ४ टिमले विश्वकप जितेका छैनन् भने ४ टिम पूर्व च्याम्पियन हुन्। क्वार्टरफाइनलमा पुगेका आयोजक रसियासहित क्रोएसिया, स्विडेन र बेल्जियमले अहिलसम्म उपाधि जित्न सकेका छैनन्। ब्राजिल, फ्रान्स, उरुग्वे र इंग्ल्यान्ड भने पूर्व च्याम्पियन हुन्।
क्वार्टरफाइनलका खेल आगामी शुक्रबार र शनिबार हुनेछन्।
क्वार्टरफाइनल खेल तालिका
असार २२ गते शुक्रबार
उरुग्वे भर्सेस फ्रान्स– राति ७:४५ बजे
ब्राजिल भर्सेस बेल्जियम– राति ११:४५ बजे
असार २३ गते शनिबार
स्विडेन भर्सेस इंग्ल्यान्ड– राति ७:४५ बजे
रसिया भर्सेस क्रोएसिया– राति ११:४५ बजे
क्वार्टरफाइनल पुगेका टिमको इतिहास
ब्राजिल
ब्राजिल दक्षिण अमेरिकाबाट रुस विश्वकपका लागि छानिने पहिलो देश हो। छनोटमा उत्कृष्ट प्रदर्शन गरेको ब्राजिल लगातार २१ पटक विश्वकप खेलिरहेको छ। यो सौभाग्य ब्राजिललाई मात्र प्राप्त छ। दक्षिण अमेरिकी छनोटमा ब्राजिलले शीर्ष स्थान हात पारेको थियो। सन् १९३० देखि ब्राजिलले लगातार विश्व कप खेल्दै आइरहेको छ। विश्व कपको सबैभन्दा सफल टिम ब्राजिलले सन् १९५८, १९६२, १९७०, १९९४ र २००२ गरी पाँच पटक उपाधि जितेको छ। जारी विश्वकपमा समूह विजेता बनेको ब्राजिलले अन्तिम १६ मा मेक्सिकोलाई हरायो।
उरुग्वे
उरुग्वे विश्वकप फुटबलको जन्मदाता हो। उरुग्वेले सन् १९३० मा विश्वकप फुटबल आयोजना गरेको थियो। दक्षिण अमेरिकी छनोटमा दोस्रो बनेर १३औं पटक विश्वकपमा सहभागी भइरहेको उरुग्वे सन् २००२ यतादेखि अनवरत समावेश हुँदै आइरहेको छ। सन् १९३० पछि उरुग्वेले १९५०, १९५४, १९६२, १९६६, १९७०, १९७४, १९८६ र १९९० मा विश्वकप खेल्यो। यस्तै, उसले २००२, २००६, २०१० र २०१४ मा पनि प्रतिस्पर्धा गरेको थियो। उरुग्वे १९३० र १९५० को च्याम्पियन पनि हो। जारी विश्वकपका उरुग्वे समूह विजेता बनेर अन्तिम १६ पुगेको हो। उसले अन्तिम १६ को खेलमा पोर्चुगलालाई पाखा लगाएको हो।
बेल्जियम
बेल्जियम युरोप छनोटको समूह ‘एच’को विजेता बनेर १३औं पटक विश्व कपमा सहभागी भएको हो। यसपालिको विश्व कपमा युरोपबाट छनोट हुने बेल्जियम पहिलो देश हो। बेल्जियम सन् १९३० मा भएको विश्व कपको पहिलो संस्करणमा पनि सहभागी थियो। यसपछि बेल्जियमले १९३४, १९३८, १९५४, १९७०, १९८२, १९८६, १९९०, १९९४, १९९८, २००२ र २०१४ को विश्वकप खेल्यो। बेल्जियमको विश्व कपमा अहिलेसम्मको उत्कृष्ट प्रदर्शन भनेको १९८६ मा चौथो हुनु हो। इंग्ल्यान्ड रहेको समूहमा विजेता बन्दै नकआउट चरणमा पुगेको बेल्जियमले अन्तिम १६ मा जापानमाथि रोमाञ्चक जित हात पारेको थियो।
रुस
रुसको यो एघारौं विश्व कप सहभागिता हो। सन् १९५८, १९६२, १९६६, १९८६, १९९०, १९९४, २००२ र २०१४ मा विश्व कपमा समावेश भएको रुस १९६६ मा चौथो भएको थियो, यो नै उसको अहिलेसम्मकै उत्कृष्ट प्रदर्शन हो। १९९० सम्म रुस सोभियत संघको नामबाट विश्व कप खेल्ने गर्यो । यसपटक अन्तिम ८ मा पुग्न रुसले नकआउट चरणमा स्पेनलाई सिकार बनायो।
इंग्ल्यान्ड
इंग्ल्यान्ड १५औं पटक विश्वकप खेलिरहेको छ। फुटबलको जननी मानिने यो देश युरोप छनोट अन्तर्गत समूह ‘एफ’ को शीर्ष स्थानमा रहँदै छनोट भएको हो। इंग्ल्यान्डले १९८२ देखि लगातार विश्व कप खेलिरहेको छ। १९५० मा पहिलो पटक विश्व कप खेलेको इंग्ल्यान्डले १९५४, १९५८, १९६२, १९६६ र १९७० मा प्रतिस्पर्धा गरेको थियो। यसपछि उसले १९८२, १९८६, १९९०, १९९४, १९९८, २००२, २००६, २०१० र २०१४ मा पनि विश्व कप खेलिसकेको छ। इंग्ल्यान्ड १९६६ को विश्व विजेता पनि हो। यसपटक पनि उपाधि जित्ने लक्ष्य राखेको इंग्ल्यान्डले अन्तिम १६ मा कोलम्बियालाई पराजित गर्यो।
फ्रान्स
सन् १९९८ को विश्व विजेता फ्रान्स १५औं पटक विश्वकप खेलिरहेको छ। युरोप छनोटको समूह ‘ए’ को विजता हुँदै फ्रान्स विश्व कपमा छानिएको हो। फ्रान्सले १९३०, १९३४, १९३८, १९५४, १९५८, १९६६, १९७८, १९८२ र १९८६ को विश्व कप खेलिसकेको छ। सन् १९९८ को विश्वकप आयोजक फ्रान्सले २००२, २००६, २०१० र २०१४ मा पनि सहभागिता जनायो। सन् १९९८ पछि दोस्रो पटक उपाधि जित्ने लक्ष्य राखेको फ्रान्सले अन्तिम १६ मा अर्जेन्टिनामाथि सानदार जित हात पार्योश।
क्रोएसिया
क्रोएसियाले युरोपको ‘प्लेअफ’मा ग्रिसलाई समग्रमा ४–१ गोलले पछि पारेर पाँचौ पटक विश्व कपमा स्थान बनायो। क्रोएसियाले १९९८ मा तेस्रो स्थान हात पार्नु अहिलेसम्मकै उत्कृष्ट प्रदर्शन हो। फ्रान्सले विश्वकप जितेको यो प्रतियोगितामा क्रोएसियाले तेस्रो स्थानका लागि भएको खेलमा नेदरल्यान्ड्सलाई २–१ ले पराजित गर्यो। युगोस्लाभियाबाट छुटिएपछि सन् १९९८ मा पहिलो विश्वकप खेलेको क्रोएसियाले त्यसपछि लगातार विश्वकप खेल्दै आइरहेको छ। समूह चरणमा अर्जेन्टिनालाई हराएर सनसनी मच्चाएको क्रोएसियाले अन्तिम १६ मा डेनमार्कलाई पराजित गरेको थियो।
स्विडेन
युरोप छनोटको पहिलो चरणबाट विश्व कपमा स्थान बनाउन नसकेपछि स्विडेनले ‘प्लेअफ’ को सहारा लियो। ‘प्लेअफ’ मा स्विडेनले चार पटकको विश्व विजेता इटालीलाई १–० ले हराएर १२ वर्षपछि विश्व कपमा स्थान बनायो। स्विडेनको यो १२औं विश्वकप सहभागिता पटक हो। यसअघि उसले १९३४, १९३८, १९५०, १९५८, १९७०, १९७४, १९७८, १९९०, १९९४, २००२ र २००६ मा सहभागिता जनायो। विश्व कपमा स्विडेनको राम्रो प्रदर्शन १९५८ मा दोस्रो हुनु हो। स्विडेन फाइनलमा ब्राजिलसँग ५–२ ले पराजित भएको थियो। यसपटक समूह विजेता बनेर अन्तिम १६ मा पुगेको स्विडेनले स्विट्जरल्यान्डलाई हराएर अन्तिम ८ मा स्थान पक्का गर्यो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790071578.png)
-1790066546.png)
-1786602170.png)
-1789631269.jpg)
