काठमाडौं– गृहमन्त्री रामबहादुर थापा ‘बादल’ले अनसनका भरमा स्वास्थ्य नीति बनाउन खोज्नु अधिनायकवादी शैली भएको टिप्पणी गरेका छन्।
बुधबार प्रतिनिधिसभा बैठकमा सार्वजनिक र राजनीतिक महत्वका विषयमा सांसदहरुले उठाएको प्रश्नको जवाफ दिँदै गृहमन्त्री थापाले समस्याको समाधान सदनबाट खोज्नुपर्नेमा डा केसीले हतारमा अनसन सुरु गरेको टिप्पणी गरे।
उनले भने, ‘अहिले पनि केही बिग्रिएको छैन, यसलाई अधिनायकवादी होइन, लोकतान्त्रिक तरिकाले हल गरौं।’ गृहमन्त्री थापाले केसीलाई अनसन रोक्न आग्रह समेत गरे।
उनले डा गोविन्द केसीलाई गिरफ्तार नगरिएको र विरोध गर्न समेत रोक नलगाएको बताए।
कसैलाई मन लाग्यो भन्दैमा कुनै पनि ठाउँमा अनसन बस्न वा विरोध गर्न लोकतन्त्रमा नपाइने कुरा केसीले बुझ्नुपर्ने उनको भनाइ छ।
‘विरोध प्रदर्शन गर्ने अधिकारलाई कुण्ठित गरिएको छैन। अनसन बस्न पाइन्छ, तर संवेदनशील क्षेत्रमा होइन’, गृहमन्त्रीले भने।
गृहमन्त्री थापाले जनताको दैनिकीसँग जोडिएको अस्पतालसहितका संवेदनशील ठाउँहरुमा अनसन बस्न नमिल्ने जिकिर गरे।
‘डा केसीलाई अनसन नै बस्न मन भए अन्त गएर बस्न सक्नुहुन्छ’, सरकारलाई लक्षित गरी डा केसीले अनसन सुरु गरेकोप्रति आक्रोसित हुँदै उनले भने, ‘जनतालाई विद्रोह गर्ने नैसर्गिक अधिकार छ, डा केसीले विद्रोह नै गर्न खोजेको हो? अहिले विद्रोह गर्न आवश्यक छ? यो सरकार दलालहरुको, राष्ट्रघातीहरुको हो?’
उनले यो सरकार जननिर्वाचित भएकाले विद्रोह गर्नुपर्ने अवस्था नरहेको बताए। विद्रोह गर्नेलाई सरकारले सम्मान गर्ने तर प्रतिविद्रोह भए कानुन विपरीत हुने समेत उनले बताए।
डा केसीको मागबारे सरकारको कुनै अडान वा विमति नभएको तर कस्तो स्वास्थ्य नीति बनाउने भन्ने अधिकार संसदको भएको गृहमन्त्री थापाले बताए। जनप्रतिनिधिहरुले समाधान गर्ने कुरामा सडकमा अनसन बसेर समाधान नखोज्न उनले डा केसीलाई आग्रह समेत गरे।
‘निर्वाचित सरकार आएको छ, समितिहरु गठन भएका छन्। ती मुद्दाहरुको लोकतान्त्रिक तरिकाले हल हुन्छ’, गृहमन्त्री थापाले डा केसीलाई लक्षित गर्दै प्रश्न गरे, ‘तपाईँले सडकमा अनसन बसेर कानुन बनाउने वा समस्याको हल गर्ने हो?’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790071578.png)
-1786602170.png)
-1789631269.jpg)
