काठमाडौं– नेपाली कांग्रेसका नेता कृष्णप्रसाद सिटौलाले कांग्रेस कमजोर बन्दा संसदीय व्यवस्था कमजोर हुने बताएका छन्।
स्वर्गीय गिरिजाप्रसाद कोइरालाको ९५औँ जन्मजयन्तीका अवसरमा नेपाल विद्यार्थी संघ प्रदेश ३ ले सोमबार राजधानीमा आयोजना गरेको ‘गणतन्त्र स्थापना, गिरिजाप्रसाद कोइरालाको नेतृत्व र युवा विद्यार्थीको भूमिका’ विषयक कार्यक्रममा बोल्दै उनले भने,‘संसदीय व्यवस्थालाई सबल, सुदृढ र प्रभावकारी बनाउनका लागि संसदमा कांग्रेस बलियो प्रतिपक्षका रुपमा उभिनुपर्दछ।’
नेता सिटौलाले भने,‘कांग्रेस कमजोर बन्दा संसदीय व्यवस्था नै कमजोर हुन्छ, संसदीय व्यवस्थालाई बलियो बनाउन कांग्रेस सशक्त हुनुपर्छ।’
संसदीय समितिको लोभमा कांग्रेस लत्रिन नहुने भन्दै उनले संसदीय व्यवस्था बलियो बनाउने जिम्मा कांग्रेसको भएको बताए।
नेता सिटौलाले सभामुख र उपसभामुख फरक दलको हुनुपर्ने व्यवस्था संविधानले नै गरेको भन्दै सो विषयमा समेत कांग्रेसले सशक्त भूमिका निर्वाह गर्नुपर्नेमा जोड दिए।
कांग्रेस नेता गगनकुमार थापाले भने,‘गिरिजाबाबु राजनीतिज्ञ मात्रै होइनन्, नेपाली राजनीति क्षेत्रका होलसेलर नै हुन्, राजा चाहने र गणतन्त्र चाहने सबैलाई एउटै खुत्रुक्केमा अटाएर राजालाई ठेगान लाउँदै उहाँले मुलुकमा गणतन्त्र ल्याउनुभयो।’
कांग्रेस नेता प्रदीप पौडेलले कतिपय कांग्रेसी नेतालाई अझै पनि सत्तामा नै छु भन्ने भान भइरहेको बताउँदै प्रतिपक्षी भूमिकामा कांग्रेस कमजोर बन्दा सत्ताको मोह नहटेको महशुष भइरहेको बताए।
सांसद भीमसेनदास प्रधान, धना खतिवडा, नेविसंघका महामन्त्री कुन्दनराज काफ्ले लगायतले कांग्रेसलाई बलियो बनाउन जनताको मन जित्ने नेतृत्वको खोजी हुनुपर्नेमा जोड दिए।
नेविसंघ प्रदेश ३ का संयोजक रामप्रसाद अधिकारीले बलियो कांग्रेस निर्माणका लागि नेविसंघ प्रदेशले विभिन्न समयमा रचनात्मक कार्यक्रम गर्दै आएको जानकारी दिए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765711869.png)
-1764146706.png)
-1763721444.png)
-1765273665.jpg)
