काठमाडौं– सत्तारुढ नेपाल कम्युनिस्ट पार्टी (ने क पा) का सांसदहरुले नै सरकारको कामप्रति प्रश्न उठाएका छन्।
संघीय संसदको माथिल्लो सदन राष्ट्रियसभामा बोल्दै सत्तारुढ सांसदहरुले प्रचारमा एउटा र वास्तविकतामा अर्कै काम भएको भन्दै सरकारको कामप्रति प्रश्न उठाएका हुन्।
नेकपाका सांसद सुमनराज प्याकुरेलले विराटनगरमा रहेको भारतीय दूतावासको सम्पर्क कार्यालय बन्द भइसकेको भनेर सरकारले प्रचार गरे पनि हालसम्म चालू रहेकोप्रति राष्ट्रियसभाका अध्यक्षको ध्यानाकर्षण गराए।
‘सरकारले ठूलो स्वरमा यसअघि नै भारतीय दूतावासको फिल्ड अफिस बन्द भएको बताएको थियो। तर, उक्त कार्यालय अझै पनि सञ्चालनमा रहेको देखिन्छ’, उनले भने। सरकार हटिसक्यो भन्ने तथा भारतीय पक्ष बाढी–पहिरोको अवस्था र रेलको काम हेर्न फिल्ड अफिस कायम रहने भन्दै आएको प्रसंग जोड्दै सांसद प्याकुरेलले यथार्थ कुरा प्रस्ट पार्न आग्रह गरे।
नेकपाका अर्का सांसद रामनारायण विडारीले मन्त्री समयमा काम नगरी उद्घाटनमा व्यस्त हुने तर त्यसको दोष सांसदहरुले लिनुपर्ने अवस्था स्वीकार्य नहुने भन्दै सरकारको आलोचना गरे।
नियम निलम्बन गर्दै विधेयक पारित गर्न सरकारले अध्यादेश ल्याएकोप्रति आक्रोशित हुँदै विडारीले मन्त्रीहरुको कार्यशैलीमाथि प्रश्न गरे।
‘विधेयकहरु पारित गर्न नियम निलम्बन किन गरियो? कुन समयमा यो विधिबाट पारित गरिन्छ?’, विडारीले भने, ‘मन्त्रीले समयमा काम नगरेका कारण आपतकालीन र अत्यावश्कीय बेलामा गर्नुपर्ने यस्ता काम किन अहिले गरिँदै छ?’
मन्त्रीको लापरवाहीका कारण हुने यस्ता काममा सांसद दोषी हुन नसक्ने भन्दै सांसद विडारीले यस्तो गर्न नहुने बताए।
‘मन्त्रीले विधेयक ढिलो ल्याउने, त्यसको जिम्मा हामीले लिनुपर्ने?’, विडारीले भने, ‘उद्घाटन गर्ने कार्यमा मन्त्रीलाई फुर्सद छैन भने अलग्गै उद्घाटन मन्त्री बनाऔं, त्यसका कारण सांसदलाई बदनाम गर्न पाइँदैन।’
उनले सदनमा बोलेका कुरामा सरकारको ध्यानाकर्षण गराउन अध्यक्षसँग माग समेत गरे।
रेल ऋणमा होइन, अनुदानमा
नेपाली कांग्रेसका सांसद जितेन्द्रनारायण देवले नेपालमा रेल ल्याउँदा ऋणमा ल्याउन नहुने बताएका छन्।
उनले रेल कनेक्टिभिटीको कुरा चाहिने तर त्यसमा प्रचार भए अनुसार काम नभएको आरोप लगाए। सांसद देवले रेल निर्माणमा आर्थिक, सुरक्षा र भौगोलिक जटिलता मुख्य विषय भएकाले त्यसमा सबै राजनीतिक दलहरुबीच एकमत हुनुपर्नेमा जोड दिए।
‘मेरो व्यक्तिगत बुझाइमा हाम्रो जस्तो सानो देशले रेल जस्तो पूर्वाधार ऋणमा बनाउनुहुँदैन’, देवले भने, ‘यस्ता योजना अनुदानमा बनाउनुपर्छ।’
रेशम चौधरीलाई प्रमाणपत्र नदिनु लोकतन्त्रकै अपमान
राजपाका सांसद बृषेशचन्द्र लालले कर्तव्य ज्यान मुद्दामा थुनामा रहेका राजपाका सांसद रेशमलाल चौधरीलाई निर्वाचित भएको प्रमाणपत्र दिन माग गरे। अदालतको आदेशले थुनामा भए पनि चौधरीले निर्वाचन जितेको कुरा सरकारले स्वीकार नगरेको उनले टिप्पणी गरे।
‘जितेको स्वीकार गर्ने हो भने उनको कानुनसम्मत वारेसलाई किन दिइएन?’ लालले भने, ‘जेलमा भए पनि उसले आफू सम्बन्धित कागज पाउने हक हुन्छ, यो लोकतन्त्रको अपमान हो।’
बाढी-पहिरो नियन्त्रण गर्न सरकारको ध्यानाकर्षण
सांसद रामनारायण विडारीले वर्षा लागेसँगै देशका विभिन्न स्थानमा बाढी–पहिरो जस्ता प्रकोप बढेको भन्दै सरकारको ध्यानाकर्षण गराए।
‘भारतले सीमामा बाँध बनाएर नदी छेकेकाले समस्या भएको छ’ विडारीले भने, ‘बाढीपीडितहरुलाई दीर्घकालीन, अल्पकालीन र आपतकालीन काम गरेर राहत दिनुपर्यो।’
अर्का सांसद प्याकुरेलले भने, ‘तराई क्षेत्रमा वर्षाको बेला डुबान हुन्छ, तर यसबारे सरकारको तयारी केही देखिँदैन।’
उनले सम्बन्धित मन्त्रीबाट यस सम्बन्धमा तयारीको विषयमा जानकारी समेत माग गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
