काठमाडौं– प्रमुख प्रतिपक्षी दल नेपाली कांग्रेसले कानुन, न्याय तथा संसदीय मामिलामन्त्री शेरबहादुर तामाङले सरकारमा सहभागी हुन गरेको भागबन्डाको आह्वानप्रति आपत्ति जनाउँदै सदनमा जवाफ माग गरेको छ।
सदनमा प्रमुख प्रतिपक्ष नरहोस् भन्नेगरी मन्त्री तामाङको अधिनायकवादी प्रवृत्तिको अभिव्यक्ति आएको भन्दै कांग्रेसले सदनमा मन्त्रीको जवाफ माग गरेको हो। आइतबार बसेको प्रतिनिधिसभाको बैठकको विशेष समयमा बोल्दै नेपाली कांग्रेसकी सांसद पुष्पा भुसालले प्रमुख प्रतिपक्षी दललाई मन्त्री तामाङले सरकारमा आउन भागबन्डाको आह्वान गरेकोप्रति कडा आपत्ति प्रकट गरिन्।
सांसद भुसालले संविधान कार्यान्यवन गर्ने चरणमा रहेको सरकारका जिम्मेवार मन्त्रीले प्रमुख प्रतिपक्षी दललाई कमजोर बनाउनेगरी संसदीय मूल्य–मान्यता विरुद्धको अभिव्यक्ति दिएको भन्दै त्यसबारे सदनमा जवाफ माग गरिन्।
संविधान कार्यान्वयनका लागि प्रतिपक्षी दलको सहयोग लिएर अघि बढ्नुपर्नेमा सहयोग नै नलिने आसयले कानुनमन्त्रीको भनाइ आएको उनले बताइन्।
उनले कांग्रेस संसद छोडेर बाहिर नजाने चेतावनी दिइन्।
‘कांग्रेस प्रमुख प्रतिपक्षी दलको रुपम प्रभावकारी भूमिका खेल्दै संसदलाई बलियो बनाउन चाहन्छ। हामी यो सदन छोडेर बाहिर सडकमा रेलिङ भाँच्न पनि चाहन्नौं। हाम्रो लोकतन्त्रले हामीलाई त्यो सिकाएन’, उनले भनिन्।
मन्त्री तामाङले शनिबार राजधानीमा आयोजित कार्यक्रममा कांग्रेसले संवैधानिक निकायमा अंशबन्डा खोजेको र भागबन्डा खोज्ने भए सरकारमा सहभागी हुन आउनु भन्ने अभिव्यक्ति दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
