काठमाडौं– घुम्टो, राँको, सिमारेखा, कान्छी, बन्धकी, करोडपतिलगायत दर्जन बढी फिल्मका निर्देशक किसोर राना पुनः अस्पताल भर्ना भएका छन्। मृगौला पिडित राणा उपचारको लागि पुनः मानव अङ्ग प्रत्यारोपण अस्पताल, भक्तपुर भर्ना भएका हुन्।
लामो समयदेखि डायलसिस गराइरहेका रानाको स्वास्थ्यमा थप समस्या देखिएपछि मृगौला प्रत्यारोपणका लागि अस्पताल भर्ना गरिएको पारिवारिक श्रोतले जनाएको छ।
रानालार्इ यो समेत गरेर तेस्रो पटक मानव अङ्ग प्रत्यारोपण अस्पतालमा भर्ना गरिएको उनकी पत्नी तथा गायिका संगिता राना प्रधानले जानकारी दिइन्। प्रधानका अनुसार निर्देशक रानाको यसै हप्ता मृगौला प्रत्यारोपण हुने भएको छ।
सोमबारबाट नै प्रत्यारोपणाका लागि प्रक्रिया सुरु भएपनि विविध कारणले हुन नसकेको र यसै हप्ताभित्रमा प्रत्यारोपण गरिने समेत प्रधानले जानकारी गराइन्।
पछिल्लो समय ‘परिवर्तन’ चलचित्र छायाँकनको क्रममा रानाको स्वास्थ्यमा समस्या देखिएको थियो। त्यसको लगतै उनलाई भारतमा परिक्षणको लागि लगिएको थियो। सो क्रममा उनको दुबै मृगौलामा खराबी देखिएको हो।
यतिबेला उनको उपचार सहयोगार्थ सुमधुर साँझको आयोजनाको तयारी समेत भइरहको छ। उक्त कार्यक्रम यही असार १८ गते साँझ टुडीखेल स्थित आर्मी अफिसर्स क्लब काठमाडौंमा सम्पन्न हुने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
