काठमाडौं– वैदेशिक रोजगारीका क्रममा असफल भइ स्वदेश फर्किएका कामदार सामाजिक दबावमा पर्ने गरेको सरोकारवालाहरुले बताएका छन्।
रोजगारीका क्रममा विदेशबाट असफल भइ फर्किएका कामदारले सामाजिक, आर्थिकसँगै परिवारिक दबावको समाना गर्नुपर्ने आज राजधानीमा ‘सुरक्षित आप्रवासनका लागि राष्ट्रिय सञ्जाल’ले आयोजना गरेको छलफल कार्याक्रमका वक्ताहरुले बताएका हुन्। सामाजिक दबावका कारण समस्यामा परी फर्किएका कामदार पुनः रोजगारीको खोजीमा विदेशिँदा दुःख पाउने गरेको कार्यक्रमका वक्ताहरुले दावी गरेका छन्।
सरकारले वैदेशिक रोजगारीबाट फर्किएका श्रमिकसँगै भित्रिएको सीपको पहिचान गरेर आन्तरिक श्रम बजारमा व्यवस्थापन गर्ने योजना बनाइरहेको वैदेशिक रोजगार प्रवद्र्धन बोर्डकी सहनिर्देशक पवित्रा घिमिरेले बताइन्। रोजगारीबाट फर्किएका कामदारसँग हातमा सीप भएपनि राज्यले सदुपयोग गर्न नसकिएको उनको भनाइ छ।
सरकारले वैदेशिक रोजगारीबाट फर्किएका कामदारको तथ्यांक संकलन गर्न नसक्दा उनीहरुले विदेशमा कस्तो सिप सिकेर स्वदेश फर्किएका छन् भनेर पहिचान गर्न नै कठिन भइरहेको सुरक्षित आप्रवासनका लागि राष्ट्रिय सञ्जालका अध्यक्ष कुलबहादुर कार्कीले धारणा राखे। वैदेशिक रोजगारीबाट फर्किएका कामदारको तथ्यांक सरकारले स्थानीय तहको सहयोगमा संकलन गर्नुपर्ने उनको सुझाव छ।
यस्तै, सरकारले वैदेशिक रोजगारीबाट फर्किएका कामदारको सीपलाई पहिचान गरेर स्थानीय तहअन्तर्गत आन्तरिक श्रम बजारमा व्यवस्थापन गर्नमा जोड दिनुपर्ने सामी परियोजनाका संयोजक सूर्य भट्टराईले बताएका छन्।
सरकारले आगामी ५ वर्षभित्र बाध्यकारी वैदेशिक रोजगारीको अन्त्य गर्न लिएको लक्ष्यमा पुग्न विदेशबाट फर्किएका कामदारलाई उद्यमी बनाउनतिर ध्यान दिनुपर्ने संयोजक भट्टराईको सुझाव छ।
कार्यक्रममा बोल्ने सबै वक्ताहरुले सरकारले वैदेशिक रोजगारीबाट फर्किएका कामदारलाई सीपको पहिचानका आधारमा १० लाख ऋण दिन बजेट भाषणमा समेटिएको विषयलाई प्रभावकारी ढंगले लागू गर्नुपर्नेमा जोड दिएका थिए। लामो समय विदेशमा काम गरेर फर्किएका कामदारलाई सरकारले विशेष सुविधाको व्यवस्था गर्नुपर्ने पनि उनीहरु तर्क गर्छन्।
सरकारले वैदेशिक रोजगारीमा जाने कामदारका परिवारलाई पनि विशेष अभिमुखिकरण तालिमको व्यवस्था गर्नुपर्ने आवश्यकता रहेको कार्यक्रमका वक्ताहरुले औँल्याए।
हाल वैदेशिक रोजगारीबाट दैनिक करिब ४ सय कामदार फर्किने गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781922122.jpg)
-1764146706.png)
