रसुवा– रसुवाको गोसाइँकुण्ड गाउँपालिकाले आर्थिक वर्ष २०७५/०७६ का लागि २० करोडभन्दा बढ्री रकमको बजेट सार्वजनिक गरेको छ।
आइतबार भएको तेस्रो गाउँसभाले आगामी आर्थिक वर्षका लागि २० करोड १५ लाख २६ हजार रुपैयाँको बजेट विनियोजन गरेको हो।
बजेटमा आम्दानीतर्फ संघीय सरकारको सशर्त अनुदान शीर्षकमा ९ करोड ४० लाख, संघीय सरकारको समानीकरण अनुदान शीर्षकमा ६ करोड ९४ लाख प्राप्त हुने उल्लेख छ। त्यस्तै, प्रदेश सरकारको समानीकरण अनुदान शीर्षकमा ७३ लाख १८ हजार, प्रदेश सरकारको सशर्त अनुदान शीर्षकमा २१ लाख ८ हजार आम्दानी हुने उल्लेख छ। सवारीसाधन कर अनुदानमा १ करोड १२ लाख, आन्तरिक स्रोत २५ लाख र गत आर्थिक वर्षको मौज्दात १ करोड ५० लाख रहेको बताइएको छ।
आगामी आर्थिक वर्षको नीति तथा कार्यक्रम सार्वजनिक गर्दै गाउँपालिकाका अध्यक्ष कैसाङनुर्पू तामाङले गाउँपालिकाको विकासका लागि गौरवका दीर्घकालीन योजनाहरुलाई प्राथमिकता दिएको बताए।
बजेटमा धुन्चेदेखि गोसाइँकुण्डसम्म केबलकार निर्माणलाई पहिलो प्राथमिकतामा राखिएको उल्लेख गरिएको छ। केबलकार निर्माणका लागि डिपिआर तयार गर्न ३० लाख रुपैयाँ विनियोजन गरिएको छ।
त्यस्तै, सडक सञ्जालले छुन नसकेको रसुवाको पर्यटकीय क्षेत्र लाङटाङसम्म आगामी ३ वर्षभित्रमा मोटरबाटो निर्माणलाई पनि बजेटमा समेटिएको छ। लाङटाङमा दैनिक उपभोग्य वस्तु र पर्यटकीय सामग्रीका साथै विकास–निर्माणको सामग्री ढुवानीमा असहज भएकाले स्थानीयवासीको आवश्यकता र पर्यटकको सहजताका लागि मोटरबाटो निर्माणको योजना गाउँसभा मार्फत स्वीकृत भएको गाउँपालिकाका अध्यक्ष तामाङले बताए। स्याफ्रु–थाङस्याप (लाङटाङ) सडक निर्माणका लागि डिपिआर तयार गर्न १० लाख रुपैयाँ छुट्याइएको छ।
त्रिशुली खोला, दूधकुण्ड खोला, प्फाउलुङ खोला र गुप्चे खोला जलविद्युत् योजना निर्माणका लागि ५ लाख रुपैयाँ विनियोजन गरिएको छ।
त्यस्तै, धुन्चे–खोदोल सडक निर्माण गरिने भएको छ। गाउँपालिकाको क्रमगत एवं बहुवर्षीय योजना अन्तर्गत ३० लाख बजेट विनियोजन गरिएको छ। सरकारले मैलुङ स्याफ्रुबेंसी सडक निर्माण गरेसँगै सदरमुकाम धुन्चे ओझेलमा परेपछि गाउँपालिकाले सडक निर्माणको प्रक्रिया सुरु गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_bCQoRa7C09-1776741913.jpg)
-1764146706.png)
