बोस्टन, म्यासाचुसेट्स- केही दिनअघि बोस्टन विमानस्थलमा ओर्लिए लगत्तै नेपथ्यका मुख्य गायक अमृत गुरुङ म्यासाचुसेट्स इन्स्टिच्युट अफ टेक्नोलोजी परिसरमा पुगे, जहाँ केही स्वयंसेवीले यस भेगका नेपाली बालबालिकाका लागि नेपाली भाषाको कक्षा चलाइरहेका थिए। मातृभूमिभन्दा धेरै पर मातृभाषाप्रति कलिला नानीहरुको मोह देखेर उनी पुलकित भए।
भाषा कक्षामा बसेकाहरुलाई उनले भनेका थिए, ‘कुनै दिन नेपाल घुम्न गएका बेला तपाईँहरुका हजुरबुवा हजुरआमा वा अन्य आफन्तसँग जब कुराकानी गर्न सक्नुहुनेछ, त्यतिबेलै यसको महत्व बुझ्नुहुनेछ।’
त्यसको एक सातापछि नै अमृत नेपथ्यको टोलीसहित शहरको मध्य भागमा रहेको ‘रोयाल बोस्टन’ हलमा आफूलाई फरक नेपाली जमातमाझ प्रस्तुत गर्दै थिए। त्यहाँ निश्चित उमेरका मानिसलाई मात्र प्रवेश दिइएकाले भाषा सिकिरहेका बालबालिका उपस्थित हुन नसके पनि तिनका कतिपय अभिभावक पक्कै सहभागी थिए।
अमृतले एक साताअघि केटाकेटीलाई भनेकै कुरा यहाँ पनि बेग्लै शैलीमा दोहोर्यातए।
सप्ताहन्तमा बालबालिकालाई नेपाली भाषा सिकाउन लगेकोमा उनले अभिभावकलाई धन्यवाद दिँदै सुझाए, 'सातामा चार घन्टा मात्र भाषा पढाउन लगाएर तपाईंको दायित्व पूरा हुँदैन।'
अभिभावकले सामान्य तर असाध्यै महत्वपूर्ण योगदान गर्न सक्ने भन्दै उनले थपे, ‘आफ्ना बच्चाहरुसँग तपाईँहरुले घरमा नेपाली नै बोलिदिनुस्।'
त्यसपछि अमृतले अस्ट्रेलिया सांगीतिक भ्रमणका बेला भेटिएका एक नेपाली बालकले नेपाल गएका बेला हजुरबुवा-हजुरआमालाई भेट्दा रमाइलो लागे पनि भाषा समस्याले कुराकानी गर्न नसक्दा असाध्यै नरमाइलो लागेको सुनाएको प्रसंग सुनाए। हजुरबुवा-आमाले अंग्रेजी बोल्नै नसक्ने र आफू नेपाली नजान्ने अवस्थामा पुगेको तीतो यथार्थ बताउँदै ती बालकले त्यस्तो अवस्था फेरि झेल्न आफू अब नेपाल नजाने सुनाएका थिए।
त्यस बालकको अवस्था बयानपछि अमृतले बोस्टनवासी नेपालीलाई सम्बोधन गरे, ‘त्यस्तो अवस्था हाम्रा कुनै पनि केटाकेटीले फेरि झेल्नु नपरोस्।’
कतिपय नेपालीले विदेशमा आफ्ना केटाकेटीलाई जातीय भाषा पनि सिकाउने गरेकामा त्यो झनै उत्तम रहेको उनले औंल्याए। ‘तर, नेपालमा नेपाली भाषाले नै सबै जातिलाई सम्पर्क भाषाका रुपमा जोडेको छ,’ उनले थपे, ‘यो एउटा भाषा तपाईंका केटाकेटीले बोल्न सके भने मुलुकको जुनसुकै भागमा पुगेर पनि आफ्ना कुरा बुझाउन सक्नेछन्।’
यति कुराकानी गरिसकेपछि अमृतले सुनाएको नेपथ्यको नयाँ गीत थियो– ‘तिमी पनि नेपाली, म पनि नेपाली, हामी नेपाली।’
त्यसपछि नेपथ्यका सदाबहार गीतहरु ‘आँगनैभरि’, ‘छेक्यो छेक्यो’, ‘जोमसोमे बजार’, ‘उडायो रेलैले’ तथा लोकप्रिय गीतहरु ‘रेशम’ र ‘तालको पानी’ सुनाएको थियो। त्यसैगरि ब्यान्डका नयाँ गीतहरु ‘कोसीको पानी’ र ‘शिरफूल शिरैमा’ पनि दर्शकले उत्तिकै रुचाएका थिए।
कार्यक्रममा ‘हामी नेपाली’, ‘गाउँ गाउँबाट उठ’ र ‘रातो र चन्द्रसूर्जे’ जस्ता देशभक्तिका गीत पनि गाइएको थिए।
‘हामीले थालेको नेपाली कक्षा चलाउने प्रयासलाई अमृत दाइले सराहना गरिदिनुभएकामा असाध्यै प्रोत्साहित भएका छौं,’ कार्यक्रमका आयोजकमध्ये एक तमु 8की सम्झना गुरुङले भनिन्, ‘उहाँले गर्नुभएको आह्वानलाई सबैले ग्रहण गरिदिनेछन् भन्ने विश्वास लिएकी छु।’
बोस्टनको यो कार्यक्रम ‘तमु 8’ले ‘जात्रा नेपाल’सँगको सहकार्यमा आयोजा गरेको थियो।
‘बोस्टनमा यसअघि पनि हामीले धेरै कार्यक्रम आयोजना गरेका थियौं,’ आयोजक टिमका उज्ज्वल धौवडेलले भने, ‘यो चाहिँ अहिलेसम्मकै सबैभन्दा ठूलो मात्र नभई हाम्रो लागि व्यवस्थित र शालीन आयोजनाको अनुभव बन्न पुग्यो।’
बोस्टनको यो कन्सर्टसँगै नेपथ्यले अमेरिकाको दुई शहरका निम्ति गरेको यात्रा पनि पूरा गरेको छ। प्राविधिक र व्यवस्थापकीय टोलीसहितको ब्यान्ड नेपालतर्फ लागेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_bCQoRa7C09-1776741913.jpg)
-1764146706.png)
