काठमाडौं- नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले मुलुकको द्रूत आर्थिक विकासका लागि परम्परागत नीति नियमहरुलाई समयानुकूल बनाउन आग्रह गरेका छन्।
महासंघका कार्यवाहक अध्यक्षसमेत रहेका वरिष्ठ उपाध्यक्ष ढकालले बुधबार काठमाडौंमा आयोजित नाडा अटोमोबाइल्स एसोसियसन अफ नेपालको ४५औं वार्षिक साधारणसभालाई सम्बोधन गर्दै सरोकारवाला पक्षहरुसँग छलफल गरेर परम्परागत नीति नियमहरुलाई परिवर्तन गर्दै जाँदा आमजनतालाई लाभ पुग्ने र सरकारले चाहेको आर्थिक रुपान्तरणको लक्ष पनि हासिल हुने बताए।
'यो अटोमोबाइल सेक्टरको मात्र होइन। समग्र निजी क्षेत्रका सुझावहरुलाई लिएर सरोकारवाला पक्षहरुसँग छलफल गरी पुराना नीति नियमहरु परिवर्तन गर्दै जाँदा सबैपक्षलाई फाइदा हुन्छ,' उनले भने, 'यसका लागि राज्यले अग्रसरता लिनुपर्छ।'
वरिष्ठ उपाध्यक्ष ढकालले मुलुकभित्र सवारीसाधनको एसेम्बिलिङ प्लान्ट स्थापनाका साथसाथै निर्यात बढाउनेतर्फ विशेष पहल गर्नुपर्ने बताए। 'अहिले मुलुकभित्र दुई पाङ्ग्रे सवारी साधनका एसेम्बिलिङ प्लान्ट खुल्न थालेका छन्। यसको विस्तारसँगै चार पाङ्ग्रे सवारी साधनको एसेम्बिलिङ प्लान्ट स्थापनाका लागि सरकारले बढावा दिनुपर्ने हुन्छ,' उनले भने।
भारतमा बिजुली निर्यात सुरु भएको बताउँदै उनले औद्योगिक क्षेत्रलाई सस्तोमा बिजुली उपलब्ध गराउनसके उत्पादनमुलक क्षेत्रमा लगानी आकर्षित गर्न सकिने बताए। उनले सार्वजनिक सवारीलाई चुस्त बनाउनेतर्फ सरकार र स्थानीय तहको ध्यानाकर्षण गराए।
सवारीसाधन विलासिताको वस्तु मात्र नरहेको बताउँदै उनले यस क्षेत्रले वार्षिक एक खर्बभन्दा बढी राजश्व दिएको, जुन सार्वजनिक खर्चको लागि महत्त्वपूर्ण पक्ष भएको बताए।
उनले कोभिड-१९ को महामारीबीच पनि मुलुकको अर्थतन्त्रमा सुधार हुँदै गएकोसमेत बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
