काठमाडौं– अभिनेत्री स्वस्तिमा खड्काले अभिनय गरेका दुई फिल्म युट्युबमा रिलिज भएका छन्। दुवै फिल्म ट्रेण्डिङको पहिलो र दोस्रो नम्बरमा रहेका छन्। पहिलो नम्बरमा रहेको ‘घामड शेरे’ले प्रदर्शन भएको दुई दिनमै १९ लाख भ्युज भएको छ भने दोस्रो नम्बरमा रहेको ‘हजार जुनीसम्म’ले दुई सातामा ५३ लाख भ्युज पाएको छ।
सिनमा हलमा प्रदर्शन हुँदा यी दुवै फिल्म फ्लप थिए। विकास राज आचार्यको निर्देशनमा बनेको ‘हजार जुनीसम्म’ २०७६ भदौ १३ मा प्रदर्शनमा आउँदा दर्शक पाउनै हम्मेहम्मे परेको थियो। यो फिल्ममा स्वस्तिमासँगै आर्यन सिग्देल प्रमुख भूमिकामा देखिएका छन्।
सोही साल मंसिर १३ गते प्रदर्शनमा आएको स्वस्तिमाकै अभिनय रहेको अर्को फिल्म ‘घामड शेरे’ले पनि सिनेमा हलमा राम्रो भिड जम्मा गर्न सकेको थिएन्। हेमराज बिसीको निर्देशनमा बनेको यो फिल्म नराम्रोसँग फ्लप भएको थियो।
अहिले युट्युबमा रिलिज भएपछि भने दुवै फिल्ममा दर्शकको भिड देखिएको छ। सिनेमा हलमा प्रदर्शन हुँदा दर्शक नपाएर निर्माता डुबेका यी दुई फिल्मकी अभिनेत्री स्वस्तिमा भने युट्युबमा देखिएको दर्शकको चापलाई लिएर सन्तुष्टि साटिरहेकी छिन्। उनले सामाजिक सञ्जालमा दुई फिल्मलाई ‘अपार भिड’ पाएको भन्दै आफ्नो खुसी बाँडेकी थिइन्।
‘केही दिनदेखि मेरो फिल्म ‘हजार जुनीसम्म’ अपार भीडका साथ युट्युबमा प्रदर्शन भइरहेको छ,’ स्वस्तिमा लेख्छिन्, ‘४० लाख पटक हेरिएको यो फिल्म १ नम्बर ट्रेण्डिङमा आइसकेको छ। यो खुसीले मन रमाइरहेकै थियो, ‘घामड शेरे’ पनि युट्युबमा प्रदर्शन सुरु भयो।’
आफ्ना फिल्म हेरिनुमा खुसी हुनु स्वभाविक हो। युट्युबमा रिलिज भएर दर्शक पाउनुले फिल्मलाई सफल\असफल भएको प्रमाणित त गर्दैन, तर दर्शक पाउँदा हलबाट पाएको ‘चोट’मा थोरै ‘मल्हम’ त होला। त्यसैले, स्वस्तिमाको खुसीलाई पनि गलत त भन्न मिल्दैन।
तर, सिनेमा हलमा दर्शक नै नपाएर फ्लप फिल्म युट्युबमा हेरिनुमा ‘अपार भिड’को उपस्थिति भन्दै स्वस्तिमाले खुसी मनाउनु चाहिँ अलि शोभा दिँदैन। युट्युबमा चलिनुले न निर्मातालाई फाइदा छ न कलाकारलाई नै सिनेमा हलमा भिड हुँदा जस्तो महत्त्व। प्रायः नेपाली फिल्मले युट्युबमा दर्शक पाउने नै हुँदा स्वस्तिमाका यी दुई फिल्मले पनि युट्युबमा पाएको ‘अपार भिड’ले धेरै फरक त पार्ने कुरै भएन। तर, यो कुरा स्वस्तिमालाई कसले बुझाउला?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771566457.png)
