काठमाडौं– बुधबारबाट सुरु भएको राष्ट्रिय प्रजातन्त्र पार्टीमा महामन्त्री पदमा उठेकी छिन्, अभिनेत्री रेखा थापा। रेखाले दिएको उम्मेदवारीलाई लिएर पार्टी भित्रै र पार्टी बाहिर कलाकारिता क्षेत्रमा पनि फरक फरक टिप्पणी भइरहेका छन्। यसबीच उनका सहकर्मी कलाकार दीपकराज गिरीले पनि रेखाको उम्मेदवारीमा उठेका प्रश्नहरुमा आफ्नो धारणा राखेका छन्।
गिरीले सामाजिक सञ्जालमार्फत् रेखा राप्रपाभित्रै राजा ल्याउनु हुन्न भन्ने धार भएकाहरुमध्येमा पर्नसक्ने बताएका छन्। राप्रपाको चुनाव आफ्नो लागि ‘लुतो न कनाई’ भएपनि ‘गणतन्त्रबादी रेखा कसरी राप्रपा भइन?’ भन्दै रेखाको उम्मेदवारीमाथि भइरहेको प्रश्नमा गिरीले उनी राप्रपाभित्रै राजा ल्याउनुहुन्न भन्ने धारको हुनसक्ने बताएका हुन्।
‘राप्रपाको चुनाब मेरो लागि लुतो न कनाइ हो,’ दीपकले लेखेका छन्, ‘गणतन्त्रबादी रेखा कसरी राप्रपा? कांग्रेस, एमालेमा पनि राजा ल्याउनुपर्छ भन्ने विचार राख्ने मान्छेहरु छन्, अब उनीरु कांग्रेस वा एमाले हुन वा होइनन्? त्यसै गरेर राप्रपामा पनि त राजा ल्याउनु हुन्न भन्ने धार पनि होला वा हुन सक्छ कि.. न रेखा त्यसमा पर्छिन कि?’
गिरीले रेखाको महामन्त्री पदको उम्मेदवारीपछि समकक्षी कुन्ती शाहीले ‘राजनीति फिल्म खेलेको जस्तो सजिलो छैन’ भनेकोमा पनि आपत्ति जनाउँदै टिप्पणी गरेका छन्। उनले लखेका छन्, ‘कसले भन्यो तपाईंलाई फिल्म खेल्न सजिलो छ भनेर.. एक चोटी ट्राई गरेर हेर्नु हुन्छ? क्यामेरा अगाडि तपाईंको पसिना छुट्नेछ।’
राप्रपाले आफ्नो सिद्धान्त र विचारलाई प्रतिनिधित्व नगर्ने भएपनि गिरीले अभिनेत्री रेखा थापा महामन्त्री जस्तो पदमा उठ्दा आफूले त्यसलाई स्वागत गरेको बताएका छन्। दलहरुले कलाकारलाई चुनावमा जित्नका लागि सधै दलहरुले प्रयोग गर्दै आइरहेको र उनीहरुलाई कुनै पनि महत्वपूर्ण जिम्मवार वा पदबाट वञ्चित गरिरहेको परिपेक्षमा थापाले महामन्त्रीजस्तो पदमा उम्मेदवारी प्रस्तुत गर्नु स्वागत योग्य भएको उनले बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
