समूह 'एफ'
स्विडेन भर्सेस दक्षिण कोरिया
समय – असार ४ सोमबार, साँझ ५:४५ बजे
मस्को– २०१८ फिफा विश्वकप अन्तर्गत समूह 'एफ' को दोस्रो खेलमा स्विडेन र दक्षिण कोरियाबीच आज साँझ प्रतिस्पर्धा हुँदैछ। दुई टिम विश्वकपमा पहिलो पटक प्रतिस्पर्धा गर्न लागेका हुन्।
डिफेन्डिङ च्याम्पियन जर्मनीको समूहमा परेका दुवै टिमका लागि पहिलो खेल महत्त्वपूर्ण छ। पहिलो खेलमा हात पारेको नतिजाबाट दोस्रो चरणमा पुग्ने अवस्था थाहा हुने भएकाले दुवै टिम जितका लागि खेल्नेछन्।
स्विडेन १२ वर्षपछि विश्वकपमा फर्किएको हो। प्लेअफमार्फत विश्वकपमा छानिएको स्विडेनले इटालीलाई पराजित गरेको थियो।
दक्षिण कोरिया दसौं पटक विश्वकप खेल्दै छ। कोरियाको स्पष्ट लक्ष्य छ, अघिल्लो विश्वकपभन्दा उत्कृष्ट खेल्ने। सन् २०१४ मा समूह चरणमा १ अंक मात्र जोडेको कोरिया यो विश्वकपमा उत्कृष्ट खेलेर दोस्रो चरणमा पुग्ने योजनामा हुनेछ।
स्विडेनको बलियो पक्ष रक्षापंक्ति हो। स्विडेनको अग्रपंक्तिमा भने समस्या देखिएको छ। उसले डेनमार्क र पेरुसँग खेलेका पछिल्ला दुई खेलमा गोलरहित बराबरी खेलेको थियो।
कोरियाले छनोट प्रतियोगितामा उत्कृष्ट खेलेको थियो। मुख्य प्रतियोगितामा राम्रो खेल्न नसक्नु उसको समस्या हो। त्यो समस्या हटाउन कोरियाले वार्मअप खेल खेल्यो। तर, रक्षापंक्तिमा अझै समस्या देखिएको छ। यद्यपि प्रतिभाशाली मिडफिल्डर सन हेउमिनबाट कोरियाले धेरै आशा गर्न सक्छ।
कोरिया र स्विडेनबीच सन् १९४८ को ओलम्पियक खेलमा पहिलो पटक प्रतिस्पर्धा भएको थियो। सो खेलमा स्विडेनले कोरियालाई १२–० गोलले पराजित गरेको थियो। पछिल्ला तीन मैत्रीपूर्ण खेलमध्ये २ खेल बराबरीमा सकिएका छन् भने एक खेल स्विडेनले २–० गोलले जितेको थियो। विश्वकपमा भने दुई टिम पहिलो पटक आमनेसामने हुन लागेका हुन्।
सम्भावित टिम:
स्विडेन
ओल्सेन, लुस्टिङ, ग्रानक्भिस्ट, लिन्डेलोफ, अगस्टिसन, क्लासन, लार्सन, एकडन, फोर्बेर्ग, बेर्ग, टोभोनेन।
कोरिया
किम सेएग्यु, लि योङ, किम योङ्गवन, जाङ ह्यूसो, पार्क जोहो, कि सेनयुइङ, जङ वूयोङ, हाङ हीचन, लि जाइसङ, सन हेउउमिन, किम सिनविक।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775455666-1775459306.jpeg)
-1764146706.png)
