काठमाडौं– वरिष्ठ अधिवक्ता शम्भु थापाले प्रधानन्यायाधीश चोलेन्द्र शमशेर राणामाथि 'भाइलाई परिचालन गरी मुद्दामा चलखेल गरेको' गम्भीर आरोप लगाएका छन्।
सर्वोच्च अदालतका न्यायाधीश र कानुन व्यवसायीले राजीनामा मागेर आन्दोलन सुरु गरेपछि पनि प्रधानन्यायाधीश राणाले आफ्ना भाइ प्रभु शमशेर राणालाई परिचालन गरेर मुद्दामा चलखेल गराएको थापाको आरोप छ। आफूले विनाआधार आरोप नलगाएको दाबी गर्दै थापाले आवश्यक परे 'कल रेकर्ड' उपलब्ध गराउने पनि बताएका छन्।
केही मुद्दामा सर्वोच्च अदालतमा दर्ता भएर प्रधानन्यायाधीश राणाले पेसी तोक्न थालेदेखि नै उनका भाइ प्रभु शमशेर राणाले 'बार्गेनिङ' सुरु गरेको थापाको भनाइ छ।
‘प्रधानन्यायाधीशका भाइ प्रभु शमशेरले मुद्दा दर्ता भएदेखि नै बार्गेनिङ गरे। ४ वजे इजलास बस्दै सैनिकको क्षेत्राधिकारसम्बन्धी मुद्दामा अन्तरिम आदेश जारी गर्नुभयो, तर त्यसपछिको मुद्दा हेर्दा–हेर्दै राख्नुभयो,’ संवैधानिक कानुन व्यवसायी मञ्चले मंगलबार आयोजना गरेको 'न्यायपालिकाको वर्तमान संकट र निकास' विषय कार्यक्रमलाई सम्बोधन गर्दै थापाले भने।
प्रधानन्यायाधीश राणाले कात्तिक १४ गतेका लागि आफ्नो एकल इजलासमा तोकेको मुद्दाको सन्दर्भमा उनका भाइ प्रभु शमशेरले 'बार्गेनिङ' गरेको थापाको आरोप छ।
प्रधानन्यायाधीश राणाले कात्तिक १४ गतेका लागि आफूसहितका ८ वटा संयुक्त र ४ वटा एकल गरी १२ इजलास गठन गरेका थिए। राणाले आफ्नो एकल इजलासमा २ थान मुद्दाको पेसी तोकेका थिए।
एउटा मुद्दा कर्तव्य ज्यानको कसूर लागेका सैनिक कर्मचारीको मुद्दा सैनिक अदालतमा पठाउने चितवन जिल्ला अदालतको आदेशविरुद्धको थियो। महान्यायाधीवक्ताको कार्यालयले दायर गरेको रिटमा प्रारम्भिक सुनुवाइ गर्दै राणाले अन्तरिम आदेश जारी गरेका थिए।
उच्च अदालत पाटनविरुद्ध भेषराज लोहनीले दायर गरेको अर्को मुद्दालाई पनि राणाले आफ्नो इजलासमा तोकेका थिए। प्रधानन्यायाधीश राणाले लोहनीको मुद्दालाई हेर्दाहेर्दैमा राखेका थिए।
‘कात्तिक १४ गते प्रधानन्यायाधीश राणाको इजलासमा पेसी तोकिइ हेर्दाहेर्दैमा रहेको मुद्दामा भाइ प्रभु शमशेरले दर्ता भएदेखि हेर्दाहेर्दैमा राख्ने निर्णय हुँदासम्म बार्गेनिङ गरेका छन्,’ वरिष्ठ अधिवक्ता थापाले भने, ‘आवश्यक परे कल रेकर्ड दिन सक्छु।’
जिल्ला र उच्च अदालत पाटनले गरेको निर्णयविरुद्ध थुनामा राख्न माग गर्दै आएको निवेदनमा राणाले आफ्नो राजीनामा माग भइरहेको समयमा समेत बार्गेनिङ गरेको थापाको भनाइ छ।
प्रधानन्यायाधीश राणाको कात्तिक १४ गतेको इजलासले हेर्दाहेर्दैमा राखेको उक्त मुद्दाको अर्को पेसी कात्तिक ३० गते रहेको छ।
प्रधानन्यायाधीश राणाले 'मनी साइफनिङ' गरेको पनि थापाको आरोप छ। राणामाथि राज्यले अनुसन्धान गर्नुपर्ने पनि थापाको माग छ।
‘नेपालका विचौलियाले उठाएको पैसाले अमेरिकामा कसैले पीआर लिएर बसेको र कसैको नाममा ग्यास स्टेशन किनिएको छ, ’ थापाले भने, ‘कसैलाई होटल किनिदिएको र केही पैसा सोही बाटोबाट नेपाल ल्याइएको छ।’
थापाले प्रधानन्यायाधीशको नाममा अर्ब अर्बको बार्गेनिङ हुने गरेको र करोड घटीको कुरा नै नहुने गरेको थापाको भनाइ छ।
‘ममाथि पनि धेरै दाग लगाउन सक्नुहुन्छ, हिम्मत छ भने लगाउनुस्,’ थापाले भने, ‘विशेष अदालतबाट सरुवा भएर गएपछि २०६७ सालमा श्रीमती रेजाको नाममा जग्गा पारित भएको थियो। पछि चोलेन्द्र शमशेरको नाममा भएकै हो। भ्रष्टाचार मुद्दामा सफाई दिएको त्यो घुसको नै थियो।’
भैरहवामा लिलाममा गएको कोर इन्स्टुमेन्ट एण्ड माउन्ड प्रालि भाइ प्रभु शमशेरको नाममा लिलाम सकार गरेर पनि देखिएको आरोप थापाले लगाए। ‘यो नयाँ सम्पत्ति सिर्जना गरेको हो। १६ करोड एनसीसी बैंकबाट लिएको देखिन्छ,’ थापाले भने, ‘बानेश्वरमा रहेको भवनको त कुरै नगरौं। उहाँ पहिला पनि धनाढ्य होइन। हिँडेर जाने र हिँडेर आएकै मानिस हो।’
वरिष्ठ अधिवक्ता थापाले प्रधानन्यायाधीश राणाको इजलासमा पर्ने हेरक मुद्दामा शंका मात्रै हुने गरेको टिप्पणी गरे। ‘पुनरावलोकन परे त्यसैमा बागर्नेनिङ गरेको सुनिन्छ। इजलासमा परेको मुद्दामा खाली शंका मात्र हुन्छ, कसले मिलायो थाहा नै नहुने,’ थापाले भने।
राणाको इजलासमा पर्ने मुद्दाका पक्षले 'यो त पहिला के भइसकेको (मिलिसकेको)' भनेर भन्ने गरेको समेत सुनेको थापाले बताए। ‘उहाँ (राणा)को इजलासमा परेको मुद्दामा यो त पहिला के भइसकेको भनेर पक्षले भनेको समेत सुन्न परेको छ, के हो यो?’ थापाले भने।
प्रधानन्यायाधीश राणाले यसबीचमा उच्च अदालतका न्यायाधीश नियुक्ति गरेको समेत सुनेको थापाको भनाइ छ। तर, विविध कारणले अहिले सार्वजनिक गर्न नसकेको उनको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
