विश्वकप २०१८ समूह जी – बेल्जियम, पानामा, ट्युनिसिया, इंग्ल्यान्ड।
समूह 'जी' मा रहेको बेल्जियमको वर्तमान टिमलाई स्वर्णिम पुस्ता मानिएको छ। टिममा विश्वस्तरिय खेलाडीको जमघट छ। पछिल्लो समय बेल्जियम छनोट तथा मैत्रीपूर्ण खेलमा उत्कृष्ट खेलिरहेको पनि छ। तर बेल्जियम मुख्य प्रतियोगितामा भने चुक्दै आएको छ। स्वर्णिम पुस्ताको बेल्जियम टिमलाई यसपटको विश्वकपमा उत्कृष्ट खेल्नु पर्ने दबाब छ।
समूहमा बेल्जियम र इंग्ल्यान्डबीच हुने खेललाई महत्वपूर्ण मानिएको छ। दुई टिमबीच २८ जुनमा कलिनिङग्रेडमा प्रतिस्पर्धा हुनेछ। पछिल्लो समय इंग्ल्यान्डले पनि उत्कृष्ट खेल पस्किदै आएकाले खेल रोमाञ्चक हुने अपेक्षा गरिएको छ। दुवैलाई उपाधि जित्ने टिममा नराखिएपनि दुई टिमको खेलाडीको स्तर समान छ। किनकी बेल्जियमको राष्ट्रिय टिममा रहेका अधिकांस खेलाडी इंग्लिस प्रिमियर लिग खेल्छन्। त्यसैले दुवै टिमका खेलाडी एकअर्कासँग जानकार छन्।
पानामा पहिलो पटक विश्वकपमा छानिएको टिम हो। उसले पहिलो विश्वकपमा राम्रो छाप छोड्न युरोपियन टिमलाई टक्कर दिन सम्पूर्ण शक्ति खर्च गर्नेछ। यता ट्युनिसिया भने संकटमा परेको छ। उसका मुख्य स्ट्राइकर घाइते भएका कारण समूहका बलिया टिमसँग प्रतिस्पर्धा गर्न कठिन हुनेछ।
के तपाईलाई थाहा छ?
पानामा विश्वकपमा पहिलो पटक छनोट भएको टिम हो। उत्तर अमेरिका छनोटमा सन् २००६ मा ट्रिनिडाड एन्ड टोबाटो छानिएपछि विश्वकपमा छानिए पानामा नयाँ टिम हो।
सन् १९९८ को विश्वकपमा इंग्ल्यान्ड र ट्युनिसियाबीच प्रतिस्पर्धा भएको थियो। खेलमा इंग्ल्यान्डले २–० को जित हात पारेको थियो।
ट्युनिसियाले विश्वकपमा १२ खेल खेल्दा अहिलेसम्म एक खेलमा मात्र जित हात पारेको छ। सन् १९७८ मा ट्युनिसियाले मेक्सिकोलाई हराएको थियो। त्यसयता उसले विश्वकपमा जित हात पारेको छैन।
इंग्ल्यान्ड र बेल्जियमबीच अहिलेसम्म २१ पटक भिडन्त भएको छ। २१ मध्ये इंग्ल्यान्डले १ खेल मात्र हारेको छ। विश्वकपमा भने दुई टिमबीच दुई पटक प्रतिस्पर्धा भएको छ। सन् १९५४ मा खेल ४–४ गोलको बराबरीमा सकिएको थियो। १९९० मा भने इंग्ल्यान्डले बेल्जियमलाई हराएको थियो।
समूह 'जी'का चार टिमको विश्वकप इतिहास
बेल्जियम
बेल्जियम युरोप छनोटको समूह ‘एच’को विजेता बनेर १३औं पटक विश्व कपमा सहभागी भएको हो। यसपालिको विश्व कपमा युरोपबाट छनोट हुने बेल्जियम पहिलो देश हो। बेल्जियम सन् १९३० मा भएको विश्व कपको पहिलो संस्करणमा पनि सहभागी थियो। यसपछि बेल्जियमले १९३४, १९३८, १९५४, १९७०, १९८२, १९८६, १९९०, १९९४, १९९८, २००२ र २०१४ को विश्वकप खेल्यो। बेल्जियमको विश्व कपमा अहिलेसम्मको उत्कृष्ट प्रदर्शन भनेको १९८६ मा चौथो हुनु हो।
इंग्ल्यान्ड
इंग्ल्यान्ड १५औं पटक विश्व कपमा सहभागी हुँदैछ। फुटबलको जननी मानिने यो देश युरोप छनोट अन्तर्गत समूह ‘एफ’ को शीर्ष स्थानमा रहँदै छनोट भएको हो। इंग्ल्यान्डले १९८२ देखि लगातार विश्व कप खेलिरहेको छ। १९५० मा पहिलो पटक विश्व कप खेलेको इंग्ल्यान्डले १९५४, १९५८, १९६२, १९६६ र १९७० मा प्रतिस्पर्धा गरेको थियो। यसपछि उसले १९८२, १९८६, १९९०, १९९४, १९९८, २००२, २००६, २०१० र २०१४ मा पनि विश्व कप खेलिसकेको छ। इंग्ल्यान्ड १९६६ को विश्व विजेता पनि हो।
पानामा
पानामाले उत्तर अमेरिकी छनोटमा तेस्रो हुँदै पहिलो पटक विश्व कपको यात्रा तय गरेको हो। पानामाले अन्तिम खेलमा कोस्टारिकालाई २–१ ले पराजित गरेपछि अमेरिका भने ३० वर्षपछि विश्व कप खेल्नबाट वञ्चित भयो। विश्वकपमा पहिलो पटक छनोट भएको भोलिपल्ट पानामा सरकारले सार्वजनिक विदाको घोषणा गरेको थियो।
ट्युनिसिया
ट्युनिसियाले पनि पाँचौ पटक विश्व कपमा स्थान बनाएको हो। अफ्रिकी छनोटको समूह ‘ए’ को शीर्ष स्थान हात पारेपछि ट्युनिसियाले २००६ पछि विश्व कपको टिकट पक्का पर्यो। ट्युनिसियाले विश्व कपमा खासै प्रभाव जमाउन सकेको छैन। सन् १९७८ मा पहिलो पटक विश्व कप खेलेको ट्युनिसिया १९९८, २००२ र २००६ मा समूह चरणबाटै घर फर्किएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
