हजारौँ किलोमिटिर टाढाबाट
तिम्रो यो दारुण दशा हेर्न आएको थिइनँ
हिँउ मात्रैले पुरिएको मैदानबाट
यात्रा गर्नकै लागि मात्र
यात्रामा निस्किएको थिइनँ
म त तिम्रो हरियो अङ्कमालमा हराएर
तिमीसँगै विचरणको
उत्कट अभिलाषा बोकेर आएको थिएँ
सोचेको थिएँ,
मेरो आगमनलाई पर्खेर
तिमी दुलही बनेर बसेकी छ्यौ
मलाई स्वागत गर्न तिमीसँगै
सयौँ हजारौँ-
पुतलीहरू नाचिरहेछन्
वनफूलहरू फुलिरहेछन्
चिडियाहरू गाइरहेछन्
सोचेको थिएँ,
तिमीलाई भेट्न आउँदैछु भन्ने थाहा पाएपछि
ऋतुहरूले तिमीलाई सिँगारिरहेका होलान्
आकाशले ईन्द्रेणीको घुम्टो हालिदिएको होला
छेउछाउ बग्ने नदीहरूले तिम्रा पैतालामा
मिठो काउकुती लगाइरहेका होलान्
तर, सोचेकै थिइनँ
म आइपुग्दा तिमी यो हालतमा हुनेछ्यौ!
कहाँ हरायो तिम्रो जलराशिको मुस्कान?
कहाँ गए तिम्रा आँचलमा लुकामारी खेल्ने मृगहरू?
खोइ तिम्रा लहराहरूमा डुलिहिड्ने पुतलीहरू
खोइ तिम्रा शृङ्गारका सहेली
गोही, घडियाल, अजिङ्गरहरू
खोइ तिम्रा चञ्चल चिडियाहरू?
किन सुनिदैनन् किराकाँटीका धुनहरू
किन मुस्कुराएका छैनन् कमलफूलहरू
किन यति नाङ्गा र उदास छन् यी रूखका हाँगाहरू
हजारौँ किलोमिटिर टाढाबाट
तिम्रो यो दारुण दशा हेर्न आएको थिइनँ
उफ्फ!!!
कसले भरिरहेछ यसरी आफ्नै मृगौलामाथि पत्थर
किन थुनिरहेछ आफ्नै श्वासनलीको बाटो?
त्यति कठिन यात्राबाट आएको थिएँ
कसरी फर्कूँ तिमीलाई यस हालतमा छोडी?
म त समाहित हुनेछु तिम्रो धाँजा फाटेका छातीमा
तर मेरो यो अन्त्य र तिम्रो अवस्थाले
बाँकी समयको शुभ संकेत भने पक्कै गरेको छैन
प्रिय सिमसार!
म तिम्रो साइबेरियन चरो।
-अन्तराष्ट्रिय नेपाली साहित्य समाज (अनेसास) ले यसै वर्षदेखि सुरु गरेको 'अनेसास कविता महोत्सव-२०२१' मा प्रथम स्थान प्राप्त कविता। कविता महोत्सवको नतिजा बिहिबार सार्वजनिक गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790816682.webp)
-1786602170.png)
