काठमाडौं– कोरोना भाइरस (कोभिड १९) को संक्रमणका कारण रुपन्देहीमा १ जना पत्रकारको निधन भएको छ। नेपाल पत्रकार महासंघ लुम्बिनी प्रदेश समितिका कार्यसमिति सदस्य समेत विन्दुकुमार चौहानको कोरोना संक्रमणका कारण ५३ वर्षको निधन भएको हो।
कोरोना संक्रमणको लक्षण देखिएपछि होम आइसोलेसनमा रही संक्रमण भैसकेका पत्रकार चौहानको स्वास्थ्यमा एक्कासी समस्या आएपछि ५ दिनअघि भैरहवास्थित युसिएम अस्पतालमा भर्ना गरिएको थियो। उपचारका क्रममा फोक्सोमा समस्या आइ निमोनिया देखिएका चौहानको उपचारकै क्रममा मंगलबार राति २ बजेतिर निधन भएको नेपाल पत्रकार महासंघले जनाएको छ।
दिवंगत चौहानका श्रीमती, तीन छोरी र चार छोरा छन्। दुई दशकदेखि पत्रकारितामा सक्रिय चौहानले बुटवलस्थित लुम्बिनी दैनिकबाट पत्रकारिता सुरु गरेका थिए। २०६२/०६३ को जनआन्दोलनमा पत्रकारिताको माध्यमबाट सक्रिय भूमिका निर्वाह गरेका चौहान पछिल्लो समय एबीसी टेलिभिजन र बुटवल टुडेमा कार्यरत थिए।
पत्रकार महासंघले चौहानको निधनले नेपाली पत्रकारिता क्षेत्रले एक कुशल, उर्जाशील र जुझारु पत्रकार गुमाएको जनाएको छ। पत्रकार महासंघका महासचिव रोसन पुरीले चौहानको निधनप्रति दु:ख व्यक्त गर्दे शोक–सन्तप्त परिवार तथा आफन्तजनमा समवेदना व्यक्त गरेका छन्।
पत्रकार महासंघका अनुसार कोरोना भाइरसको संक्रमणका कारण हालसम्म २५ जना पत्रकारको निधन भएको छ। यस्तै १ हजारभन्दा बढी पत्रकार कोरोना संक्रमित भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
