काठमाडौं- सरकारले चीनबाट खरिद गरेको ४४ लाख डोज कोरोना विरुद्धको भेरोसेल खोप आगामी बिहीबार नेपाल आइपुग्ने भएको छ।
सरकारले चीनसँग पछिल्लो पटक ६० लाख डोज भेरोसेल खोप खरिद गरेको थियो, जसमध्ये १६ लाख डोज खोप भदौ ४ र ५ गते नै आइसकेको छ।
व्यवस्थापन महाशाखाका आपूर्ति शाखा प्रमुख उपेन्द्र ढुंगानाका अनुसार खोप लिनका लागि भदौ ३० गते हवाइजहाज चीन जाने र ३१ गते नेपाल आइपुग्ने गरी तयारी गरिएको छ।
नेपालमा यसअघि २४ लाख ४८ हजार डोज कोभिसिल्ड, ७४ लाख डोज भेरोसेल, १६ लाख डोज जोन्सन एन्ड जोन्सन, १७ लाख ७७ हजार ३२० डोज एस्ट्राजेनेका खोप आइसकेको छ।
त्यसबाहेक असोजमा गाभीमार्फत् १ लाख डोज फाइजर खोप आउने छ भने यसै वर्षको अन्त्यसम्म ६० लाख फाइजर, ४० लाख मोर्डना गरी एक करोड डोज खोप आउने बताइएको छ। फाइजर मंसिरसम्ममा आउने छ भने मोर्डना केही समयपछि आउने बताइएको छ।
नेपालमा हालसम्म १७ प्रतिशतले कोभिड विरुद्धको पूर्ण खोप र १९ प्रतिशतले पहिलो मात्रा खोप पाइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
