फाइल तस्बिर।
नेकपा (एमाले) विभाजित भई माधवकुमार नेपालले आफ्नो नेतृत्वमा नेकपा एकीकृत समाजवादी दर्ताका लागि निर्वाचन आयोगमा निवेदन दिएका छन्। सो पक्षमा लाग्ने नेताहरुलाई सनाखतका लागि आयोगले बुधबार बोलाएको छ। त्यसको दुई दिनअघि सोमबार एमाले अध्यक्ष केपी शर्मा ओलीले १० बुँदे सहमति कार्यान्वयन गर्ने भन्दै नेपालाई छोडेका नेताहरुलाई आश्वस्त पारेका छन्। सोमबारकै भेटमा भएको सहमति अनुसार मंगलबार स्थायी कमिटी बैठक बोलाइएको छ।
पार्टी अन्तरसंघर्षमा नेपाललाई लामो समयदेखि साथ दिएका नेताहरु ओलीले १० बुँदे सहमति कार्यन्वयन गर्न सहमत भएपछि नेपाललाई छोड्ने भएका छन्। नेपाललाई छोडेर एमालेमै रहन तयार भएका स्थायी कमिटी सदस्यमध्येका एक रघुजी पन्तसँग १० बुँदे कार्यान्वयन लगायतका विषयमा नेपाल लाइभका लागि वीरेन्द्र ओलीले गरेको कुराकानी :
तपाईंहरु माधवकुमार नेपाल बाहेकको एमाले बनाउन तयार हुनुभएको हो?
होइन। मैले आज अध्यक्षज्यूलाई विशेष आग्रह गरेको थिएँ। तपाईंले माधव कमरेडलाई भेट्नुस्। उहाँसहितका १४ जनालाई कारबाही फिर्ता लिएर वक्तव्य जारी गर्नुस्। हामीले उहाँ (माधव नेपाल)को पार्टी दर्ता प्रक्रिया रोक्न जान्छौँ। यसो गर्यो भने अझै पार्टी एकताको सम्भावना छ। यदि पार्टी फुट्यो भने अध्यक्षको हैसियतले सबैभन्दा धेरै दोष तपाईंले बोक्नुपर्छ। पार्टी मिल्यो भने श्रेय पनि तपाईंले पाउनुहुन्छ। त्यसैले आजै एकताको आह्वान गरौं भनेर भनेको थिएँ। हामी स्थायी कमिटीका नौ जना गएका थियौँ। अरु साथीहरुले पनि यही कुरा भन्नुभयो। तर, उहाँले भोलि स्थायी कमिटी बैठक बोलाउनुभएको छ। त्यही बैठकबाट गरौंला भन्नुभएको छ।
उहाँले १० बुँदे कार्यान्वयन गर्छु भन्नुभएको छ। त्यो लागू गर्ने वा नगर्ने भोलिको बैठकबाट सुरुवात हुने छ। स्थायी कमिटीमा प्रस्तावहरु कसरी आउँछन्। कसरी प्रस्तुत हुन्छन्? कतिपय कुराहरु व्यवहारमै हेर्नुपर्ने छ। परिस्थिति कसरी विकास हुन्छ हेर्नुपर्ने छ।
मेरो जोड अहिले पनि एमाले एकता नै हो। माधव नेपाल बिनाको एकता अधुरो हुन्छ। त्यसैले उहाँलाई अर्को पार्टी बनाउने प्रक्रियाबाट रोक्नुपर्छ। केपी कमरेडले कारबाही गर्नुभएकाले सबैभन्दा पहिले उहाँले नै त्यसलाई फिर्ता लिनुपर्छ। र, त्यसपछि माधव कमरेडले पार्टी दर्ताको प्रक्रियाबाट रोक्नुहुन्छ।
तपाईंहरुले पार्टीमा माधव नेपाललाई उचाल्नुभयो उचाल्नुभयो तर अन्तिममा छोडेर केपी ओलीतिर लाग्नुभयो भयो है?
एउटा कुरा प्रष्टसँग भन्छु। रघुजी पन्तले माधव नेपाललाई पार्टी विभाजन गर्नुपर्छ भनेर उचालेको छैन। पार्टी फुट्नुपर्छ, सांसदबाट राजीनामा गर्नुपर्छ भन्ने विषय स्थायी कमिटी बैठकमा आउँदा मैले त्यसको प्रतिवाद गर्थें। त्यो गर्ने बेला भएको छैन भनेरै वकालत गर्थें। पार्टी विभाजन र संसद्बाट राजीनामा गर्ने होइन, पार्टीमा बस्नै नसक्ने स्थिति भएमा त्यो बाध्यात्मक स्थिति हो भन्ने विषयमा मेरो सुरुदेखिको अडान थियो। मैले पार्टी विभाजनको कहिल्यै वकालत गरिनँ।
तपाईंले सार्वजनिक रुपमा पार्टी फुट्नुपर्छ भनेर बोलेको देखाउन सक्नुहुन्छ? मैले माधव कमरेडलाई एक्लै भेटेर हातै जोडेर पार्टी विभाजन नगर्नुस् भनेको थिएँ। त्यसमा केपी ओलीले पनि त्यस्तै खालको शब्दावली प्रयोग गर्नुभयो।
कुनै बेला नेताले आँट पनि गर्नुपर्छ, कतिपय विषयमा भनेको सहनु पनि पर्छ। पार्टी विभाजनको पक्षमा नलागौं भनेर पटकपटक मैले आग्रह गरेको थिएँ। स्थायी कमिटीका धेरै नेताहरुले भन्दाभन्दै पनि उहाँले सुन्नुभएन। एउटा कुरा प्रष्टसँग भन्छु- रघुजी पन्तले माधव नेपाल छोडेको होइन। बरु माधव नेपालले रघुजी पन्त र उहाँलाई साथ दिँदै आएका साथीहरुलाई छोड्नुभयो। छोडेर 'जम्प' गर्नुभयो। किन गर्नुभयो, त्यो उहाँलाई नै सोध्नुहोस्।
माधव नेपाल नेतृत्वको पार्टी केन्द्रीय सदस्यको सनाखत गर्न निर्वाचन आयोगले बुधबार बोलाएको छ। आज भएको भनिएको सहमति त्यसलाई रोक्न ओलीको चालबाजी हो भन्ने लागेको छैन?
कसको मनमा के छ, कसको के चालबाजी छ भन्नेतिर शंका गर्न लागेको छैनौं। हामीले उठाएको विषयलाई इमान्दारितापूर्वक पालना गर्नुपर्छ। यो पार्टी अध्यक्षले कारबाही फिर्ता गरेर एकताको आह्वान गर्नुभयो भने दर्ता भएको पार्टीलाई रोक्न पनि सकिन्छ। अध्यक्षले मनबाट एकता चाहेको हो वा होइन भन्ने कुरा मुख्य हो। यदि मनदेखि नै एकता चाहेको हो भने पार्टी एकताका सम्भावनाहरु छन्। माधव नेपालले नयाँ पार्टी बनाइहाल्ने भन्ने कुरा छोड्नुपर्ने हुन्छ। दुवैले आ–आफ्नो हठबाट पछाडि नहट्दा गाह्रो हुन्छ।
एकताका लागि पहल गर्ने फेरि पनि पार्टी अध्यक्षले नै हो। पार्टी दर्ता गर्नुभन्दा अघि नै कारबाही गर्न त पाइँदैन। कसैले गल्ती नै नगरेपछि त्यो गल्तीको सजाय दिन मिल्दैन। तपाईं (केपी ओली)ले कारबाही गर्नुभयो, त्यसपछि उहाँ(माधव नेपाल) पार्टी दर्ता गर्न जानुभयो भनेर रिसाउनु हुँदैन।
माधव नेपाल पक्षमा तपाईंहरुलाई सनाखत गर्नबाट रोकेर केपी ओलीले पुरानै व्यवहार दोहोर्याए र १० बुँदे कार्यान्वयन गरेनन् भने त्यसपछि के गर्ने भन्ने विषयमा तपाईंहरुले सोच्नुभएको छ?
अहिले त्यसरी सोचिएकै छैन। १० बुँदे सहमतिका विषय हामीहरुले एकतर्फी रुपमा बनाएका होइनौं। उहाँ (केपी ओली) ले १० बुँदे कार्यान्वयन गर्छु भनेर सार्वजनिक रुपमा भन्नुभएको छ। हामीले एकताका लागि प्रयत्न गर्ने हो। पार्टी फुटाउनका लागि नेताहरु जुनसुकै बेला स्वतन्त्र हुन्छन्। पार्टीमा बस्न मन लागेन भने निस्केर जान स्वतन्त्र हुन्छन्। एउटा दल मन परेन भने अर्को दलमा जान सक्ने नागरिकको अधिकार हो। त्यसमा कसैले कसैलाई रोक्न सकिन्छ र?
तर, केपी ओलीले पटकपटक सहमति गर्ने र त्यसलाई उल्लघंन गर्ने शैलीबारे त तपाईंहरु जानकार हुनुहुन्छ नि?
त्यो आरोप उहाँमाथि चौतर्फी रुपमा लागेको छ। आरोपलाई आफ्नो व्यवहारबाट इमान्दारितापूर्वक खण्डन गर्ने जिम्मेवारी पार्टी अध्यक्षकै हो।
अध्यक्ष केपी ओलीले आफू निकटका नेताहरुसँगको भेटमा तपाईंहरुलाई नै लक्षित गर्दै 'पिलो निचोरियो, खिल बाँकी रहने भयो' भनेर व्यंग्य गर्नुभएछ नि?
खै हामीलाई भन्या हो कि कसलाई भन्या हो थाहा छैन। सार्वजनिक रुपमा बोल्दा हाम्रो पनि गल्ती हुन्छन्। भाषणपिच्छे अरुलाई घोच्ने कुराले गतिलो नेता हुन सकिँदैन।
भोलिको स्थायी कमिटीमा पूर्वमाओवादी नेताहरु सहभागी हुन्छन् कि हुँदैनन्?
जेठ २ गतेको एमालेको बैठक बोलाउन भनिएको हो। त्यो बैठकमा केके हुन्छ ग्यारेन्टी गर्न सक्दिनँ। हुनुपर्ने पूर्वमाओवादी बाहेकका एमाले स्थायी कमिटी बैठक हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1747468907.jpg)
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
