बस्तीमा एकाबिहानै हल्ला भयो–
ईश्वरको कुरुप लास
शौचालयमा भेटियो रे!
कसैले भन्यो–
कारागारबाट फरार कैदीले
ठीक निधारमै ताकेर गोली हानेको हो!
कसैले भन्यो–
गजेडी युवकले ढुङ्गैढुङ्गाले हिर्काएर ईश्वरलाई मार्यो!
कसैले भन्यो–
बलात्कृत युवतीले
आफ्नै सुरुवालको इजार फुकालेर
ईश्वरको घाँटी थिचिन्!
कसैले भन्यो–
गोठालो गइरहेको अबोध बालकले
खाजा खान नपाएको रिसले
ईश्वरलाई मार्यो!
कसैले भन्यो–
लेनदेन नमिलेपछि वेश्याले ईश्वरको लिङ्ग काटेर
रामनाम सत्य पारी!
कसैले भन्यो–
आजन्म मन्दिर कुर्दाकुर्दै थाकेको भक्तले
ईश्वरको सफाया गर्यो!
कसैले भन्यो–
ईश्वरसँग नास्तिक कविको दुश्मनी थियो
र/कविले ईश्वरलाई किचिमिची पार्यो!
कसैले भन्यो–
ईश्वरको भरियासँग बाटोमा भनाभन भएको थियो
र/भरियाले ईश्वरलाई भीरबाट खसाल्यो!
कसैले भन्यो–
व्यापारीसँग ईश्वरको साँठगाँठ थियो
र/व्यापारीले कन्ट्याक्ट किलरमार्फत
ईश्वरको अन्त्य गर्यो।
कसैले भन्यो–
ईश्वर प्रतिपक्षीसँग मिलेर कुनै गुप्त योजना बनाउँदै थियो
र/सत्तापक्षले ईश्वरलाई नष्ट गर्यो।
कसैले भन्यो–
ईश्वरलाई आतंककारीहरुले एम्बुसमा पारे
कसैले भन्यो–
ईश्वर पक्षधरताको वकालत गर्थ्यो
त्यसैले कुनै उत्पीडित समुदायले ईश्वरलाई समाप्त पार्यो।
कसैले दलितद्वारा ईश्वर मारियो भन्यो
कसैले ब्राम्हणद्वारा नै ईश्वर खत्तम पारियो भन्यो
कसैले के भन्यो/कसैले के भन्यो!
कसैले भन्यो–
ईश्वर रक्सीले मातेर आएको थियो
र/पिसाब फेर्दाफेर्दै आफैँ ढल्यो!
कसैले भन्यो–
ईश्वर बिरामी थियो!
कसैले भन्यो–
ईश्वर पागल थियो!
कसैले भन्यो–
ईश्वर कामुक थियो!
कसैले भन्यो–
ईश्वर पतित थियो र/विधवा आइमाईले कोठामा थुनेर
ईश्वरको हत्या गरेको हो!
अकस्मात्–
कोही भिडमा देखियो
र/भन्यो–
ईश्वर मरेको होइन
भुस्याहा कुकुर मरेको हो!
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
