फाइल तस्वीर
काठमाडौं– कोरोना भाइरस संक्रमणको तेस्रो लहर (फेज)विरुद्धको तयारीअन्तर्गत सरकारले बालबालिकाहरुका लागि भेन्टिलेटरसहितका आईसीयू बेड थेप्ने कार्य अगाडि बढाइएको जनाएको छ।
स्वास्थ्य तथा जनसंख्या मन्त्रालयले एक विज्ञप्ति जारी गर्दै बालबालिकाहरूका लागि १८० भेन्टिलेटर सहितको २५० वटा आईसीयू बेड थप्ने कार्य अगाडि बढाइएको जनाएको हो।
केही दिन अगाडि नै असोज दोस्रो सातादेखि नेपालमा कोरोना संक्रमणको तेस्रो लहर सुरु हुनसक्ने भनेको मन्त्रालयले देशभर हाइ डिपेन्डेन्सी युनिट (एचडीयु) बेडहरु पनि विस्तार गरिन लागिएको जनाएको छ।
मन्त्रालयका प्रवक्ता डा कृष्ण प्रसाद पौडेलले शुक्रबार जारी गरेको विज्ञप्तीमा देशभर थप १ हजार ४०० एचडीयु बेडहरु विस्तार गर्न लागिएको जनाइएको छ। हाल देशभरका सरकारी अस्पतालहरूमा २ हजार ७५ र निजी अस्पतालमा ७७८ एचडीयु बेड सञ्चालनमा रहेका मन्त्रालयले जानकारी दिएको छ।
मन्त्रालयले भेन्टिलेटरहरुको संख्या ९०४ पुर्याइएको र १८० थप गर्ने प्रक्रियामा रहेको छ पनि जानकारी दिएको छ।
कोरोना संक्रमितको उपचारमा अत्यावश्यक पर्ने मेडिकल अक्सिजनको आपुर्ति सुदृढ गर्नका लागि सरकारले सघन कार्यहरूमार्फत ५ हजार ५०० अक्सिजन कन्सट्रेटर ल्याइसकेको मन्त्रालयले जानकारी दिएको छ। थप ३ हजार ५०० अक्सिजन कन्सट्रेटर आउने क्रममा रहेको मन्त्रालयको दाबी छ।
यस्तै, ६ हजार ३ सय ७७ अक्सिजन सिलिण्डर थप गरिएको छ तथा १९ वटा अक्सिजन प्लाण्ट, २७ वटा अक्सिजन ट्यांक थप गर्ने योजना अन्तर्गत २ वटाको कार्य सम्पन्न भइसकेको प्रवक्ता डा पौडेलले जारी गरेको विज्ञप्तिमा उल्लेख छ।
'सम्भावित तेश्रो लहर रोक्न र त्यसबाट हुन सक्ने क्षति कम गर्न हामी सबैको सामूहिक प्रयास र हाम्रा गतिविधिहरुमा जनस्वास्थ्यको मापदण्डको पालनाको महत्वपुर्ण भूमिका हुने पनि पुनः स्मरण गराउन चाहन्छौ,' मन्त्रालयले विज्ञप्तिमा भनेको छ।
सरकारले यसअघि नै चैतसम्म उमेरअनुसार खोप लगाउन मिल्ने सबै नेपालीलाई कोरोनाविरुद्धको खोप लगाइने घोषणा गरेको थियो। हालसम्म भारत, चीन तथा अमेरिकाबाट खरिद र अनुदानबाट गरी ९७ लाख ८२ हजार ८५० डोज खोप प्राप्त भएको र खोप अभियान जारी रहेको मन्त्रालयको विज्ञप्तीमा जनाइएको छ।
यस्तै, चीनको सिनोफार्मा कम्पनीसँग ६० लाख डोज खोप खरिदको सम्झौता अगाडि बढिसकेको मन्त्रालयले जानकारी दिएको छ। कोभ्याक्स सुविधाअन्तर्गत जापान सरकारले अनुदानमा उपलब्ध गराउने १६ लाख डोज र भारतबाट खरिदको बाकि १० लाख डोज प्राप्त हुँदा असोज मसान्त भित्र कुल १ करोड ८३ लाख ८२ हजार ८५० डोज प्राप्त हुने आकलन गरिएको मन्त्रालयको विज्ञप्तिमा उल्लेख छ।
कोभ्याक्सबाट लागत सहभागितामा खरिद गरि १ करोड ५० लाख डोज र १२ वर्ष माथिका बालबालिकालाई ६० लाख डोज फाइजर खोपका लागि पनि सकारात्मक रुपमा कार्य अगाडि बढिरहेको मन्त्रालयले जानकारी दिएको छ। गाभी कोभ्याक्सबाट निःशुल्क २० प्रतिशत जनसंख्याको लागि प्राप्त हुने १ करोड १३ लाख डोज पनि क्रमशः प्राप्त हुँदै जादा चैत्र मसान्तसम्म सम्पूर्ण नेपालीहरुको पहुचमा खोप पुग्ने मन्त्रालयको दाबी छ।
मन्त्रालयले खोप आयात गर्न इच्छुक निजी क्षेत्रलाइ विश्व स्वास्थ्य संगठन र नेपालको नियामक निकाय औषधि व्यवस्था विभागबाट आकस्मिक प्रयोग अनुमति प्राप्त कुनै पनि खोपहरु उत्पादन मूल्य र आयात खर्चमा अधिकतम १० प्रतिशतसम्म मुनाफा लिएर सरकारले तोकेको प्राथमिकताको समुहलाई लगाउन मिल्ने गरी स्वीकृति दिइसकेको मन्त्रालयले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
