काठमाडौं- नेपालमा थप दुई हजार २३७ जनामा कोरोना भाइरसको संक्रमण पुष्टि भएको छ।
गत २४ घण्टाको अवधिमा देशभर गरिएको पीसीआर तथा एन्टिजेन परीक्षणका क्रममा आइतबार थप दुई हजार २३७ जनामा संक्रमण पुष्टि भएको हो।
स्वास्थ्य तथा जनसंख्या मन्त्रालयका अनुसार गत २४ घण्टाको अवधिमा देशभरका विभिन्न प्रयोगशालामा गरी १० हजार ५६९ जनाको आरटी-पीसीआर विधिबाट नमूना परीक्षण गरिएको थियो। पीसीआर विधिबाट नमूना परीक्षण गरिएकामध्ये एक हजार ५३९ जनामा संक्रमण पुष्टि भएको मन्त्रालयले जनाएको छ।
यस्तै, सोही अवधिमा देशभरका विभिन्न प्रयोगशालामा गरी तीन हजार २६५ जनाको एन्टिजेन परीक्षण गरिएकोमा ६९८ जनामा कोरोना संक्रमण पुष्टि भएको मन्त्रालयले जानकारी दिएको छ।
यससँगै हालसम्म नेपालमा पीसीआर परीक्षणबाट संक्रमण पुष्टि हुनेको संख्या छ लाख ८० हजार ५५६ र एन्टिजेन परीक्षणमार्फत पुष्टि हुने ५४ हजार २४३ जना पुगेको छ।
कूल संक्रमितमध्ये हालसम्म ६ लाख ४३ हजार ६१५ जना कोरोना भाइरसको संक्रमणबाट मुक्त (निको) भएका मन्त्रालयले जानकारी दिएको छ।
थप १८ जनाको मृत्यु
गत २४ घण्टाको अवधिमा थप १८ जना कोरोना संक्रमितको मृत्यु भएको मन्त्रालयले जानकारी दिएको छ। यससँगै नेपालमा कोरोना संक्रमणबाट मृत्यु हुनेको संख्या नाै हजार ७१३ पुगेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
