काठमाडौं- अमेरिकाले उपलब्ध गराएको एक डोज मात्र लगाए पुग्ने जोनसन एण्ड जोनसनको काेराेनाविरुद्धकाे खोप लगाउन सरकारले प्राथमिकता निर्धारण गरेको छ।
स्वास्थ्य तथा जनसंख्या मन्त्रालयले उक्त खोप ५० देखि ५४ वर्ष उमेर समूहलाई लगाइने जानकारी दिएकाे हाे।
यस्तै, मन्त्रालयले उक्त खोप पूर्ण र अति अशक्त अपाङ्गता (वर्ग क र ख) भएका नागरिकहरु, नेपालमा बसोबास गरिरहेका शरणार्थीहरु र यसअघि छुटेका स्वास्थ्य संस्थामा कार्यरत स्वास्थ्यकर्मी र सरसफाइकर्मीहरुलाई समेत दिने निणर्य गरेको छ।
कतार एयरवेजको नियमित उडानमार्फत् अमेरिकाले कोभ्याक्स कार्यक्रममार्फत् दिएकाे १५ लाख ३४ हजार ८५० डोज खोप साेमबार नेपाल आइपुगेकाे हाे।
खोप त्रिभुवन अन्तर्राष्ट्रिय विमानस्थलमा अमेरिकी राजदूत र्याण्डी बेरीले स्वास्थ्य तथा जनसंख्यामन्त्री कृष्णगोपाल श्रेष्ठलाई हस्तान्तरण गरेका थिए।
परिवार कल्याण महाशाखाका बाल स्वास्थ्य तथा खोप शाखा प्रमुख डा झलक शर्मा गौतमले जोन्सनको खोप कहिलेदेखि लगाउन सुरु गर्ने भन्ने निर्णय गर्न बाँकी रहेको बताए।
‘जोन्सनको खोप आज मात्र आइपुगेकोले खोप ढुवानी र अन्य तयारी गर्न बाँकी छ। तर छिटै सुरु गर्छौं। भेरोसेल खोप संचालन भइरहेका प्रदेशमा एकै पटक जोन्सनको खोप लगाउन सुरु गर्दैनौं। भोलिदेखि बागमति, गण्डकी र लुम्बिनी प्रदेशमा भेरोसेल खोप लगाउन सुरु हुन्छ,’ उनले भने।
यता, सरकारले चीनबाट खरिद गरेको भेरोसेल खोप ५५ वर्षभन्दा माथिका नागरिक,सार्वजनिक यातायातका चालक र सहचालक,विश्विविद्यालय र विद्यालयका शिक्षक/कर्मचारीलाई खोप दिने जनाएकाे छ।
पूर्ण र अति अशक्त अपांगता (वर्ग क र ख) भएका नागरिकहरुले खोप लिनका लागि सरकारले जारी गरेको प्रमाणपत्र देखाउनुपर्ने हुन्छ।
५५ वर्षदेखिका नागरिकले नागरिकता वा अन्य कुनै परिचय खुल्ने कागजका आधारमा खोप लगाउन पाउने स्वास्थ्य सेवा विभागले जनाएको छ। कुनै प्रमाण नभएमा स्थानीय तहले प्रमाणित गरेको कागाजात पेस गर्नुपर्ने हुन्छ।
सार्वजनिक यातायातका चालक, सहचालकहरुको हकमा आधिकारिक परिचय पत्र र सवारी साधन नम्बरसहित व्यवसायी संघबाट तथ्यगत विवरण पेस गर्नुपर्ने हुन्छ।
यस्ता विवरण प्रमुख जिल्ला अधिकारीले प्रमाणित गर्नुपर्ने हुन्छ। विश्वविद्यालय र विद्यालयका शिक्षक तथा कर्मचारीहरुको हकमा सम्बन्धित संस्थाको आधिकारिक परिचय पत्र पेस गर्नुपर्ने हुन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
