काठमाडौं- अमेरिकाबाट कोभ्याक्स सुविधा अन्तर्गत जोन्सन एन्ड जोन्सनद्वारा उत्पादित १५ लाख ३४ हजार डोज कोरोनाविरूद्धको खोप नेपाल आउने भएको छ। बेलायती समाचार संस्था रोयटर्सले अमेरिकी राष्ट्रपति कार्यालय ह्वाइट हाउसका अधिकारीलाई उद्धृत गर्दै शुक्रबार खोप पठाउन लागेको जानकारी दिएको हो।
रोयटर्सको समाचारमा अमेरिकी सरकारले नेपाललाई १५ लाख डोज जोन्सन एन्ड जोन्सन र भुटानलाई मोडेर्ना कम्पनीले उत्पादन गरेकाे ५ लाख डोज काेराेनाविरुद्धकाे खोप पठाउन लागेको उल्लेख छ।
यसअघि अमेरिकाले कोभ्याक्स सुविधा अन्तर्गत अनुदानमा अमेरिकी फर्मास्युटिकल कम्पनी जोन्सन एन्ड जोन्सनद्वारा उत्पादित ‘जेन्सेन एडी २६.सिओभी.२’ खोप नेपाल पठाउने जानकारी दिएको थियो।
अहिलेसम्म नेपालमा भारत र चीनबाट ल्याइएका खोप दुई डोज लगाउनु पर्ने खालका छन्। तर, यो खोप एक डोज मात्र लगाए पुग्ने विज्ञहरुले बताएका छन्।
१५ लाख ३४ हजार ८५० डोज खोप आउने पक्का भएपछि स्वास्थ्य मन्त्रालयले आयात अनुमतिका लागि औषधि व्यवस्था विभागमा पत्रसमेत पठाएको थियाे।
नेपालमा कोभ्याक्स सुविधा अन्तर्गत हालसम्म अक्सफोर्ड एस्ट्राजेनेको सहयोगमा भारतको सेरम इन्टिस्च्यूटले उत्पादन गर्दै आएको कोभिसिल्ड खोप ३ लाख ४८ हजार डोज आएको छ।
जोन्सन एन्ड जोन्सनको खोप नेपाल कहिले आइपुग्छ?
स्वास्थ्य तथा जनसंख्या मन्त्रालयका एक कर्मचारीका अनुसार खोप छिट्टै आइपुग्ने जानकारी आए पनि यति गते नै आउँछ भन्ने निश्चित भइसकेको छैन।
'सम्भवत: सोमबार वा अर्को साताभित्र आइसक्ने जानकारी आएको छ,' ती कर्मचारीले भने, 'यति गते नै भनेर निश्चित नभए पनि अबको सातदिन भित्र आइसक्छ भन्ने कुरा छ।' उनले सोही अनुसार मन्त्रालयले खोप आएपछि भण्डारण लगायतका विषयमा तयारी गरिरहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
