काठमाडाैं- कोरोना भाइरसको संक्रमणदर घटे पनि जोखिम हटिनसकेको जनाउँदै काठमाडाैं उपत्यकामा भोलिबाट थप एक साताका लागि निषेधाज्ञा जारी गरिएको छ। काठमाडाैं, भक्तपुर र ललितपुरका प्रमुख जिल्ला अधिकारीहरुको संयुक्त बैठकले उक्त निर्णय गरेको हो।
थपिएको निषेधाज्ञा अवधिमा खाद्यान्न पसल दिनभर खोल्न दिने, सार्वजनिक सवारीसाधन जोरबिजोर प्रणालीमा सञ्चालन गर्नेलगायत खुकुलो व्यवस्था गरिएको छ। यद्पि, सभा सम्मेलन, भोज, विवाहलगायत कार्य तथा मनोरञ्जन, होटल, पार्टी प्यालेस, शिक्षण संस्थालगायत क्षेत्रमा जारी कडाइलाई निरन्तरता दिइएको छ।
असार १५ देखि २१ गतेसम्म लागू हुने निषेधाज्ञामा यी कार्यहरु सञ्चालन गर्न नपाइने जिल्ला प्रशासन कार्यालय काठमाडौंद्वारा जारी गरिएको आदेशमा उल्लेख छ:
सञ्चालन गर्न नपाइने कार्यहरुः
१. सभा सम्मेलन, व्यवसाय तथा नित्य पूजाको हकमाः
क. सबै प्रकारका सभा, सम्मेलन, गोष्ठी, तालिम, सेमिनार, सिनेमा हल, पार्टी प्यालेस, डान्सबार, दोहोरी, नाचघर, क्लब, स्वीमिङ पुल, मनोरञ्जन स्थल, सैलून, ब्युटी पार्लर, हेल्थ क्लब, फुटसल, जिमखाना, पुस्तकालय, संग्रहालय, चिडियाखाना, रंगशालामा हुने दर्शक सहितको खेलकुद र मानिसहरुको भीडभाड हुने अन्य कार्यक्रम सञ्चालन गर्न नपाउने।
ख. खुला स्थानमा मानिसहरु भेला जम्मा हुन, भीडभाड गर्न, सभा जुलुस, जात्रा, महोत्सव, भोजभतेर आदि गर्न/गराउन नपाउने।
ग. विवाह, व्रतबन्ध तथा सामूहिक रुपमा गरिने सांस्कृतिक कार्यहरु होटल तथा पार्टी प्यालेसमा गर्न नपाउने।
घ. पुजारीबाट हुने नित्य पूजाबाहेकका अन्य धार्मिक तथा साँस्कृतिक गतिविधिहरु सञ्चालन गर्न नपाउने।
२. शैक्षिक संस्थाहरु (विद्यालय, कलेज, ट्युसन सेन्टर, तालिम केन्द्र) ले भौतिक उपस्थितिमा पठनपाठन तथा परीक्षाहरु सञ्चालन गर्न गराउन नपाउने।
३. सवारीसाधन उपत्यका आवतजावतको हकमाः
क. अत्यावश्यक सामग्री बोकेका ढुवानीका सवारीसाधन, बिरामी तथा कुरूवा (२ जना) बोकेका एम्बुलेन्स, स्वास्थ्यकर्मी, पशु स्वास्थ्यकर्मी तथा सुरक्षा निकायले प्रयोग गर्ने सवारीसाधन र अन्य जिल्लाबाट सवारी पास लिई आएकाबाहेक अन्य सवारीसाधन काठमाडौं जिल्लाभित्र प्रवेशमा रोक लगाउने।
ख. अत्यावश्यक कार्य जस्तै: मृत्यु संस्कार, बिरामी तथा कुरुवालगायतका कार्यका लागि उपत्यकाबाहिर जान सम्बन्धित स्थानीय तहको सिफारिससहित जिल्ला प्रशासन कार्यालयमा निवेदन पेश गरेमा अन्तरजिल्लामा आवतजावत गर्न सहजीकरण गरिने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
