काठमाडौं– चैतको अन्तिम सातादेखि नेपालमा कोरोनाको दोस्रो लहर शुरु भइसकेको थियो। विस्तारै कोरोना संक्रमितको संख्या बढ्दै थियो। त्यही मौका छोपेर ओम सर्जिकल कन्सर्न प्रालिले मेडिकल सामाग्रीको सामानमा कालोबजारी शुरु गरेको थियो।
ओम सर्जिकल कन्सर्नका सञ्चालक ह्याम्स अस्पतालका मालिक पनि हुन्। अस्पतालका मालिक रामशरण (आरएस) भण्डारीको ओम सर्जिकलले मेडिकल सामान आयातमा भन्सार छली गरेको विषय उजागर भएको थियो। उजुरीकै आधारमा राजस्व अनुसन्धान विभागले ओम सर्जिकलमा छापा मारेको थियो।
छापा मार्दै विभागले ओम सर्जिकलले राजस्व छली गरेको प्रमाण फेला पारेको छ। विभागले १ करोड ६ लाख ७२ हजार ९ सय ९ रुपैयाँ विगो जफत एवम् असुल गरी जरिवान र कैद सजाय माग गर्दै उच्च अदालतमा मुद्धा दर्ता गराएको छ। अदालतमा मुद्दा बिचाराधीन छ।
एकातिर राजस्व छलीको मुद्दा चलिरहेको छ भने अर्कोतर्फ भण्डारीकै लगानी रहेको ह्याम्स अस्पतालले पीसीआर परीक्षणका नाममा सरकारले तोकेकोभन्दा बढी शुल्क लिइरहेको छ। अस्पतालले कोरोना परीक्षणका लागि गरिएको नमूना संकलनमा सरकारले तोकेको भन्दा दोब्बर शुल्क लिँदै आएको भेटिएको छ।
अस्पतालले पीसीआर परीक्षण शुरु गरे देखिनै तोकिएकोभन्दा बढी शुल्क उठाउँदै आइरहेको छ।
पछिल्लो समय अस्पतालले घरमै गएर नमूना संकलन गरेवापत प्रतिव्यक्ति ५ सय रूपैयाँ बढी रकम असुल्दै आइरहेको छ। अस्पतालले हरेक दिन औषतमा २५० जनाभन्दा बढीको कोरोना परीक्षण गरिरहेको छ। पछिल्लो दिनको तथ्यांक हेर्दा अस्पतालमा एकैदिन ५०० जनाभन्दा बढीको परीक्षण समेत भएको देखिन्छ। जसमध्ये अस्पतालले धेरै नमूना घरमा गएर संकलन गर्न थालेको छ।
अस्पतालका एक कर्मचारीका अनुसार औषतमा दैनिक करिब एक सय जना जतिको नमुना घरमा पुगेर संकलन हुने गरेको छ। यो आधारमा हेर्दा अस्पतालले घरमा गएर मात्र नमुना संकलन गरेबापत दैनिक ५० हजार रकम बढी असुलिरहेको देखिन्छ।
यस्तै, अस्पतालमा नै गएर पीसीआर परीक्षण गर्नेसँग पनि सर्भिस चार्जका नाममा अस्पतालले थप ४ सय रुपैयाँ असुल्दै आइरहेको छ। अस्पतालले हालसम्म ९६ हजार ४८० जनाको पिसिआर परीक्षण गरेको छ।
'परीक्षण गरिएका ९६ हजार ४८० नमुनामध्ये अस्पतालले देखि ८० हजारभन्दा बढी नमुनामा तोकेककोभन्दा रकम असुलेको छ', अस्पतालकै एक कर्मचारीले भने, 'यो आधारमा हिसाब गर्ने हो भने अस्पतालले परीक्षणमा मात्रै करोडभन्दा बढी रकम असुलेको देखिन्छ।'
पीसीआर परीक्षणका क्रममा अस्पतालले तोकेको भन्दा बढी रकम लिएको बिल–
सरकारले पीसीआर परीक्षणका लागि २ हजार रुपैयाँ शुल्क तोकेको छ। यस्तै, घरमा गएर नमुना परीक्षण गरे उक्त शुल्कमा थप ५ सय रुपैयाँ लिन पाउने नियम छ। तर, ह्यामसले भने ५ सयको ठाउँमा एक हजार रकम असुल्दै आइरहेको छ।
परीक्षणमा मात्र नभइ अस्पतालले उपचारमा पनि बिरामीसँग अत्यधिक शुल्क लिँदै आइरहेको विषय बाहिर आइरहेको छ।
घरमै पीसीआर परीक्षणका लागि नमूना संकन गर्नेसम्बन्धी प्रोटोकल–
रजस्व छलीको मुद्दा
राजस्व अनुसन्धान विभागले भण्डारी नै सञ्चालक रहेको कम्पनी ओम सर्जिकलमा सर्जिकलका प्रतिनिध र भन्सार प्रतिनिधि समेत गरी ४ जनालाई राजस्व चुहावट गरेको प्रमाण फेला पारेपछि मुद्दा दर्ता गरेको हो।
विभागको अनुसन्धानबाट ह्याम्स अस्पतालका मालिक आरएस भण्डारीका भाई दलबहादुर भण्डारी तथा भन्सार प्रतिनिभि रामबाबु जमकटेलको आपासी मिलेमतोमा न्यूनतम मूल्यको गलत घोषण गरी राजस्व चुहावट गरेको फेला परेको थियो।
उनीहरुले वास्तविकभन्दा फरक मालबस्तुको भन्सार घोषणा गरी आफूलाई फाइदा र नेपाल सरकारलाई हानी नोक्सानी पुर्याउने मनासयमा राजस्व चुहावट गरेको भन्दै मुद्धा दर्ता गरिएको विभागले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
