काठमाडाैं- संस्कृति, पर्यटन तथा नागरिक उड्डयन मन्त्रालयले क्वारेन्टिनस्थलको रुपमा प्रयोग गर्ने होटलको न्यूनतम मापदण्ड ताेकेकाे छ। नेपाली तथा विदेशी नागरिकहरू विदेशबाट नेपाल आउँदा पालन गर्नुपर्ने मापदण्ड, २०७८ मा व्यवस्था गरिए अनुसार होटलको १० न्यूनतम मापदण्ड ताेकिएकाे हाे।
मन्त्रालयका महानिर्देशक रूद्रसिंह तामाङका अनुसार क्वारेन्टिनस्थलको रुपमा प्रयोग गर्ने होटल कम्तीमा २० कोठा भएको हुनुपर्नेछ।
यसका साथै स्वास्थ्यसम्बन्धी तोकिएको मापदण्ड पालना गर्ने गरी होटल परिसरको छुट्टै गेट वा कम्पाउण्ड भएको र सकेसम्म घुमफिर गर्न सक्ने खुला ठाउँ र बँगैचा भएको हुनुपर्ने छ।
यस्तै, होटल क्वारेण्टिनमा रहेका हवाई यात्रुहरुलाई सेवा प्रदान गर्न (खाना, पानी, अन्य लजिटिक सपोर्ट)र स्वाव परीक्षणको नमूना संकलनको लागि पर्याप्त खुला ठाउँ भएको हुनुपर्ने मापदण्डमा उल्लेख छ।
होटलको कोठामा टीभी, वाइफाई अनिवार्य भएको हुनुपर्ने छ। होटलको कोठामा अट्याच ट्वाइलेट र नुहाउन तथा पिउन तातो पानीको व्यवस्था भएको हुनुपर्ने छ।
यस्तै, होटलमा खाना र अन्य सेवाहरु कोठामा वा प्यासेजमा मात्र प्रदान गर्ने व्यवस्था भएको हुनुपर्ने छ। होटलको प्रत्येक प्रस्थान कक्षमा सावुनपानीले हात धुने व्यवस्थाका साथै सेनिटाइजरको व्यवस्था भएको हुनुपर्ने छ।
मापदण्डमा होटलले प्रदान गर्ने सेवाहरु सामूहिक रुपमा खाना खाने स्थल, बुफे, जिम, साउना, इन्डोर तथाआउटडोर गेम पूर्ण रुपमा बन्द गरेको हुनुपर्ने उल्लेख छ।
यस्तै, प्रत्येक कोठामा एक हप्ता पुग्ने गरी सावुन, टुथपेष्ट, ब्रस, हेण्डवास र टावेल राखिएको हुनुपर्ने छ।
नेपाली तथा विदेशी नागरिकहरू विदेशबाट नेपाल आउँदा पालन गर्नुपर्ने मापदण्ड, २०७८ मा तोकिएको क्षेत्रमा रहेको होटल हुनुपर्ने जनाइएकाे छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
