काठमाडौं- कोरोना महामारीले गाउँ-गाउँमासमेत आक्रान्त पार्न थालेपछि नेपाल तामाङ घेदुङले तामाङ चिकित्सक समाजसँगको सहकार्यमा 'कोरोना स्वास्थ्य अभियान' सुरु गरेको छ। अभियान सञ्चालनका लागि घेदुङले आइतबार चिकित्सक समाजलाई एक लाख रुपैयाँ हस्तान्तरण गरेको छ।
घेदुङका संघीय उपाध्यक्ष कुमार घिसिङ र महासचिव महितकुमार तामाङले उक्त रकम चिकित्सक समाजका अध्यक्ष डा. दिलबहादुर थोकर र कोषाध्यक्ष डा. निराजन दोङ तामाङलाई हस्तान्तरण गरेका थिए। अभियानका लागि दुई संस्थाबीच भएको सहमतिबमोजिम कोरोना संक्रमितलाई आवश्यक स्वास्थ्य सेवा दिन उक्त रकम हस्तान्तरण गरिएको उपाध्यक्ष घिसिङले जानकारी दिए। 'तामाङ चिकित्सक समाजसँग मिलेर सुरु गरेको कोरोना भाइरसविरुद्धको यो लडाइँ संक्रमण सामान्य स्थितिमा नआएसम्म जारी रहनेछ,' उनले भने।
घेदुङका महासचिव तामाङले महामारीको बेला सामाजिक दायित्वबोध गरी अभियान सुरु गरिएको बताए। 'अस्पतालमा बेड नपाएर घरमै बसेका संक्रमितहरूले उपचार नपाएर अकालमै ज्यान गुमाउनुपरिरहेको घटनाले हामीलाई अत्यन्तै दुःखी बनायो,' उनले भने, 'यस्तो विषम् परिस्थितिमा एउटा सामाजिक संस्थाको अभियन्ताहरू चुप लागेर बस्न उचित नहुने निष्कर्षसहित हामीले यो अभियान सुरु गर्न लागेका हौं।' यस अभियानमा विभिन्न देशमा रहेका घेदुङका प्रवास शाखा तथा अन्य संस्थाहरुले पनि साथ दिने प्रतिबद्धता जनाएको उनले बताए।
चिकित्सक समाजका अध्यक्ष डा. थोकरले महामारीको बेलामा मानवीय हिसाबले केही सहयोग पुर्याउने उद्देश्यका साथ यो अभियानमा लागेको बताए। उनले आफूहरूले संक्रमितलाई आवश्यक स्वास्थ्य सामग्री र परामर्शसहित ग्रामीण क्षेत्रमा पुगेर नि:शुल्क सेवा पुर्याउने बताए।
उक्त अभियानका लागि घेदुङले विपद् व्यवस्थापन कोष खडा गरेको छ। पहिलो चरणमा यस कोषमा घेदुङकै पदाधिकारी, सचिवालय र शुभेच्छुक व्यक्तिहरूबाट संकलित रकमबाट कोष खडा गरिएको कोषाध्यक्ष रुपबहादुर योन्जनले बताए। 'कोष खडा गर्नका लागि सुरुमा हामी पदाधिकारीबाटै रकम संकलन गरेका छाैं, विदेशस्थित तामाङ संघ, संस्था र शुभेच्छुक व्यक्ति तथा अन्य दाताहरूलाई समेत अनुरोध गरेका छौं,' उनले भने।
कोषमा संकलित रकमबाट आवश्यक स्वास्थ्य सामग्री खरिद गर्ने र अस्पतालमा गई उपचार गर्न नसक्ने तथा आर्थिक अवस्था कमजोर रहेका संक्रमितलाई तामाङ चिकित्सक समाजमार्फत् सहयोग पुर्याउने घेदुङले जनाएको छ।
घेदुङले गत वर्ष कोरोना महामारीको पहिलो लहरमा विपद् व्यवस्थापन कोषमार्फत् राहात वितरण गर्नुका साथै पुरातात्त्विक अनुसन्धान विभागमार्फत् तामाङ पत्रकारहरुको कोरोना बिमाका लागि सहयोग गरेको थियो।
यसैबीच, कोरोना स्वास्थ्य अभियानअन्तर्गत नि:शुल्क परामर्श तथा आवश्यक सहयोगका लागि तामाङ चिकित्सक समाजले चिकित्सकहरुको नामावली र सम्पर्क नम्बर सार्वजनिक गरेको छ। समाजले चिकित्सकहरुसँग सम्पर्क गर्न सकिने समय तालिकासहितको सूची सार्वजनिक गरेको हो। तोकिएको समयमा चिकित्सकहरुसँग आवश्यक परामर्श र सहयोग लिन सकिने समाजका अध्यक्ष डा. थोकरले जानकारी दिएका छन्।
नि:शुल्क परामर्श तथा आवश्यक सहयोगका उपलब्ध चिकित्सकहरु:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
