काठमाडौं- कोरोना भाइरसको महामारी नियन्त्रणका लागि थाइल्याण्ड सरकारले नेपाललाई ३० युनिट हाइफ्लो नोजल क्यानोला, आठ युनिट अक्सिजन कन्सन्ट्रेटरसहित १० किसिमका स्वास्थ्य सामग्री सहयोग गरेको छ।
थाइल्याण्डका नरेश महा बजिरालोङकन फ्रा बजिराक्लउछायुहबाटले उपलब्ध गराएका ती सामग्री आइतबार शाही थाइ एयर फोर्सको चार्टर विमानमार्फत् नेपाल आइपुगेको छ।
त्रिभुवन अन्तर्राष्ट्रिय विमानस्थलमा स्वाथ्य सामग्री हस्तान्तरण कार्यक्रमा बोल्दै परराष्ट्रमन्त्री प्रदीप ज्ञवालीले विषम् परिस्थितिमा नेपालका लागि थाइ राजपरिवारले गरेको सहयोग महत्त्वपूर्ण रहेको बताए। उनले भने, ‘थाइ नरेशप्रति नेपाल सरकारको तर्फबाट धन्यवाद दिन चाहन्छु।’
ती सामग्री थाइल्याण्डका राजदूत भोसिता भोरासावले स्वाथ्य तथा जनसंख्यामन्त्री हृदयश त्रिपाठीलाई हस्तान्तरण गरेका थिए। मन्त्री त्रिपाठीले थाइ सरकारले गरेको महत्त्वपूर्ण सहयोगप्रति धन्यवाद दिए।
नरेश महा बजिरालोङकन फ्रा बजिराक्लउछायुहबाट थाइ रोयल एडको रूपमा ती स्वास्थ्य सामग्री नेपाल सरकारलाई सहयोग गरिएको हो। नेपाललाई थाइ राजदरबारबाट सहयोग जुटाउन थाइल्याण्डको भिक्षु संघमा प्रतिष्ठित नेपाली मूलका भिक्षु थाइ राजकीय विहार वाट बोभर्नका उपप्रमुख भिक्षु फ्रा देव शाक्य बंशपण्डित अर्थात् फ्रा डा. अनिल शाक्यले पहल गरेका थिए। शिक्षामन्त्री कृष्णगोपाल श्रेष्ठसँगको समन्वयमा उक्त सहयोग जुटाउन सफल भएको बताइएको छ।
नेपाली राजदूतावासमार्पmत् पत्र प्राप्त भएपछि थाइ नरेशले नेपाललाई सहयोग गर्न निर्देशन दिएका थिए। सोही निर्देशनअनुसार थाइ सरकारले १० लाख थान सर्जिकल मास्क, चार हजार ५०० थान पीपीई गाउन, १० हजार जोर लेग कभर, १० हजार थान सर्जिकल क्याप, पाँच हजार थान फेसशिल्ड ,२० हजार थान एन्टिजेन किट, ६०० थान पल्स अक्सिमिटर, एक हजार ५०० थान डिजिटल थर्मामिटर, एक हजार थान बडी ब्याग सहयोग सामग्री नेपाल सरकारलाई उपलब्ध गराइएको छ। ती सामग्रीबाहेक थाइ राजकुमारीले सात हजार थान पीपीई गाउन उपलब्ध गराएकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
