काठमाडौं- कोरोनाविरुद्धको खोप आयातका लागि सरकारले परिपत्र गरेका विदेशी खोप कम्पनीहरुले नेपालमा खोप पठाउने विषयमा आफूहरु सकारात्मक भएको प्रतिक्रिया दिएका छन्। तर, अमेरिकाको मोडर्नाले भने एक वर्ष खोप दिन नसक्ने प्रतिक्रिया दिएको छ।
स्वास्थ्य सेवा विभागले खोप खरिदका लागि अमेरिकाको मोडर्ना, जोन्सन एण्ड जोन्सन कम्पनी र रसियाको स्पुतनिक भी खोप उत्पादक कम्पनीलाई खोप उपलब्ध गरराउन पत्राचार गरेको थियो। नेपालको पत्रको जवाफ दिँदै दुई कम्पनीले नेपालमा खोप निर्यात गर्ने विषयमा आफूहरु सकारात्मक रहेको प्रक्रिया दिएका छन्।
स्वास्थ्य सेवा विभागका महानिर्देशक डा. दीपेन्द्ररमण सिंहले अमेरिकाको जोन्सन एण्ड जोन्सन र रसियाको स्पुतनिक भी खोप पठाउन सकारात्मक रहेको प्रत्युत्तर आएको जानकारी दिए। यी दुई कम्पनीले अन्तर्राष्ट्रिय मूल्यमा नेपालमा खोप पठाउन सकारात्मक रहेको र आवश्यक छलफल गरिने जवाफ दिएको डा. सिंहको भनाइ छ।
यी दुई कम्पनीले आधिकारिक एजेन्टमार्फत् खोप दिने विषय पनि पत्रमा लेखेका छन्। जोन्सनले सरकारसँग छलफल गर्न प्रतिनिधि पठाउने विषय पनि इमेलमा लेखेको छ।
उनीहरुले अन्तर्राष्ट्रिय मूल्यमा बिक्री गर्न तयार भएपछि कम्पनीको एजेन्ट नेपालमा हुनुपर्ने बताएका छन्। तर, अमेरिकाको मोडर्ना कम्पनीले भने एक वर्ष खोप उपलब्ध गराउन नसक्ने जानकारी गरएको डा. सिंहले बताए।
सरकारले पछिल्लो समय यी कम्पनीहरुबाट ५० लाख डोज खोप खरिद गर्ने तयारी गरेको छ। सोहीअनुसार नेपालले खोप उत्पादक कम्पनीहरुलाई पत्र पठाएको थियो।
सरकारले नेपालमा पहिलो चरणमा भारतबाट १० लाख डोज कोभिशिल्ड खोप अनुदानमा पाएको थियो। भारतबाट अनुदानमा खोप प्राप्त भएपछि कोरोनाविरुद्धको खोप अभियान सुरु गरेको सरकारले भारतबाटै थप २० लाख डोज खोप खरिदसमेत गरेको थियो।
यस्तै ५० लाख डोज कोभिशिल्ड खोप खरिद गर्ने सरकारको योजना थियो। तर, कोभिशिल्ड खोप उत्पादक कम्पनी सेरम इन्स्टिच्युटले नेपालमा खरिद गरिएका २० लाख डोज खोपमध्ये १० लाख डोजसमेत उपलब्ध गराउन सकेन।
सरकारले भारतबाट अनुदान तथा खरिद गरी प्राप्त भएको कोभिडशिल्ड र चीनबाट अनुदानमा प्राप्त भएको भेरोसेल खोप करिब २१ लाख व्यक्तिलाई एक डोज दिइसकेको छ।
स्वास्थ्य मन्त्रालयका अनुसार सोमबारसम्ममा नेपालमा २१ लाख १३ हजार ८० जनाले कोरोनाविरुद्धको खोपको पहिलो डोज पाएका छन् भने पाँच लाख ५३ हजार ५८९ जनाले खोपको दुवै डोज पाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789010467.jpg)
-1786602170.png)
