काठमाडाैं- नेपालमा कोरोना भाइरसको पहिलो लहरमा वृद्धवृद्धा बढी प्रभावित भएका थिए। तर, दोस्रो लहरमा युवाहरु बढी संक्रमित भइरहेका छन्।
अहिले दैनिक पहिचान भइरहेका संक्रमितमा २०-३९ वर्ष उमेर समूहका धेरै रहेका छन्। उक्त समूहको तुलनामा ६० वर्षभन्दा माथि उमेर समूहका संक्रमित संख्या न्यून छ।
स्वास्थ्य तथा जनसंख्या मन्त्रालयको तथ्यांकअनुसार पछिल्ला १० दिन (वैशाख २३ देखि जेठ १)भित्र नेपालभर संक्रमित भएकामध्ये सबैभन्दा धेरै २०-३९ वर्ष उमेर समूहका छन्। सो अवधिमा उक्त उमेर समूहका ४० हजार ८१० जना संक्रमित भएको तथ्यांक छ।
सोही अवधिमा ६० वर्ष वा त्योभन्दा बढी उमेर समूहका संक्रमित संख्या जम्मा १० हजार १२८ रहेको छ। यो तथ्यांकअनुसार १० दिनमा ६० वर्ष वा त्योभन्दा बढी उमेर समूहका भन्दा २०-३९ वर्ष उमेर समूहका ३० हजार ६८२ जना बढी संक्रमित भएका छन्।
युवा उमेर समूहमा पनि ३०-३९ वर्षभित्रका संक्रमित बढी रहेका छन्। वैशाख २३ देखि जेठ १ सम्ममा उक्त उमेर समूहका २१ हजार ११३ जना संक्रमित भएका छन्। यस्तै २० देखि २९ उमेर समूहका १९ हजार ६९७ जना संक्रमित भएका छन्।
सोही अवधिमा ६०-६९ वर्ष उमेर समूहका छ हजार २७७, ७०-७९ वर्ष उमेर समूहका दुई हजार ७४६, ८०-८९ उमेर समूहका ९०७ तथा ९०-१०० उमेर समूहका १९८ जना संक्रमित भएको तथ्यांक छ।
उमेर समूहअनुसार पछिल्लो १० दिनको संक्रमित संख्या:
उक्त तथ्यांकले कोरोनाको दोस्रो लहरले युवा उमेरकालाई बढी संक्रमित बनाएको देखाउँछ। चिकित्सकहरुले पनि कोरोनाको नयाँ भेरियन्टले युवा पुस्तामा बढी आक्रमण गरिरहेको बताउँदै आएका छन्, जुन तथ्यांकबाटसमेत पुष्टि भएको छ।
मृत्यु हुनेमा वृद्धवृद्धा बढी
कोरोना संक्रमित हुनेमा युवा उमेरका धेरै भए पनि मृत्यु हुनेमा वृद्धवृद्धा बढी देखिएको छ। चिकित्सकहरुले दीर्घरोगी तथा वृद्धवृद्धालाई कोरोनाले बढी जोखिममा पार्ने बताउँदै आएका छन्।
नेपालमा कोरोना संक्रमणबाट आजसम्म चार हजार ८५६ जनाको मृत्यु भएको छ। यसरी मृत्यु भएकामध्ये आधाभन्दा बढी ६० वर्ष वा त्यो भन्दा माथि उमेर समूहका छन्। स्वास्थ्य मन्त्रालयको तथ्यांकअनुसार नेपालमा ६० वर्ष वा त्यो भन्दा माथि उमेर समूहका दुई हजार ७३५ जनाको मृत्यु भएको छ।
यसैगरी, ५०-५९ वर्ष उमेर समूहका ८८१ जना र ४०-३९ वर्षका ६५९ जनाको मृत्यु भएको छ। २० देखि ३९ वर्ष उमेर समूहका ५२३ जनाको मृत्यु भएको तथ्यांक छ। यसमा ३०-३९ वर्षका ३८५ र २०-२९ वर्ष उमेर समूहका १३८ जना रहेका छन्।
यस्तै ०-९ वर्षका बालबालिका २९ जना र १०-१९ वर्षका २९ जनाको कोरोना संक्रमणबाट मृत्यु भएको तथ्यांक छ।
उक्त तथ्यांकले नेपालमा कोभिडका कारण सबै उमेर समूहका मानिसहरुको ज्यान गए पनि सबैभन्दा धेरै ६० वा त्यो भन्दा बढी उमेर समूहमा धेरै क्षति पुर्याइरहेको देखाउँछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
