कोरोना अपडेट

अक्सिजन नपाए त कसरी बाँचिएला र ?

रिता लम्साल बिहीबार, वैशाख ३०, २०७८ २३:१०

काठमाडौं– बालाजु औद्योगिक क्षेत्रको गेटमै करिब २०/२५ वटा अक्सिजन सिलिण्डर लाइनमा राखिएको छ। ती सिलिण्डरहरु खाली छन्।

होम आइसोलेसन तथा अस्पतालमा रहेका कोरोना संक्रमितका आफन्तहरुले बालाजुको औद्योगिक क्षेत्रमा रहेको शंकर अक्सिजन ग्यास प्रालिमा अक्सिजन भर्न ती खाली सिलिण्डर ल्याएका हुन्।

घरमै आइसोलेसनमा रहेका र अस्पताल पुर्‍याइएका संक्रमित पनि अक्सिजनको सपोर्टमा छन् । अस्पताल पुर्‍याइए पनि अक्सिजनको जाहो आफैंले गर्नु भन्ने उर्दी छ। अस्पतालले अक्सिजनको व्यवस्था गर्न नसक्ने भनेपछि बिरामीका आफन्तहरु अक्सिजनका लागि उद्योगमै लाइन लाग्न पुगेका छन् ।

खाली सिलिण्डर बोकेर उद्योगमै पुगे पनि सहजै अक्सिजन पाउने अवस्था भने छैन।

‘दिदीलाई होम आइसोलेसनमा राखेको छु, मसँग २ वटा अक्सिजन सिलिण्डर छ, एउटा घरमा दिदीले अक्सिजन लिइरहनु भएको छ, अर्को यहाँ रिफिलिङको लागि लाइनमा राखेको छु,’ एकजना पुरुषले भने, ‘घरमा रहेको अक्सिजन सिलिण्डर नसक्किदै यो सिलिण्डर भरेर घर पुर्‍याउनु छ, नत्र दिदीलाई जे पनि हुनसक्छ। अक्सिजन नपाए त कसरी बाँचिएला र?’

उनले हिजो (बुधबार)सम्म अक्सिजन उद्योगले खाली सिलिण्डर लिएर आउनेहरुलाई सहज रुपमा अक्सिजन दिए पनि आज (बिहीबार)बाट भने अक्सिजन लिन घण्टौ लाइन बस्नुपरेको सुनाए ।

औद्योगिक क्षेत्रको मुख्य प्रवेशद्धारमा मानिसहरु अक्सिजन पाउने आस मा खाली सिलिण्डर लिएर लाइनमा बसेका छन् । खाली सिलिण्डर लिएर आउनेहरुको संख्या थपिँदो छ।

‘२ घण्टा भइसक्यो पालो कुरेको, भित्र अक्सिजन लिनै बोलाउँदैनन्, लौ न हजुर भित्र तपाईंहरु गएर किन ढिला भयो बुझिदिनुस् न,’ नेपाल लाइभकर्मी पुग्दा खाली सिलिण्डर बोकेर लाइन बसेका अर्का एक व्यक्तिले भने ।

ट्याक्सीमा अक्सिजन सिलिण्डर झारेर दुईजना युवाले लाइनको अन्तिममा अक्सिजन सिलिण्डर राखे । ती युवाका अनुसार उनका आफन्त अल्का अस्पतालको आईसीयूमा उपचाररत छन्।

अस्पतालले कि अरु नै अस्पतालमा लैजानु कि अक्सिजन आफैं व्यवस्थापन गर्नु भनेपछि उनीहरु आफन्तलाई बचाउन अक्सिजन उद्योगमा अक्सिजन लिन धाइरहेका छन्।

‘अल्का अस्पतालको आईसीयूमा आफन्त हुनुहुन्छ, अस्पतालले अक्सिजन आफैं ल्याउनु भनेको छ,’ ती युवाले चिन्तित हुँदै भने, ‘यहाँ त लाइन रहेछ, अक्सिजन कुनबेला भर्न पाइन्छ, थाहा छैन।’

हामी औद्योगिक क्षेत्रबाट भित्र प्रवेश गरी शंकर अक्सिजन ग्यास प्रालितर्फ लाग्यौं । अक्सिजन उद्योग परिसरमा करिब ३ बजे पुग्दा त्यहाँ प्रवेशद्वारमा भन्दा पनि धेरै ठूलो भिडभाड र अक्सिजन सिलिण्डरको लाम थियो ।

२० भन्दा बढी अस्पतालका सवारीसाधन खाली सिलिण्डर लिएर अक्सिजन भर्ने पालो कुरेर बसेका थिए ।

अक्सिजन उद्योगभित्र पनि होम आइसोलेसन तथा अस्पतालमै रहेका कोरोना संक्रमितका आफन्तहरु अक्सिजन पाउने आसमा बसेका थिए ।

कोरोना संक्रमणबाट जोगिन सामाजिक दुरी कायम गर्नु अनिवार्य हुन्छ । तर, अक्सिजन उद्योग परिसरमा सामाजिक दुरी कायम गरी आफू कसरी जोखिने भन्नेतर्फ कसैको ध्यान थिएन। सबैजना अक्सिजन प्लान्टमा खाली सिलिण्डर सिफिलिङका लागि कहिले पालो आउला भन्ने चिन्तामै थिए ।

उद्योगमा अक्सिजन लिन पुग्ने अस्पतालहरुका कर्मचारी र संक्रमतिका आफन्तहरुको भिड व्यवस्थापन गर्न प्रहरीलाई हम्मेहम्मे परिरहेको थियो।

उद्योगका कर्मचारीले अक्सिजन प्लान्टबाट अक्सिजन रिफिलिङ गर्न खाली सिलिण्डर भित्र लैजान गेट खोल्ने वित्तिकै बिरामीका आफन्त तथा अस्पतालबाट अक्सिजन लिन पुग्नेहरु ठेलमठेल गर्दै सकिनसकी अक्सिजन सिलिण्डर घिसार्दै थिए ।

‘अस्पतलमा बिरामीलाई दिएको अक्सिजन सकिन लागिसक्यो, छिटो अक्सिजन ल्याउनुस् भनेर अस्पतालबाट फोन आइसक्यो,’ एकजना महिलाले भनिन्, ‘यहाँ बिहानैदेखि पालो कुरेर बसेको छु, अझै अक्सिजन भर्न पाएको छैन।’

‘अस्पतालबाट अक्सिजन सकिन लाग्यो भनेर १० पटक फोन आइसक्यो, बिहान ७ बजेदेखि अक्सिजन भर्न खाली सिलिण्डर लिएर आएको, १ बजेसम्म पनि पालो आएन,’ अक्सिजन लिन पुगेका एक अस्पतालका कर्मचारीले भने, ‘अब अस्पतालमा दुई घण्टालाई मात्र पुग्ने अक्सिजन बाँकी छ भन्ने खबर आइसक्यो, यहाँ पालो नै आउलाजस्तो छैन।’

उद्योग परिसरमा दिउँसो ३ बजेसम्ममा २० भन्दा बढी ट्रकहरु अक्सिजन भर्ने पालो कुरेर बसेका थिए ।

शंकर अक्सिजन उद्योगका एक कर्मचारीका अनुसार ३ वटा अक्सिजन प्लान्ट रहेको उद्योगमा अहिले एउटा प्लान्ट विग्रिएको छ। दुईवटा मात्र प्लान्टले अक्सिजन सिफिलिङ गर्दा हरेक ४५ मिनेटमा ३३ वटा मात्र सिलिण्डर रिफिलिङ गर्न सकिन्छ । तर, अस्पताल परिसरमा ५ सयभन्दा बढी खाली अक्सिजन सिलिण्डर भर्न अस्पतालका कर्मचारी तथा कोरोना संक्रमतिका आफन्तहरु पालो कुरेर बसिररहेका छन्।

‘एउटा प्लान्ट बिग्रेको छ, दुईवटाले ४५ मिनेटमा ३३ वटा मात्र सिलिण्डर रिफिलिङ हुन्छ,’ उद्योगका एक कर्मचारीले भने, ‘२४ घण्टा नै सञ्चालन गर्दा पनि धान्न मुस्किल परिरहेको छ।’