काठमाडाैं–राष्ट्रिय ट्रमा सेन्टरमा पनि अक्सिजन अभाव भएको छ। संक्रमितको उपचारमा समस्या देखिने खतरा बढेपछि ट्रमाले सहयोगको अपिल गरेको छ।
ट्रमा सेन्टरका निमित्त निर्देशक सन्तोष पौडेलले सामाजिक सञ्जालमा वाध्य भएर आह्वान गरे। ‘ट्रमा सेन्टरमा १०५ जना गम्भीर किसिममा कोभिडका बिरामीको उपचार भइरहेको अवस्थामा अक्सिजनको चरम अभाव भयो,’ उनले लेखेका छन्, ‘बुधबार रातभर त थामियो, अब समस्या भयो।’
उनको यो स्टाटसपछि भुवन केसीले त्यहाँको अवस्था बारेमा थप लेखे। ट्रम्मा सेन्टरमा निर्देशक पौडेलसहित रातभर खटिएर एम्वुलेन्समा अक्सिजन ओसार्दै बिहान सात बजेसम्मका लागि व्यवस्था गरिएको केसीले लेखेका छन्। त्यसपछिको अवस्था भगवान भरोसा भएको उनले उल्लेख गरेका छन्।
काठमाडौको केन्द्रमा रहेको अस्पतालको यो अवस्थाले देशभरका अस्पतालको ताजा स्थिति वर्णन गरेको छ। शंकर अक्जिन उद्योगसँग सम्झौता गरेर आवश्यकताअनुसार पूर्ति गरिरहेको ट्रमा सेन्टरमा अहिले सीसीएमसीले कोटा तोकेर अक्सिजन दिन थालेपछि हाराकार भएको हो।
सरकारले अस्पताललाई कोभिडका बिरामी उपचारको युनिफाइड अस्पताल बनाउने भनेको छ। यसरी अक्सिजनको अभाव हुँदा देशभरका विकट ठाउँको अवस्था के होला। विरामीको चाप दैनिक रुपमा थपिँदै गएकाले यसले झनै विकाराल समस्या ल्याउने देखिएको निमित्त निर्देशक पौडेलले बताए। ‘जम्मा २० वटा आउँछ त्यसले तीन घन्टा भन्दा पुग्दैन,’ उनले भने, ‘फेरि खोज्दा चार घन्टा पाइँदैन, हिजो रातभर आफै गएर एम्वुलेन्समा ओसारेँ, अव त त्यो पनि सम्भावना छैन।’
सरकारको वितरण प्रणाली के हो थाहा पाउन नसकेकाले हैरान भएको उनले बताए। ‘म अस्पताल चलाउने कि सिलिन्डर खोज्न जाने हो,’ उनले भने, ‘बजारको माग २५ हजार भन्दा धेरै देखिन्छ भने उत्पादन १८ हजारमात्र छ भनिन्छ अब उत्पादन नहुने हो भने सरकारले विकल्प खोज्नु पर्छ, बिरामी मर्न दिन त सकिँदैन।’
शुरुमा सम्झौता अनुसार आवश्यकता अनुसार दिने भनेर शंकर अक्सिजनले भनेको थियो तर अहिले सीसीएमसीले सबैलाई दिने कोटा तोकेपछि १८, १५ र २० गरी सिलिन्डर दैनिक रुपमा आउन थालेको उनले बताए। देशभर कोभिडका जटिल बिरामीको समस्या बढेको छ अव यसले झनै विकराल अवस्था ल्याउने उनले देखेका छन्।
मानिसहरुले घरमा थन्क्याए
अहिलेको समस्या भनेको मानिसहरुले घरघरमा सिलिन्डर थन्काएका कारण भएको उनकाे भनाइ छ। ‘आपतकालीन अवस्था आउन सक्छ भनेर मानिसहरुले घरघरमा लगेर सिलिन्डर राखेका छन्,’ उनले भने, ‘यहाँ अस्पतालमा अक्सिजन छैन भन्ने बित्तिकै आफै सिलिन्डर बोकेर ल्याए, त्यसैले म वहाँहरुलाई घरमा नथन्काइदिन आग्रह गर्दछु।’
पाँच वटा सिलिन्डर हुँदा १०५ बिराीलाई आधा घन्टा पुग्ने भन्दै उनले यसरी घरमा राख्दा त्यसको उपयोग नभएकाले अस्पतलाई दिन आग्रह गरे। अस्पतालमा आउने विरामीले पनि आवश्यकता भन्दा धेरै मात्रामा मिटर घुमाउँदा अक्सिजन खेर गएको उनकाे भनाइ छ। यो सवै समस्याको समाधान भनेको सरकारले कोटा बढाउने नै भएको उनको तर्क छ।
अस्पतालमा हाहाकार भएपछि सीसीएमसीदेखि स्वास्थ्य मन्त्रालयसम्म गुहार गरिरहेको उनले बताए । ‘अब सवैले कुरा सुनेर अक्सिजन उपलव्ध गराए बिरामी बचाउन सकिएला नत्र भगवान भरोसा नै हो,’ उनले भने, रात दिन नभनी र परिवारकाे समेत बेवास्था गरेर खटिएका छौं, तर हाम्रो हातमा केही छैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
