सिन्धुपाल्चोक- लगातार काेराेना संक्रमितको संख्या बढ्दै गएपछि जिल्ला प्रशासन कार्यालय, सिन्धुपाल्चोकले नौ स्थानीय तहमा निषेधाज्ञाकाे आदेश जारी गरेकाे छ।
सहायक प्रमुख जिल्ला अधिकार बाबुराम खनालको नेतृत्वमा बसेको जिल्ला कोभिड १९ संकट व्यवस्थापन केन्द्र (डीसीसीएमसी)को बैठकले निषेधाज्ञाकाे आदेश जारी गरेको हो।
खनालका अनुसार चौतारा साँगाचोकगढी नगरपालिका, बलेफि गाउँपालिका र भोटेकासी गाउँपालिकाको अरनिको राजमार्ग सिन्धुपाल्चोक खण्डको बन्देउदेखि खाडिचौर बाह्रबिसे हुँदै तातोपानीसम्मको दायाँ बायाँ ५ सय मिटरमा निषेधाज्ञा जारी गरिएकाे छ।
यस्तै, सुनकोसी र लिसंखु पाखर गाउँपालिकाको खाडिचौरदेखि ठूलोपाखर हुँदै मुडे सडकखण्डको दायाँ बायाँ ५ सय मिटर खण्डमा निषेधाज्ञा जारी गरिएको छ।
चौतारा साँगाचोकगढी नगरपालिका, बन्देउदेखि चौतारा सदरमुकाम जोड्ने सडक हुँदै स्याउले दायाँ बायाँ ५ सय मिटर, मेलम्ची र हेलम्बुको जिरो किलो हुँदै बाहुनेपाटी सिपाघाट, मेलम्ची सेरा, हेलम्बुको किउल सडकखण्डको दायाँ बायाँ ६ सय मिटर निषेधाज्ञा गरिएको छ।
यता, चौतारा नगरपालिका वडा नम्बर ४, ५ र ९ वडाको सम्पूर्ण क्षेत्र, मेलम्ची ११ का सम्पूर्ण क्षेत्रहरु र बलेफि र जुगलका बलेफिदेखि नौबिसे, जलबिरे, ढाडे, कात्तिके सडकखण्डको दायाँ बायाँ २ सय मिटर क्षेत्रमा निषेधाज्ञा जारी गरिएको छ।
यी क्षेत्रमा वैशाख २३ बिहान ६ बजेदेखि वैशाख ३१ गते मध्यरात १२ बजेसम्म निषेधाज्ञा जारी रहनेछ।
यद्यपि, निषेधाज्ञाकाे अवधिमा सरकारी कार्यालय, बैंक तथा वित्तीय संस्था, विमा एवं इजाजत प्राप्त सहकारी संस्थाहरु कार्यालय र कर्मचारीहरुको अवस्था हेरेर सम्बन्धित माथिल्लो निकायको स्विकृति लिई आलाेपालाे गरेर खेल्न पाइने छ।
सभा, सम्मेलन, गोष्ठी, तालिम, सेमिनार, सिनेमा हल, पार्टी प्यालेस, स्वीमिङ पुल, सपिङ मल, मनोरञ्जन, ब्युटि पार्लर, जिमखाना, समूहमा खेलिने खेलकुद, पुस्तकालय, संग्रहालय आदि सञ्चालन गर्न पाइने छैन।
सार्वजनिक एवं निजी सवारी साधन, अटो रिक्सासमेत सञ्चालन गर्न पाइने छैन। अत्यावश्यक सेवाहरु जस्तै एम्बुलेन्स, खानेपानी, स्वास्थ्य, खाधान्न, तरकारी, फलफुल, दुध तथा दुग्धजन्य पदार्थ, मासु तथा मासुजन्य बस्तु बोकेको सवारी साधन, बैंक, वित्तीय संस्था, दुरसञ्चार, इन्टरनेट, क्वारेन्टिन, आइसोलेसन, फोहोरमैला व्यवस्थापन, कुरियर तथा डाँकसेवा लगायतका ढुवानी तथा यातायातका साधन सञ्चालन गर्न पाइने छ।
खाद्य सामाग्री, ग्रोसरी पसल, औषधी पसल जस्ता अत्यावश्यक सेवाका व्यवसाय सञ्चालन गर्दा नेपाल सरकारले तोकेको स्वास्थ्य मापदण्डको पूर्ण रुपमा पालना गर्न आग्रह गरिएकाे छ।
यता, नेपाल सरकारका कर्मचारी, बैंक तथा वित्तीय संस्था र अन्य अत्यावश्यक सेवामा कार्यरत कर्मचारीले प्रयोग गर्ने निजी सवारी साधनका हकमा कार्यालयले जारी गरेको परिचयपत्रको आधारमा आवतजावत गर्न दिनेछ।
सञ्चारकर्मी/ पत्रकारको हकमा सूचना संकलन तथा सम्प्रेषण गर्ने सूचना विभागले जारी गरेको परिचय पत्रको आधारमा आवतजावत गर्न दिइने बैठकले निर्णय गरेकाे छ। होटल तथा रेष्टुरेन्टहरु पूर्ण रुपमा बन्द रहनेछ।
विवाह तथा व्रतबन्धमा आयोजनाका लागि १५ जना (दुलाहदुलहीसहित) भन्दा बढी नहुने गरी सहभागी हुन पाइने छैन।
यता, जिल्लाका विभिन्न क्षेत्रमा रहेका बजारहरुमा सञ्चालित औषधि पसल, भेटेरिनरी औषधि पसल, खाद्यान्न, तरकारी, फलफुल र दुग्धजन्य पदार्थ बेचबिखन गर्ने पसलबाहेक अन्य पसल/व्यवसाय अर्को आदेश नभएसम्मका लागि पूर्ण रुपमा बन्द गरिएकाे छ।
निर्माण सामाग्री पसल र र ढुवानीकाे हकमा बेलुका ७ बजेदेखि बिहान ६ बजेसम्म मात्र सञ्चालन गर्न पाउने छ।
कुभिन्डे र कमदबास सिल
सिन्धुपाल्चोकका चौतारा नगरपालिकाका केही क्षेत्र सिल गरिएको छ। बैठकले कदमवास र कुभिन्डे वैशाख २३ देखि वैशाख ३१ सम्म सिल गरेकाे हाे।
साविकको कुभिन्डे गाविसको वडा नम्बर ५, ६, ७, ८ र ९ सिल गरिएको हो। चौतारा साँगाचोकगढी वडा नम्बर ४ को पूर्वमा नौबिसे, पश्चिममा चौतारा साँगाचोकगढी नगरपालिका ५ को सीमाना, उतरमा साविकको बतासे गाविस र दक्षिण मेलचौर इर्खुको सीमाक्षेत्र सिल गरिएको छ।
यस्तै, चौतारा साँगाचोकगढी नगरपालिका ९ को कदमवास गाउँको सम्पूर्ण क्षेत्र सिल गरिएको छ। पूर्वमा बलेफि गाउँपालिकाको सीमाना, पश्चिममा लिपी खोला, उतरमा इर्खु र दक्षिण पश्चिमको जलकिनी क्षेत्रसम्म सिल गरिएको छ।
पछिल्लो समय उक्त क्षेत्रमा कोरोना संक्रमण तीव्र रुपमा फैलिरहेको छ। हालसम्म कदमवासमा २४ र कुभिन्डेमा ३० जना संक्रमित भेटिएका छन्।
यस्तै, कुभिन्डेमा दुई जनाले कोरोना संक्रमणबाट ज्यान गुमाइसकेका छन् भने कदमवासकी एक महिलाको कोरोनासँग मिल्ने लक्षण देखिएको र ती महिलाको मृत्यु भएको थियो।
सिलको पालना नगर्नेलाई संक्रामक रोग नियन्त्रण ऐन २०२० तथा प्रचलित कानुन बमोजिम सजाय हुनेछ। सिल गरिएको क्षेत्रमा मानिस आवतजावत पूर्ण रुपमा बन्द गरिएको जिल्ला प्रशासनले जनाएको छ।
साथै सिल गरिएको स्थानका स्थानीय घर बाहिर निस्कन पाउने छैनन्। यसको अनुगम स्थानीय जनप्रतिनिधि र सुरक्षाकर्मीले गर्ने सूचनामा उल्लेख छ।
सिन्धुपाल्चोकमा हाल २ सय नजिक संक्रिय संक्रमित पुगेका छन् भने दोस्रो लहरपछिमात्र ३ जनाले ज्यान गुमाएका छन्।
बुधबार थप २६ जना संक्रमित भेटिएका थिए। प्रमुख जिल्ला अधिकारी र प्रहरी प्रमुख समेत संक्रमित भएर आइसोलेनमा बसिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
