काठमाडौं– कोरोना भाइरस (कोभिड १९) को संक्रमणबाट विगत १५ दिनको अवधिमा काठमाडौं उपत्यकामा मात्रै ७७ जनाको मृत्यु भएको छ।
स्वास्थ्य तथा जनसंख्या मन्त्रालयका अनुसार वैशाख ८ गतेदेखि वैशाख २२ गते (बुधबार)सम्म काठमाडौं उपत्यकामा ७७ जनाको मृत्यु भएको हो।
मन्त्रालयका अनुसार कोरोना संक्रमणबाट काठमाडौं उपत्यकामा पछिल्लो ३ दिन वैशाख २०, २१ र २२ गते सबैभन्दा बढीको मृत्यु भएको देखिएको छ। ३ दिनको अवधिमा उपत्यकाका ३ जिल्लामा गरी ३८ जनाको मृत्यु भएको स्वास्थ्य तथा जनसंख्या मन्त्रालयले जानकारी दिएको छ।
वैशाख ८ गते यता १० गते मात्रै कसैको मृत्युको रेकर्ड नभेटिएको स्वास्थ्य तथा जनसंख्या मन्त्रालयले जानकारी दिएको छ। मन्त्रालयका अनुसार काठमाडौं उपत्यकामा कोरोना संक्रमणबाट वैशाख ८ गते १ जना, वैशाख ९ गते २ जना, वैशाख ११ गते २ जना, १२ गते ७ जना, १३ गते ५ जना, १४ गते २ जना, १५ गते ५ जना, १६ गते ५ जना, १७ गते ४ जना, १८ गते २ जना, १९ गते ४ जना, २० गते १३ जना, २१ गते १० जना र २२ गते १५ जनाको मृत्यु भएको छ।
यो अवधिमा काठमाडौं उपत्यकामा ३३ हजार ४५१ जना नयाँ संक्रमित थपिएका मन्त्रालयको तथ्याङ्कले देखाउँछ। मन्त्रालयका अनुसार वैशाख २१ गते सबैभन्दा बढी ३ हजार ८९३ जना संक्रमित थपिएका छन्।
मन्त्रालयका अनुसार यो बीचमा ७ हजार १४ जना संक्रमित संक्रमण मुक्त भएका छन्।
स्वास्थ्य तथा जनसंख्या मन्त्रालयका अनुसार काठमाडौं उपत्यकामा हाल ३० हजार १ सय ५५ जना सक्रिय संक्रमित छन्। सक्रिय संक्रमितमध्ये सबैभन्दा बढी काठमाडौं जिल्लामा २२ हजार ८०८ जना छन्।
यस्तै, ललितपुर जिल्लामा ४ हजार ६०० र भक्तपुरमा २ हजार ७४७ जना सक्रिय संक्रमित रहेका मन्त्रालयले जानकारी दिएको छ।
कोरोना भाइरसको पहिलो लहरदेखि नै हालसम्म काठमाडौं उपत्यकामा मात्रै १ लाख ६८ हजार १९ जनामा संक्रमण पुष्टि भएको स्वास्थ्य मन्त्रालयले जानकारी दिएको छ।
संक्रमण पुष्टि भएकामध्ये हालसम्म १ लाख ३६ हजार ६७० जना संक्रमण मुक्त भएका मन्त्रालयले जानकारी दिएको छ। काठमाडौं उपत्यकामा हालसम्म १ हजार १९७ जना संक्रमितको मृत्यु भएको मन्त्रालयले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
