काठमाडौं- बाँकेको नेपालगञ्जमा कोरोनाभाइरस संक्रमणको अवस्था भयवाह बनेपछि सरोकारवालाले चिन्ता व्यक्त गरेका छन्। उनीहरूले सार्वजनिक अपील जारी गर्दै बिरामीको भर्ना र उपचारलाई व्यवस्थित गर्न भनेका छन्।
नेपाल पत्रकार महासंघ, बाँके शाखाको अगुवाइमा सरोकारवालाहरूले जारी गरेको सार्वजनिक अपीलमा पीसीआर परीक्षणको दायरा पनि बढाउन भनिएको छ। उनीहरूले सरोकारवालाबीचको आपसी समन्वयको अभावमा बिरामीहरू अलपत्र भई छोटो समयमै मृत्यु हुने गरेको, मेडिकल जनशक्तिको अभाव देखिएको, अक्सिजनको अभाव हुन सक्ने सम्भावना देखिएको उल्लेख गरेका छन्।
यस्तै, स्थानीय सरकारका काम, कारबाही प्रभावकारी नदेखिएको, साधन श्रोतको अभाव देखाई कोभिड नियन्त्रण र उपचारका काम प्रभावकारी बन्न नसकेको र सेन्ट्रल कमाण्डमार्फत् एकद्वार प्रणालीबाट काम हुन नसकेको सरोकारवालाहरूले बताएका छन्।
केन्द्रबाट तत्काल दक्ष जनशक्ति खटाउने व्यववस्था मिलाउनुपर्ने, गम्भीर र सामान्य बिरामी राख्न छुट्टाछुट्टै आइसोलेसन केन्द्रको व्यवस्था मिलाउनुपर्ने, अक्सिजनको अभाव हुन नदिने, एकद्वार प्रणालीबाट बिरामीको भर्ना र उपचारको व्यवस्था मिलाउनुपर्ने उनीहरूको सुझाव छ।
यस्तै, कोभिड हटलाइन नम्बर राखी सूचना प्रणालीलाई प्रभावकारी बनाउने, कोभिड फोकल पर्सनको भूमिका प्रभावकारी हुनुपर्ने, व्यवस्थापन पक्ष प्रभावकारी हुनुपर्ने, सेन्ट्रल कोभिड कमाण्ड प्रणालीको विकास गरिनुपर्ने, पीसिआर परीक्षणको दायरा बढाउनुपर्ने उनीहरूको सुझाव छ।
कन्ट्याक ट्रेसिङका आधारमा पीसिआर परीक्षणको व्यवस्था मिलाउने, महामारीको बेलामा स्थानीय सरकारको भूमिका अझ प्रभावकारी हुनुपर्ने, सीमा नाका हुँदै नेपाल भित्रिएका नागरिकहरूको कोभिड-१९ को संक्रमण भए/नभएको सुनिश्चितताका लागि आवश्यक परीक्षण गर्नुपर्ने, स्थानीय तहहरूमा आवश्यक संख्यामा स्वास्थ्य मापदण्डसहितका क्वोन्टिन र आइसोलेसन केन्द्र निमार्ण गर्ने, सार्वजनिक तथा भीडभाड हुने स्थानमा अनिवार्य रूपमा स्वास्थ्य मापदण्डको पालना गराउनुपर्ने भनिएको छ।
बृद्धबृद्धा, गर्भवती महिला, एकल महिला, बालबालिका, फरक क्षमता भएका व्यक्ति, दीर्घ रोगी, जेष्ठ नागरिक, लैंगिक तथा यौनिक अल्पसंख्यकहरू तथा अति विपन्न वर्गहरूलाई क्वारेन्टिन तथा आइसोलेसन केन्द्रमा प्राथमिकतामा राखेर उपचार गर्नका लागि पहल गर्नुपर्ने सुझाव दिइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
