काठमाडाैं- 'फ्लोर क्रस' गर्ने नेकपा एमाले कर्णाली प्रदेशसभाका तीन प्रदेश सांसदलाई पार्टीबाट निस्कासित गरिएको छ।
शुक्रबार एमाले संसदीय दलको ह्विप उल्लंघन गरी मुख्यमन्त्री महेन्द्रबहादुर शाहीलाई विश्वासको मत दिएका प्रदेशसभा सदस्यहरु अमरबहादुर थापा, कुर्मराज शाही र नन्दसिंह बुढालाई पार्टीबाट निस्कासन गरिएको हो।
एमाले कर्णाली प्रदेश कमिटी अध्यक्ष गोरखबहादुर बोगटीले संसदीय दलको सिफारिसअनुसार शुक्रबारदेखि नै लागू हुने गरी पार्टी सदस्यसहित पार्टी कमिटीका सबै जिम्म्वारीबाट निस्कासन गरिएको बताएका छन्।
यस्तै ह्विप उल्लंघन गरी मुख्यमन्त्री शाहीको पक्षमा मतदान गर्ने प्रदेशसभा सदस्य प्रकाश ज्वालालाई पार्टी सदस्यसमेत नरहने गरी निस्कासित गर्न केन्द्रमा सिफारिस गरिएको बोगटीद्वारा शनिबार विज्ञप्तिमा उल्लेख छ। ज्वाला एमाले अध्यक्ष एवं प्रधानमन्त्री केपी शर्मा ओलीले गठन गरेको १०औं राष्ट्रिय महाधिवेशन आयोजक समिति सदस्य रहेका कारण केन्द्रबाटै कारबाही गर्नुपर्ने भएकाले केन्द्रमा सिफारिस गरिएको हो।
पार्टीको ह्विपविपरीत मुख्यमन्त्री शाहीको पक्षमा मतदान गर्नु जघन्य अपराधपूर्ण काम भएको विज्ञप्तिमा उल्लेख छ।
शुक्रबार मुख्यमन्त्री शाहीले विश्वासको मत लिने क्रममा एमालेका चार सांसदले फ्लोर क्रस गरेपछि उनको पद जोगिएको थियो। फ्लोर क्रस गर्ने चारैजना सांसद माधवकुमार नेपाल पक्षका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1784873618.png)
