कोरोना भाइरस संक्रमणको दोस्रो लहर फैलिएको चर्चासँगै परदेशीहरुको मनमा डरको भावना झन् बढिरहेको छ। हुन त परदेशीमात्र होइन, दुनियाँ नै डराएर बाँचिरहेको अवस्था छ। यस्तो विषम् परिस्थितिमा परदेशी जति पीडामा अरु परेको देखिँदैन। कसरी आफू अगाडि बढ्ने भन्ने कुरा नै अन्योलमा छ। कोरोना कहर त घट्नेभन्दा बढ्ने क्रममा छ। बढिरहेको पनि छ।
कोरोनासँग सुरक्षित हुने उपायहरु आए पनि मूलरुपमा खोपको राम्रो प्रभाव नदेखिनु दुःखदायी नै छ। पासपोर्टभित्र बाँधिएका परदेशीहरुमा आउने नयाँ वर्ष सुखदायी होला भन्ने ठूलो आशा थियो। तर, कोरोनाको नयाँ लहरले त्यो आशा पनि निराशामा परिणत हुने अवस्था छ। कतिको घर गएर साथीभाइ, आफन्तजन, घरपरिवारसँग नयाँ वर्ष मनाउने योजना थिए होलान्। ती योजनालाई पनि कतै न कतै प्रभाव परेको देखिन्छ।
एकातिर महामारी, अर्कोतिर कामको बोझ त छँदै छ। चाहँदा-चाहँदै पनि कोरोना र पासपोर्टको बन्धनमा बाँधिएर घर जान अनुकूलता नमिलेको अवस्था छ। साथी हो, समय परिवेशसँग लड्दै, उठ्दै गर्नुपर्ने समय छ। वर्षमा एकपटक आउने यो नयाँ वर्ष नमनाउँदा पनि झन् खल्लो लाग्ने। कैयन वर्षदेखि परदेशी जीवनका अनेक दुःख पीडाहरू झेल्दै आउँदा पनि समस्या जस्ताको तस्तै हुँदोरहेछ। जहाँ जसरी भए पनि आफ्नो मानिआएको चलनलाई समयअनुसार परिवर्तन गरी मनाउनु नै पर्यो।
महामारी नभएको भए, परदेशमा पनि टाढा, टाढा रहेका साथीभाइ साँझ जम्मा भएर रमाइलो गरिने थियो। खाएर, पियरमात्र रमाइलो हुन्छ भन्ने कुरा नि केही हतसम्म गलत हुँदोरहेछ। नत्र भने यसपालि किन साथीभाइ जम्मा हुन नपाउँदा नराम्रो अनुभव भएको छ। पिउन र खान त एक्लै पनि सकिन्छ।
यसपालि जमघट हुन नपाउँदा बल्ल थाहा भएको छ। साथीभाइबिनाको नयाँ वर्ष कस्तो खल्लो हुन्छ- भनेर। खल्लो हुन्छ भनेर पो के गर्न सकियो। खुल्ला ठाउँमा रमाइलो गर्ने अवस्था छैन। पहिलो प्राथमिकता आफ्नो स्वास्थ्य जो हुनेभयो।
नयाँ वर्ष त फेरि पनि आउँछ। जमघट त फेरि पनि गरौंला भनी चित्त बुझाउनुपर्ने अवस्था छ। आफ्नै कोठामा जति छौं मिलिजुली नयाँ वर्ष मनाउने कार्यक्रम नै राम्रो होला यो अवस्थामा। पासपोर्टभित्र बाँधिएको यो जिन्दगी, कोरोना महामारीले थुनेको खुल्ला आकाश। यसैको बीचबाट देखिँदै गरेको प्रकाश दिन नसक्ने ताराजस्तो हामी। यस वर्ष प्रकाश दिन नसके पनि आगामी नयाँ वर्षमा सबै महामारी समाप्त होस्। हामी परदेशको खुल्ला आकाशमा घुम्न सकौँ। रातको ताराजस्तो होइन दिनको सूर्यजस्तो उज्यालो जिन्दगीको सुरुआत होस्, यही शुभकामना नयाँ वर्ष वैसाख १ गतेको।
(तानसेन, पाल्पा/ हाल यूएई)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
