काठमाडाैं- कुनै समय थियो, फिल्म क्षेत्रमा प्रवेश गर्नेबित्तिकै नाम परिवर्तन गर्ने। नाम परिवर्तनको चलन नेपाली फिल्ममा मात्रै हैन, संसारभरकै फिल्मी क्षेत्रमा प्रख्यात थियो।
पुरानो नामले चर्चा नपाउने भन्दै निर्माता/निर्देशक नै नाम परिवर्तनका लागि उक्साउँथे। अहिले भने त्यस्तो चलन छैन।
आउनुहोस्, आजभन्दा करिब दुई दशकअघि नाम परिवर्तन गरेर फिल्मी क्षेत्रमा आएका नायिकाहरुबारे चर्चा गरौं।
करिष्मा मानन्धर
करिष्मा मानन्धर सानै उमेरमा फिल्मी क्षेत्रमा प्रवेश गरेकी नायिका हुन्। सन् १९८८ मा सन्तान फिल्मबाट रंगीन दुनियाँमा प्रवेश गरेकी करिष्माको नाम बुनु केसी थियो। उनी त्यो समयमा मात्र १४ वर्षकी थिइन्। बुनु केसी फिल्मी दुनियाँमा प्रवेश गरेपछि करिष्मा केसी बनिन्। फिल्मी क्षेत्रमा चर्चा कमाउँदै गएपछि उनले चर्चित निर्देशक विनोद मानन्धरसँग विवाह गरिन्। त्यसपछि करिष्मा केसीबाट करिष्मा मानन्धर बनिन्।
सुमिना घिमिरे
नेपाली फिल्मी दुनियाँमा 'छविलाल कञ्जुस छैन' फिल्मबाट डेब्यू गरेकी अभिनेत्री हुन् सुमिना घिमिरे। उनी फिल्मलेभन्दा विभिन्न 'कन्ट्रोभर्सी' (विवाद)का कारण धेरै चर्चामा आइन्। आजभोलि लगभग गुमनामजस्तै बनेकी सुमिनाको नाम फिल्मी क्षेत्रमा आउनुअघि मीना थियो। उनै मीनाले नामको अगाडि 'सु' थपेर 'सुमिना' नामबाट केही हदसम्म परिचय बनाउन सफल भइन्। उनले दुलही, रंग वैजनी, अप्रिल फूलजस्ता फिल्ममा अभिनय गरेकी छिन्।
युना उप्रेती
निर्देशक दीपक श्रेष्ठले निर्देशन गरेको फिल्म 'पर्खी बसे' बाट नायिकाको रुपमा डेब्यू गरेकी युना उप्रेतीको नाम पनि पहिले अर्कै थियो। उनी युना नभई यमुना थिइन्। यमुनाले 'पहिलो पहिलो माया' जस्ता चर्चित फिल्ममा अभिनय गरेकी छिन्। उनी अहिले भने नेपाल छाडेर विदेशमा परिवारका साथ रमाइरहेकी छिन्।
जिया केसी
दीपक श्रेष्ठकै फिल्म 'पर्खी बसे'बाट फिल्मी दुनियाँमा आएकी नायिका जिया केसीले पनि आफ्नो वास्तविक नाम परिवर्तन गरेकी हुन्। फिल्मी क्षेत्रमा आउनुअघि उनको नाम जानकी केसी थियो। निकै विवादित छवि बनाएकी जियाले विवादित फिल्म 'एटीएम'मा अभिनय गरेकी थिइन्। एटीएम फिल्म सेन्सरबाट निस्कँदा थिलोथिलो परेको थियो।
जेसिका खड्का
नायिका जेसिका खड्काको नाम पनि परिवर्तित हो। उनको वास्तविक नाम भने ज्योती खड्का हो। ज्योती नाम ग्ल्यामर नसुनिएको भन्दै उनले जेसिका बनाएकी हुन्।
यीसँगै यही समयका अन्य नायिकाहरुले पनि फिल्मी दुनियामा प्रवेश गरेसँगै आफ्नो वास्तविक नाम परिवर्तन गरेका छन्। नायिका प्रेरणा शर्माले त नाम मात्रै हैन, थर नै परिवर्तन गरिन्। उनको वास्तविक नाम विष्णुकुमारी परियार हो।
त्यस्तै निर्मातासमेत रहेकी जेनी कुँवरको नाम जानकी कुँवर हो। त्यस्तै लामो समयदेखि अमेरिकामा बसोवास गर्दै आएकी नायिका पूजा चन्दको नाम राधिका परियार हो।
यता घरपरिवारमा समय दिनका लागि चलचित्र क्षेत्र नै त्यागेकी नायिका मेलिना मानन्धरको वास्तविक नाम सुनिता मानन्धर हो। अमेरिकामा नै बस्दै आएकी र केही समयअघि नेपाली फिल्म चकलेट निर्माण गरेकी पुजना स्त्रीको नाम पनि वास्तविक हैन। उनी सानो पर्दामा पूजा प्रधान भनेर चिनिन्थिन्। पछि पुजना प्रधान हुँदै उनले आफ्नो नाम पुजना स्त्री बनाइन्। उनी नायिकाका साथै समाजसेवी पनि हुन्। विवाह नगरेरै दर्जनभन्दा धेरै बच्चाकी आमा बनेकी पुजना आजभोलि टिकटकमा रमाउने गरेकी छिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789383080.png)
