काठमाडाैं- नेपालकी पहिलो अभिनेत्री भुवन चन्दले एक कार्यक्रममा भनिन्, 'जमाना हाम्रो जस्तो रहेन। पहिले अभिनय हेरेर काम पाइन्थ्यो तर पैसा थिएन। अहिले त्यो अनमोल केसी भन्नेको हेराइ राम्रो रहेछ। यही हेराइ राम्रो भएकैले पचास लाखसम्म पारिश्रमिक लिँदा रहेछन्।'
भुवनले जस्तै अनमोलको अभिनयकलामा प्रश्न उठाउने धेरै छन्। अभिनय गतिलो नभएपनि उनी नेपालका महंगा नायक हुन्। उनलाई फिल्ममा देखाउनकै लागि लाखौं खर्चन निर्माता तयार छन्। सामाजिक सञ्जालमा फोटो पोष्ट गरेको समेत पैसा लिने नेपालका कलाकार हुन्, अनमोल।
उनै सुन्दरताका धनी, भुवन चन्दले भनेजस्तै हेराइ राम्रो भएका नायक अनमोल केसी २८ वर्षका भए। २०५० साल चैतमा जन्मिएका अनमोललाई शुभचिन्तकबाट जन्मदिनको शुभकामनाको ओइरो लागिरहेको छ। उनका बाबु भुवन केसीले त जति नै वर्ष बढेपनि 'मेरो लागि अनमोल सधैं उही बच्चा केटो (बेबी ब्वाइ) हो' भनेर सामाजिक सञ्जालमा लेखेका छन्।
सानै उमेरदेखि फिल्म क्षेत्रमा लागेका अनमोलको लाखौं युवा फ्यान छन्। उनको फिल्म हलमा चल्दा स्कुल-कलेज बंक गरेर फिल्महल पुग्छन् उनीहरू। होष्टेल फिल्मबाट फिल्मी दुनियाँमा डेब्यू गरेका अनमोल पहिलो फिल्मबाटै युवामाझ छाए। होष्टेलपछि जेरी फिल्ममा पनि उनको अभिनय युवाले मन पराए। ड्रिम्स फिल्मको सफलतापछि भने उनको फिल्मले व्यावसायिक हिसाबमा कम सफलता हात पार्न थाल्यो।
गाजलु, कृ, क्यापटेन, ए मेरो हजुर-३ फिल्मले चर्चा जति बटुल्यो, व्यावसायिक सफलता त्यही मात्रामा हात पार्न सकेन। यी फिल्ममा अनमोलको अभिनयलाई पनि दर्शकले ठिकैको घेरामा राखे।
उस्तै अभिनय भएको आरोप लाग्न थालेपछि उनले फरकपनाका लागि कृ र क्यापटेनमा अभिनय गरे। 'कृ'मा उनले शारिरीक रुपमा निकै मिहेनत गरे। पोष्टरमा देखिएको उनको रिसाएको अनुहार फिल्ममा भने देख्न सकिएन। यसले उनका फ्यानलाई केही हदसम्म भड्कायो।
त्यस्तै, क्यापटेनमा पनि उनले नयाँ कामका लागि मिहेनत गरे। तर, कमजोर भिएफएक्स र उनको कमजोर अभिनयका कारण फिल्मले हलमा दर्शकको चित्त दुखायो।
ए मेरो हजुर-३ मा फेरि पहिलेकै लभर ब्वाइको छबी देखेर दर्शक केही मात्रामा हल गए। उनी अहिले ए मेरो हजुर-४ को छायांकन सक्काएर बसेका छन्।अनमोलले अहिलेसम्म ७ ओटा फिल्ममा काम गरेका छन्। ६ ओटालाई दर्शकले हेरिसके, ए मेरो हजुर-४ कोभिड-१९ को प्रभावले फिल्म नसरे भदौमा हेर्न पाइनेछ।
जम्मा ६ ओटा फिल्ममा आधा भन्दा धेरै फिल्म व्यावसायिक रुपमा फ्लप भएपनि अनमोलको चर्चा भने निकै छ। किशोरी र युवती फ्यानहरू धेरै छन् अनमोलका। कोरियन ड्रामाको बानी परेका युवतीहरूले अनमोलको लुक्सलाई उतैका कलाकारजस्तो मान्छन्।
अनमोलले ए मेरो हजुर-३ र ४ मा बाहेक अरु सबैमा नायिका परिवर्तन गरेका छन्। यी दुईमा भने नायिका सुहाना थापाका बाबु सुनिल थापा निर्माता र आमा झरना थापा निर्देशक भएकाले उनी नायिका दोहोर्याउन बाध्य भए। बाँकी फिल्ममा उनले फरक फरक नायिकासँग काम गरे।
अनमोलको जो नायिकासँग काम गर्छन्, प्रेमको हल्ला पनि उनैसँग चल्ले गरेको छ। फिल्म हलमा पुगेसँगै प्रेमको हल्ला पनि सेलाउँछ। अहिलेसम्म उनले कुनैपनि केटीलाई 'गर्लफ्रेण्ड'को रुपमा बाहिर चिनाएका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785588615.png)
-1764146706.png)
