काठमाडौं– सहिद स्मारक बी डिभिजन लिग फुटबलमा नयाँबस्ती युवा क्लब र टुसाल युथ क्लबले बराबरी खेलेका छन्।
एन्फा कम्प्लेक्सको मैदानमा बुधबार भएको पहिलो खेलमा नयाँबस्ती युवा क्लब र टुसाल युथ क्लबले १–१ काे बराबरी खेलेकाे हाे। नयाँबस्ती अंकतालिकामा १२ अंकसहित छैठौँ स्थानमा छ भने टुसाल ९ अंकसहित सातौँ स्थानमा छ।
नयाँबस्तीका विवेक गुरुङले पहिलो हाफमा नै अग्रता दिलाएका थिए।
खेलकाे ३९औँ मिनेटमा गोल गरेर विवेकले नयाँबस्तीलाई अघि बढाएका थिए। तर ७१औँ मिनेटमा एलन राईको गोलले टुुसालले बराबरीमा फर्कियाे।
खेलपछि टुसाल युथ क्लबका प्रशिक्षक नरेश श्रेष्ठले विंगर र स्ट्राइकरबीच तालमेल नमिल्दा मुस्किल भएको बताए। ‘हाम्रा मिडफिल्डरले बल नियन्त्रणमा राखेर खेल्न सकेनन्। हाम्रो तालमेल बिग्रियो,’ उनले भने।
नयाँबस्ती युवा क्लबका सहायक प्रशिक्षक विकास राईले एक अंक जोड्न सकेकोमा खुसी व्यक्त गरे।
‘हाम्रा डिफेन्डरले उनीहरुका खेलाडीलाई मार्क गरेर खेल्न सकेनन् जसले एक गोल खान पुग्यौँ, समझदारीको अलिकति कमी देखियो,’ उनले भने।
खुमलटारले ब्वाइज युनियनलाई हरायो
बुधबार नै भएको दोस्रो खेलमा खुमलटार युथ क्लबले ब्वाइज युनियन क्लबलाई ३–० गाेल अन्तरले पराजित गरेकाे छ।
खेलको १९औँ मिनेटमा सविन केसीले गोल गर्दै खुमलटारलाई अग्रता दिलाएका थिए। ४३औँ मिनेटमा उनैले टिमका लागि दोस्रो गोल गरे। ७४औँ मिनेटमा आयुश घलानले टिमका लागि तेस्रो गोल गरे।
जितसँगै खुमलटारले शीर्ष स्थानमा रहेको सातदोबाटो युथ क्लबसँग अंक बराबरी बनाएको छ। सातदोबाटो युथ क्लबको ८ खेलमा २२ अंक छ भने खुमलटारको ९ खेलमा समान २२ अंक भएको छ। लिगमा तेस्रो स्थानमा रहेको बाँसबारीको ८ खेलमा १८ अंक रहेको छ।
ब्वाइज युनियन क्लबको ९ खेलमा १४ अंक रहेको छ। आरसिटीको ८ खेलमा १२, नयाँबस्तीको ९ खेलमा १२, टुसालको ९ खेलमा ९, श्री कुमारी क्लबको ८ खेलमा ७, मध्यपुर युथ एशोसियसनको ८ खेलमा ७, श्री भगवती क्लबको ८ खेलमा ६, झम्सिखेल युथ क्लबको ८ खेलमा ६ साथै पुल्चोक स्पार्टस क्लबको ८ खेलमा २ अंक रहेको छ।
गएको वर्ष कुनै पनि क्लबको रेलिगेसन पनि नहुने र माथिल्लो डिभिजनमा पनि नपुग्ने नियममा गरिएको लिगमा बाँसबारी र नयाँबस्ती पुछारमा रहेकाले अहिले १–१ अंक घटाइएको हो।
अहिले बी डिभिजन लिगको विजेता टिम मात्रै ए डिभिजनमा उक्लने नियममा एन्फाले खेल खेलाइरहेको छ। ए डिभिजन लिगबाट एक क्लब मात्र रेलिगेसन गर्ने र बी डिभिजनबाट एक क्लब मात्र माथि जाने नियम एन्फाले बनाएको हो। ए डिभिजनबाट सरस्वती युथ क्लब मात्र रेलिगेसनमा परेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1789631269.jpg)
