काठमाडौं- स्वास्थ्य तथा जनसंख्या मन्त्रालयले नेपालमा कोरोना संक्रमणपछि मृत्यु हुनेको संख्या सच्याएको छ। कोरोना संक्रमित मृतकको शव व्यवस्थापन गर्दै आएको नेपाली सेना र मन्त्रालयको विवरण फरक परेपछि मन्त्रालय छानबिन समिति गठन गरी गरी अध्ययन गर्दा थप ६१८ जना संक्रमितको मृत्यु भएको पाइएपछि विवरण सच्याइएको हो।
मन्त्रालयले बुधबारको कोरोना अपडेटमा गत २४ घण्टामा प्राप्त भएको मृत्यु संख्यामा ६१९ जना उल्लेख गरेको छ। यो बुधबार मृत्यु भएका संक्रमितको संख्या नभएर अद्यावधिक गरिएको विवरणसहितको तथ्यांक हो। गत २४ घण्टामा एक जना संक्रमितको मात्र मृत्यु भएको समेत मन्त्रालयले बताएको छ।
स्वास्थ्य तथा जनसंख्या मन्त्रालयका प्रवक्ता डा जागेश्वर गौतमका अनुसार गत २४ घण्टामा प्राप्त भएको ६१८ जना स्वास्थ्य मन्त्रालयले यसअघि नै अद्यावधिक गर्न छुटाएको तथ्यांक हो।
नेपाली सेनाले शव व्यवस्थापनको क्रममा संकलन गरेको तथ्यांकलाई आधार मानी विवरण सच्याइएको हो। ‘यो तथ्यांक घरमै मृत्यु भएर नेपाली सेनाले शव व्यवस्थापन गर्दा संकलन गरेको तथ्यांक हो,’ डा गौतमले भने, ‘नेपाली सेना र हाम्रो तथ्यांक नमिलेपछि अहिले मिलाइएको हो।’
योसँगै नेपालमा कोरोना संक्रमणपछि मृत्यु हुनेको संख्या २६८४ पुगेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।