काठमाडाैं– उद्योग वाणिज्य महासंघको टोली र श्रम मन्त्रीबीच संयुक्त रुपमा सीप विकास गर्ने विषयमा छलफल भएको छ।
महासंघको स्वास्थ्य तथा सीप विकास समितिका सभापति हेमराज ढकालसहितको टोली र श्रम, रोजगार तथा सामाजिक सुरक्षा मन्त्री गौरीशंकर चौधरीबीच उक्त विषयमा छलफल भएको हो।
ढकालसहित सहसभापति भक्तबहादुर हमाल, सदस्य सीताराम रेग्मी, महासंघका पूर्वकारिणी समिति सदस्य कमला श्रेष्ठसहितको प्रतिनिधिमण्डलले मन्त्री चौधरीसँग मन्त्रालयमा भेटेर सरकार र नीजि क्षेत्रको सहकार्यमा सीपमुलक तालिम सञ्चालन गर्नुपर्नेमा जोड दिएको छ।
सो अवसरमा महासंघका तर्फबाट सीपमुलक तालिमको लागि थुप्रै संस्थाहरूले ठूलो रकम खर्च गरेपनि नीजि क्षेत्रको माग अनुसार दक्ष एवं सीपयूक्त जनशक्ति पाउन कठिनाई भइरहेको मन्त्रीलाई जानकारी गराइएको थियो।
भेटमा सभापति ढकालले एकातिर मुलुकभित्र सञ्चालित उद्योगधन्दाका लागि चाहिएको जनशक्ति नपाउँदा ठूलो समस्या भएको र अर्कोतिर विनाकुनै सीप कामका लागि विदेशीने युवाहरू न्यूनतम पारिश्रमिकमा अधिकतम समय काम गर्न बाध्य हुने गरेको बताए।
यो समस्याको अन्त्य गर्न पनि सीपयुक्त जनशक्ति विकासका लागि तत्काल संयुक्त रुपमा तालिम सञ्चालन गर्नुपर्नेमा उनले जोड दिए।
सो अवसरमा मन्त्री चौधरीले नीजि क्षेत्रको सुझाव अनुसार सीपमुलक तालिम सञ्चालन गर्ने सरकारको योजना रहेको स्पष्ट पारे। महासंघबाट प्राप्त सुझाव एवं प्रस्तावलाई ध्यानमा राखेर आगामी दिनमा सीपमुलक तालिम सञ्चालन गर्ने प्रतिवद्धता उनले जनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768457877.png)
-1764146706.png)
-1768395492.png)
