भागरथी हत्या : घटनास्थलमा जे देखियो [स्थलगत रिपोर्ट]

सुरक्षा/अपराध

ललित बोहरा शनिबार, फागुन १, २०७७ १९:२०

बैतडी- बैतडीको दोगडाकेदार गाउँपालिका–७ की १७ वर्षीया किशोरी भागरथी भट्ट माघ २१ गते बुधबार कालो ज्याकेट लगाएर सँधैजस्तै हाँस्दै आमासँग विदा मागेर स्कुल हिँडेकी थिइन्। बिहान ९ बजे घरबाट निस्किएकी उनी दिउँसो पौने २ बजे विद्यालय सकेर घरतर्फ फर्किन थालिन्। करिब १ घण्टाको पैदल यात्रा तय गरेकी उनका पाइलाले घरको आँगन टेक्नै पाएनन्।

व्यवस्थापन संकायमा सनातन धर्म मावि, खोचलेकमा कक्षा १२ मा पढ्दै गरेकी उनी आफ्नो घर नजिकै घर भएका र नातामा भाइ पर्ने भानदेव भट्टसँग विद्यालयबाट घरतर्फ लागिन्।

विद्यालयबाट ५ मिनेटको पैदल दूरीमा स्थानीय खोचलेक बजार छ। भानदेव सोही बजारमा साथीहरू कपाल काट्दै गरेको र आफू कपाल पनि कपाल काट्ने भनेर रोकिए। भागरथीले त्यहीँ छेउको एउटा पसलबाट चाउचाउ किनिन्। अनि, घर जाने उकालो बाटोतर्फ एक्लै अगाडि बढिन्।

बजारबाट घर पुग्न जंगलको बाटो हुँदै करिब १ घण्टाको बाटो छिचोल्नु पर्छ। प्रत्येक दिन करिब पौने ३ बजे घर पुग्ने भागरथी उक्त दिन घर पुग्न पाइनन्। माघ २१ गते साँझ ७ बजेसम्म भागरथी घर नआएपछि उनकी आमा अत्तालिन थालिन्। भागरथी ढिलोमा पनि दिउँसो ३ बजेभित्र घर पुगिसक्छिन्। कहिलेकाहीँ ढिलै हुने भए घरमा आमालाई फोन गर्थिन्।

गएको पुस ९ गते बुवाको मृत्यु भएको र एकमात्रै दाजु रोजगारीका लागि भारत गएकाले घरमा आमा र भागरथी मात्रै बस्ने गरेका थिए। तर, त्यो दिन न भागरथी घर पुगिन् न त उनको फोन नै आयो। त्यसपछि आमासँगै उनका काका पनि अत्तालिए। स्थानीय र विद्यालयमा बुझे। उनको कुनै सम्पर्क भएन। प्रहरीलाई पनि खबर गरे। तर, सबैले ‘पोइल गएको’ अनुमान गरे।

गाउँका कतिपय किशोरी सानै उमेरमा विवाह गरेर जाने गरेका कारण भागरथी पनि विवाह गरेर पो गइन् कि भन्ने लाग्नु अस्वभाविक पनि थिएन। आफन्तले खोजी जारी नै राखे। भोलिपल्ट दिउँसोसम्म पनि उनको कुनै खबर पत्ता लागेन। त्यसपछि आफन्तहरु पनि अत्तालिन थाले। उनी फर्किहाल्छिन् भन्ने आशाको त्यान्द्रो त्यतिखेर चुडियो जब उनको शव माघ २२ गते साँझ ५ बजे जंगलको बाटोभन्दा करिब ७० मिटर तल बनमाराको झाडीभित्र भेटियो।

घटनास्थल लबलेक वन

भागरथी हराएको भोलिपल्ट अर्थात् माघ २२ गते उनकै सहपाठीहरूले घर फर्कने क्रममा भागरथीको शव देखेपछि अभिभावकलाई खबर गरेका थिए। उनकै सहपाठीहरू विद्यालयबाट घर फर्कने क्रममा भागरथीको शव देखेपछि अत्तालिँदै घर पुगेर अभिभावकलाई खबर गरेका थिए।

सहपाठी भानदेव भट्टले भने, ‘हामी ३ जना साथी २२ गते विद्यालयबाट घर जाँदै थियौं, बाटोबाटै केही कपडा जस्तो देखेँ। अलि तल जादाँ मान्छेको हात देखे, अनि डरले भागेर घर गएँ। बाटोमा मगर अंकललाई भनेँ। उनले पनि वास्ता गरेनन्। अनि, घर पुगेर काकालाई भनेँ। काका गएपछि भागरथी हो भन्ने थाहा भयो।’

त्यसपछि प्रहरीले माघ २२ गते रातभर शव कुरेर अपराध अनुसन्धान टोली पुगेपछि मात्रै भागरथीको शव उठायो। जुन स्थानमा भागरथीको शव भेटिएको छ, सो स्थान भागरथी पढ्ने स्थानीय सनातम धर्म मावि, खोचलेकबाट करिब आधा घण्टाको पैदल दूरीमा रहेको छ। बजारबाट केही उकालो बाटो हुँदै भर्खर खनिएको कच्ची सडक हुँदै घटनास्थल पुग्न सकिन्छ। पातलो तर अग्ला सल्लाका रुखमुनी बनमाराका स–साना बुट्यानहरू घटनास्थलको वरिपरी देखिन्छन्। मुख्य सडकबाट करिब ७० मिटरको दूरीमा भागरथीको शव शरीरमा लगाएको एउटा शर्टमात्रै रहेर अन्य सबै कपडाहरू खोलिएको अवस्थामा फेला परेको थियो। उनको भित्रि वस्त्रमा रगत समेत लतपतिएको अवस्थामा उनलाई प्रहरीले फेला पारेको थियो।

खाना पकाएर भागरथीलाई बोलाउछिन् आमा
भागरथीको शव यति विभत्स ढंगले हत्या गरेको अवस्थामा भेटिएको खबर सुनेपछि उनकी आमा पटकपटक मुर्छित् भइन्। आमाको साथमा रहेकी एकमात्रै छोरीको बलात्कारपछि हत्या भएको खबर पाएपछि उनी अहिले पनि सम्हालिन सकेकी छैनन्। घटनाको एक सातापछि नेपाल लाइभ संवाददाता उनको घरसम्म पुग्दा उनको आँखामा आँसु ओभाएका थिएनन्। एक साताभन्दा बढी समय बितिसक्दा पनि उनले अझै अन्न खाएकी छैनन्।

बरु उनी अर्धबेहोस् अवस्थामै खाना पकाउँछिन् र खाना खानका लागि छोरी भागरथीलाई बोलाउँछिन्। तर, अब न भागरथीले आमाको आवाज सुन्नेछिन् न आमाले पस्किएर दिएको खाना खानै आउनेछिन्। उनकी आमा छोरीको यो हालत बनाउने अपराधी सार्वजनिक हुने दिन कुरेर बसेकी छिन्। ‘मेरो छोरीलाई कलिलो उमेरमा ढाल्नेलाई फासी नै हुनुपर्छ’, उनको माग छ।

भागरथीकी आमा घरको ढोकामा

घटना भएको ४ दिनपछि घर पुगेका उनका दाईले भने आफूसँग पछिल्लो समय बहिनीको केही कुरा नभएको बताए। तर, उनले अकाउन्टमा एक बिषय लाग्यो भनेर केही दिन अगाडि फोन गरेको बताए। ‘घरको चिन्ता नगर्नुस दाई’ भनेकी थिइन्। बुवाको काजक्रिया गरेर १५ दिन अगाडि मात्र साहुको ऋण तिर्न भारत पसेका थिए उनी।

'२१ गते भागरथीको कसैसँग कुराकानी छैन'

घटना भएको दिन माघ २१ गते भागरथीको कुनै कल नभएको पाइएको छ। त्यसैले अपराधीलाई भागरथी र भागरथीले अपराधीलाई चिनेकै हुन सक्ने निश्कर्षमा प्रहरी पुगेको छ। किनभने भागरथीको कल डिटेल्स रिपोर्ट (सिडिआर)मा भागरथी र अपराधीबीच कुराकानी भएको देखिएको छैन।

भागरथीले प्रयोग गर्ने एनसेल र एनटीसीको मोबाइलमा घटना भएको दिन कोही पनि व्यक्तिसँग कुराकानी भएको पाइएको छैन। यद्यपि, भागरथीले प्रयोग गर्ने भारतीय सिम कार्डको सम्बन्धमा थप अनुसन्धान भइरहेको प्रहरीले जनाएको छ।

प्रहरीका अुनसार अपराधीले भागरथीको बलात्कारपछि हत्या गरेर उनको मोबाइलको सम्पूर्ण डेटा डिलिट गरेको पाइएको छ। भागरथीको किप्याड मोबाइल घटनास्थलमै भेटिएको थियो। तर, उक्त फोनको ब्याट्री झिकेर फ्याँकिएको छ। त्यतिमात्रै होइन, अपराधीले भागरथीको मोबाइलको सम्पूर्ण कल लग डिलिट गरिएको अवस्थामा फेला परेको थियो।

यो हर्कत हेर्दा अपराधी प्रविधिसँग जानकार र चलाख रहेको बुझिन्छ। योसँगै कल लग सबै डिलिट गर्नुको कारण भागरथी र अपराधीबीच कुनै न कुनै समयमा मोबाइलमा कुराकानी वा मेसेज आदनप्रदान थियो कि भन्ने आशंका पनि गरिएको छ।

डिआइजी आफै फिल्डमा
सुदूरपश्चिम प्रहरी प्रमुख, डिआइजी उत्तमराज सुवेदी घटनाको पर्सिपल्टदेखि घटनास्थल नजिकैको प्रहरी चौकी, खोचलेकमा बसेर अनुसन्धान गरिरहेका छन्।

सुरुमै एसपीलाई घटनास्थलमा पठाएका डिआइजी सुवेदी भोलिपल्ट आफैै फिल्डमा उत्रिएका छन्। सामान्य अवस्थामा डिएसपी वा एसपीसम्मलाई यस्ता घटनाको अनुसन्धानमा पठाउने गरिएकामा यसपटक डिआइजी आफै फिल्डमा उत्रनुलाई प्रहरीले यसलाई आफ्नो साखसँग जोडेको रुपमा समेत हेरिएको छ।

डिआइजी उत्तमराज सुवेदी

किनभने अब यसको जस वा अपजस डिआइजी आफैले लिनुपर्ने हुन्छ। र, कञ्चनपुरको निर्मला पन्त हत्याकाण्ड र अनुसन्धानको पुनरावृत्ति नहोस् भनेर डिआइजी आफै फिल्डमा खटिएका बताइन्छ। प्रमाणका सा–साना अंशलाई पनि यतिबेला सुक्ष्म अध्ययन भइरहेको प्रहरीले जनाएको छ। विगतको नजीरलाई हेरेर प्रहरी, अहिले शंका लागेका व्यक्ति प्रमाण नपाउदासम्म थुन्ने पक्षमा छैन।

कञ्चनपुर घटनासँगै दाँजेर हेरिएको यो घटनालाई कञ्चनपुर प्रकरण दोहोरिन नदिने सुवेदीको जिकिर छ। मानिसहरूले कञ्चनपुर (निर्मला पन्त बलात्कार तथा हत्या) घटनालाई दाँजेर हेर्नु र उक्त घटनाको अपराधीबारे अहिलेसम्म कुनै प्रमाण नभेटिएको भन्नुले स्थानीय सशंकित छन्। घटनामा सबै पक्षबाट भएको कमजोरीलाई पनि बुझेर त्यस्तो कुनै कमजोरी नदोहोरिएको सुवेदी बताउँछन्।

सुरुका दिनमा अपराधी वा आशंकित व्यक्तिबारे कुनै सूचना वा जानकारी नआएको भएपनि अहिले पनि स्थानीयले आशंकित व्यक्तिहरूबारे जानकारी दिइरहेको डिआइजी सुवेदीले बताए।

यद्यपि, घटनाको सुरुवातमा स्थानीयले कुनै सूचना नदिएको र अनुसन्धान अधिकारीसँग कुराकानी गर्नै नखोजेको बुझिएको थियो। यहाँ ५० भन्दा बढी अनुसन्धान अधिकृत फिल्डमा छन्।

अपराधी पत्ता नलगाएसम्म शव नबुझ्ने आफन्तको अडान
घटना भएको १० दिन बितिसक्दा पनि अपराधीको सुइँको नपाएको भन्दै भागरथीको परिवार र आफन्तले अपराधी पत्ता नलागेसम्म शव नबुझ्ने अडान लिएका छन्। शव बुझ्दा न्याय नपाइने डरका कारण पनि उनीहरूले पहिले अपराधी पक्रन दबाब दिइरहेका छन्।