काठमाडौं- सर्वोच्च अदालत बार एशोसिएशनले प्रधानमन्त्री केपी शर्मा ओलीको अभिव्यक्तिले स्वतन्त्र न्यायपालिकाको मर्यादामाथि प्रहार भएको ठहर गरेको छ।
ओलीले वरिष्ठ अधिवक्ता, नेपाल बार एशोसिएशनका पूर्वअध्यक्ष कृष्णप्रसाद भण्डारीप्रति अपमानजनक शब्द प्रयोग गरी होच्याउन खाजेकोप्रति गम्भीर ध्यानाकर्षण भएको समेत सर्वोच्च बारले जनाएको छ।
आइतबार विज्ञप्ति जारी गर्दै सर्वोच्च बारले प्रधानमन्त्री जस्तो उच्चतम् मर्यादित पदमा रहेको व्यक्तिले प्रतिनिधि सभा विघटनको मुद्दामा गरिएको बहसको विषयलाई लिएर ‘सर्वोच्च अदालतमा बाजेलाई तमासा देखाउन लगिएको’ र ‘वकिलहरुले कुरा फिट्या फिट्यै छन्’, जस्ता शब्दको प्रयोग गरी कानून व्यवसायीको मर्यादा तथा अदालतमा विचाराधीन मुद्दाको गम्भीरतामै असर पर्नेगरी अभिव्यक्ति दिएको टिप्पणी गरेको छ।
‘अदालतमा विचाराधीन कुनैपनि विवादमा निष्कर्षमा पुग्नको लागि कानून व्यवसायीले आाफ्नो पक्षको प्रतिनिधित्व गर्ने व्यावसायिक धर्म हो। कार्यकारी प्रमुखको जिम्मेवारी वहन गर्नुभएका सम्माननीय प्रधानमन्त्रीले पदीय मर्यादाको समेत ख्यालै नगरी न्यायपालिकाको स्वतन्त्रता तथा कानून व्यवसायको मर्यादालाई नै प्रहार गर्नेगरी दिएको अभिव्यक्तिप्रति यो बार क्षोभ व्यक्त गर्दछ’, विज्ञप्तिमा भनिएको छ।
वरिष्ठ अधिवक्ता भण्डारीलाई होच्याउने कार्यले उनको मात्र नभई नेपाल राज्यभर अभ्यासरत कानून व्यवसायी तथा न्यायपालिकाको स्वतन्त्रतामाथि आक्रमण गरेको सर्वोच्च बारको निष्कर्ष रहेको उल्लेख गरिएको छ।
यस्ता अभिव्यक्ति आगामी दिनमा नदोर्याउन आह्वान गर्दै दोहोरिएमा कडा विरोध कार्यक्रम गर्ने चेतावनी पनि दिइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
