फाइल फोटो
काठमाडौं– प्रधानमन्त्री केपी शर्मा ओलीले वरिष्ठ अधिवक्ता कृष्णप्रसाद भण्डारीका विषयमा गरेको टिप्पणीप्रति नेपाल बार एसोसिएसनले आपत्ति जनाएको छ। प्रधानमन्त्री ओलीको उक्त टिप्पणी अमर्यादित, अपमानजनक र असहिष्णु भएको ठहर गर्दै सार्वजनिक रुपमा माफी माग्न आग्रह गरिएको छ।
उक्त अभिव्यक्ति संविधान, कानुन र प्रधानमन्त्री स्वयंको पदीय मर्यादा, आचरण अनुकूल पनि नभएको महासचिव लिलामणि पोखरेल हस्ताक्षरित विज्ञप्तिमा उल्लेख छ। प्रधानमन्त्री ओलीले माघ ९ गतेका एक कार्यक्रमलाई सम्बोधन गर्ने भनेका थिए, ‘वकिलले कुरा फिटेका फिट्यै छन्, केही वकिलहरुले एकजना बाजे वकिललाई लिएर गएछन् त्यहाँ तमासा हेर्न।’
उक्त अभिव्यक्ति वरिष्ठ अधिवक्ता भण्डारी र समग्र कानुन व्यवसायीकै विरुद्ध मात्र नभएर अदालतकै मानहानी/अवहेलनाजन्य कार्य समेत भएको बारको ठम्याइ छ। भनिएको छ, 'प्रधानमन्त्रीज्यूको उक्त अमर्यादित, अपमानजनक र असहिष्णु अभिव्यक्तिप्रति नेपाल बार एशोसिएशन गम्भीर आपत्ती र खेद व्यक्त गर्दछ।'
कानुन व्यवसायीहरुले आ–आफ्नो पक्षको तर्फबाट बहस पैरवी गर्दा कुनै पनि मुद्दाको पक्ष वा अन्य कसैले पनि कानुन व्यवसायीप्रति कुनै गाली–गलौज, अपमानजन्य, होच्याउने वा खिसी–ट्युरीको विषय बनाइनु नहुने बताइएको छ। यस्तो कार्य अदालतको अवहेलनाजन्य र खेदजनक पनि हुने विज्ञप्तिमा उल्लेख छ।
आगामी दिन यस किसिमका अभिव्यक्तिहरु नदोहोर्याउन माग गर्दै दोहोर्याएमा नेपाल बार एशोसिएशनले सशक्त विरोधका कार्यक्रमहरु गर्न बाध्य हुने व्यहोरा समेत अवगत गराइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
