काठमाडौं-यातायात व्यवस्था विभागले सवारी चालक अनुमति पत्र (लाइसेन्स) लिनका लागि भरिने फारममा लगाएको कोटा प्रणाली हटाएको छ। शुक्रबारबाट विभागले कोटा हटाएको हो।
योसँगै निश्चित कोटा सिस्टम हट्ने यातायात व्यवस्था विभागका महानिर्देशक गोगनबहादुर हमालले जानकारी दिए। ‘हामीले सर्भरको समस्या सुल्झाएर परीक्षण पनि गरिसक्यौँ। अब सेवाग्राहीले सातै दिन २४ सै घन्टा फारम भर्न सक्ने छन्,’ उनले भने।
फारम भरिसकेपछि त्यहाँ तोकिएको मितिमा यातायात कार्यालय जानु पर्नेछ। यातायात व्यवस्था विभागले गत पुस १० गते सूचना जारी गर्दै स्वास्थ्य तथा जनसंख्या मन्त्रालयले जारी गरेको स्वास्थ्यसम्बन्धी मापदण्डहरू पालन गर्ने व्यवस्था गरी १४ गतेदेखि आवदेन खुला गरेको थियो।
आवेदन खुला भए पनि फारम भर्नेको संख्या अधिक भएकाले कोटा सिस्टम हुँदा अधिकांश सेवाग्राही फारम भर्नबाट बञ्चित थिए। त्यस्तै केही दिनदेखि आएको सर्भरको समस्याले अनलाई आवेदन प्रणाली बन्द थियो। अब भने लाइसेन्स बनाउन चाहने हरेकले जुनसुकै सयममा वेबसाइटमा भएर फारम भर्न सक्ने छन्।
कसरी भर्ने फारम?
अनलाइन फारम भर्नका लागि यातायात व्यवस्था विभागको वेबसाइटमा जानु पर्छ। पेज खुलेपछि दाहिनेपट्टि अनलाइन सवारी चालक अनुमति पत्र प्रणाली लेखिएको लिंकमा क्लिक गर्ने। त्यसपछि पेजको सबभन्दा माथि अनलाइन ड्राइभिङ लाइसेन्स रजिस्ट्रेसनमा जाने।
नयाँ पेज देखिएपछि क्याटागोरीमा गई नयाँ लाइसेन्स, लाइसेन्स रिन्यू, वा प्रतिलिपिमध्ये एक अप्सन छानेर तल प्रोसिड लेखिएको बटनमा क्लिक गर्ने। व्यक्तिगत विवरण भरेर आफूलाई पायक पर्ने परीक्षा केन्द्र छानेर सबमिट गर्ने।
त्यसपछि ’एप्लिकेन्ट सेभ्ड् सक्सेसफुल्ली’ देखिन्छ। त्यहाँ ओकेमा क्लिक गर्ने। र, अन्त्यमा प्रिन्टमा क्लिक गरेपछि फारम भरिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
