काठमाडौं- नेपालका लागि कतारी राजदूतावासले म्यानपावरबाट लिइएको अनधिकृत अन्तर्वार्तामा आफ्नो कुनै संलग्नता नभएको स्पष्ट पारेको छ। मंगलबार साँझ एक विज्ञप्ति जारी गर्दै दूतावासले यस्तो दाबी गरेको हो।
कतार पुलिसका लागि भन्दै पूर्वस्वीकृति बिनाको माग देखाएर मंगलबार हाेप इन्टरनेसनल म्यानपावरले श्रमिकको अन्तर्वार्ता लिइरहेको स्थानमा कतारी दूतावासकाे गाडी फेला परेपछि दूतावासको स्पष्टीकरण आएको हो। दूतावासको गाडी फेला परेसँगै अनधिकृत काममा दूतावासकै संलग्नता हुन सक्ने आशंका गरिएको थियो।
दूतावासले जारी गरेको विज्ञप्तिमा भनिएको छ, 'पुलिसमा नेपाली नागरिकलाई लैजान कतारी नागरिक अन्तर्वार्ता लिन आएकाे विषयमा कतार राजदूतावासकाे कुनै पनि संलग्नता नरहेको स्पष्ट पार्न चाहन्छाैँ।'
नेपालबाट कतारमा आवश्यक पुलिसमा भर्ती गराउंन डिमान्ड गर्ने केही म्यानपावर कम्पनीले तालिम अनुगमन गर्न आएको टोलीलाई सवारी साधन मात्र उपलब्ध गराएको दूतावासको दाबी छ।
'कतार पुलिसमा जाने युवाको शारीरिक र मानसिक रूपमा फिट हुन सक्ने नसक्ने भनी म्यानपावर कम्पनीको सामान्य चेकजाँचकाे लागि आएकाे कतारी नागरिकको टाेलीलाई राज्यकाे जिम्मेवार निकाय राजदूतावासले सवारी साधन उपलब्ध मात्र गराएकाे हाे,' दूतावासको दाबी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
