काठमाडौं–युनाईटेड इदि मार्दी हाइड्रोपावर कम्पनीले असोज ७ गतेदेखि प्रभावित क्षेत्रका लागि प्राथमिक शेयर निष्काशन गर्ने भएको छ। कम्पनीले कास्की जिल्लाका प्रभावित क्षेत्रका बासिन्दाका लागि ४ लाख २० हजार कित्ता प्राथमिक शेयर निष्काशन गरेको हो।
कम्पनीले पहिलो चरणमा असोज २१ गतेसम्म र पहिलो चरणमा नबिकेमा कात्तिक ६ गतेसम्म जारी गर्न सक्ने छ। कम्पनीले गत चैत १० गतेदेखि नै निष्काशन गर्ने तयारी गरेको भए पनि कोभिड–१९ का कारण स्थगन गरेको थियो।
प्रभावित क्षेत्रका लागि प्राथमिक शेयर निष्काशन गरेपछि कम्पनीले सर्वसाधारणका लागि ६ लाख ३० हजार कित्ता जारी गर्ने योजना बनाएको छ। जम्मा शेयर पुँजीमध्ये १० प्रतिशत प्रभावित र १५ प्रतिशत सर्वसाधारणका लागि जारी हुनेछ।
प्राथमिक शेयर निष्काशनपछि कम्पनीको शेयर पुँजी सर्वसाधारणतर्फ २५ प्रतिशत र संस्थापकतर्फ ७५ प्रतिशत कायम हुनेछ। कम्पनीको कुल पुँजी भने ४२ करोड रुपैयाँ हुनेछ। कम्पनीले कास्कीको माछापुच्छ्रे गाउपालिका ८ र ९ मा ७ मेगावाट क्षमताको आयोजना निर्माण गरेको छ। आयोजनाले २०७६ असोज २० गतेदेखि विद्युत उत्पादन सुरु गरेको थियो।
आयोजनाको कुल लागत भने एक अर्ब ४२ करोड रुपैयाँ छ। प्रतिमेगावाट लागत २० करोड ३९ लाख रुपैयाँ पर्न आउछ। प्राथमिक शेयरमा अहिले गरिएको लगानी फिर्ता आउन कम्तिमा पनि ८ वर्ष ९ महिना लाग्नेछ। गत आर्थिक वर्षको वित्तीय विवरण अनुसार कम्पनीको प्रति शेयर आम्दानी १२ रुपैयाँ ऋणात्मक छ। चालु आर्थिक वर्षमा भने ८ रुपैयाँ हुने प्रक्षेपण गरिएको छ। तीन वर्ष पछि कम्पनीको प्रतिशेयर आम्दानी १४ रुपैयाँसम्म पुग्ने अनुमान गरिएको छ। कम्पनीको सञ्चालक समितिका अध्यक्ष माछापुच्छ्रे बैंकका पुर्व अध्यक्ष सुर्यबहादुर केसी रहेका छन्। साथै सदस्यमा माछापुच्छ्रे बैंकका वर्तमान अध्यक्ष रोशन केसी छन्। बाँकी सञ्चालक तथा प्रमोटर पनि बैंकका लगानीकर्ता छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788007575.jpg)
-1786602170.png)
-1787821306.jpg)
-1786513116.png)
